今日要一早起身， 5:30就要出發，因為要去坐熱氣球，book 左要6:15 到，所以匆匆忙忙喺酒店對面便利店買少少嘢食，就上車一路坐車一路食，差唔多去到嘅時候，見到凌晨時分條街有兩個人喺度行，我哋諗緊佢哋係咪都係去坐熱氣球，但係去熱氣球嘅位置仲要揸五分鐘車，佢哋可能要行好耐，我哋去到嘅時候，見有幾架車泊咗喺度，職員都叫我哋泊架車喺嗰邊，清晨時分天仍未光，天氣非常寒冷，我哋要坐在車內等，而接待嘅位置有啲凳可以俾人坐喺度等，亦都有提供一啲毯俾人保暖，坐到6:15 可以先登記，等多15分鐘開始天光，職員叫晒所有人埋去，地上有一個未充氣嘅熱氣球，職員用日文和英文講解，又示範噴火，等我哋知道坐咗上去之後，噴火嘅時候係會好大聲，等我哋唔使咁驚，講解完之後佢哋開始吹風入個熱氣球，當個熱氣球充滿氣之後，打橫放咗喺地上，職員叫我哋行入去個氣球度體驗吓，大家都覺得好神奇，入晒去影相，影得好開心😆 影完相我哋出返去，個熱氣球開始升起，亦都準備第一批人上去，我哋順住登記次序上去，每次最多六個人，包括埋控制員，我哋見到最先上船嗰兩個人，就係我哋頭先見到行落嚟果兩個人😂 佢哋上咗船之後，熱氣球就開始噴火升空，升起大概20米左右，停低俾大家影完相之後再落返嚟，全程大概5分鐘，收費¥4,000，真係可以升空體驗，唔似得之前中環咁收得仲貴！輪到我哋四個嘅時候，有一位女士係一個人，所以join埋我哋一齊升空，其實站立個位置係非常細，六個人係剛剛好，都唔可以好轉到身😅落返嚟之後，就隨時可以走，不過我哋都留低影吓相，太陽出咗之後暖返啲，冇咁凍！見到頭先行落嚟嗰兩個人，沿路行返走，勁👍🏻
坐完熱氣球，揸車去魚市場，去咗一個叫做松島さかな市場，去到見到門口排晒隊，原來裏面淨係得一間店，主要係食魚生丼同鮪魚壽司，買完之後攞上樓上食，質素普通，而且選擇少，好多嘢都話賣晒，外面亦都有一檔賣燒蠔，不過我哋咁早就唔想食，所以只係食咗少少嘢，再揸車去第二度！
跟住去咗另一個魚市場，鹽釜水產市場，呢個市場同頭先嗰個爭好遠，呢度選擇好多，佢個格局好似一個街市咁，亦都有啲位置可以俾你坐低食嘢，熱鬧好多，我哋揀咗啲生蠔、魚生、白子、鮑魚等等，喺海鮮檔處理完之後，就去坐低食，而坐低食嘅位置，亦都可以有其他食物賣，又有飲品，都幾熱鬧！早知唔去頭先嗰個魚市場，直接嚟呢度就啱D! 我哋仲買咗啲迷你奇異果，留返今晚食，就去攞車走！
我地去日本三景之一松島，其實我哋已經身處喺松島，不過佢最大嘅特色，係附近有好多個小島，正常要坐船出去兜個圈，不過好友話真係坐喺個船度望吓D島，所以情願喺岸上面望吓就算，而且上船嗰條人龍非常之長，所以我哋就去行福浦橋，行過去對岸福浦島睇吓，呢度好多人，我哋都搵唔到位泊車，所以要喺停車場度等，有人走我哋先至有得泊車，好彩唔使等好耐就有人走，泊好車就行去福浦橋嘅入口，呢度要收費¥200，沿着呢條紅色橋行過去就係福浦島，有少少好行山咁，一路上都有紅葉🍁，好靚，天氣亦都好好，行得好舒服😌
喺島上面行吓影吓相都用咗個幾鐘，行返去松島，碼頭仲有一間瑞巖寺，行咗個圈再去碼頭影返張相留念，就過對面嘅商店街行吓，喺間手信店又買咗少少嘢，佢有一款New Balance 圖案嘅襪，好得意，所以買咗幾對🤭因為喺出邊見唔到有得賣！
跟住揸車去Aeon Town 仙台泉大澤，因為嗰度有間Workman Colors ，好友想睇吓嗰日睇中嗰件衫，呢度會唔會有啱佢size，不過最後都係冇！我哋喺AEON食咗碗拉麵先，先至行街！今次冇乜收穫，我哋返酒店放低啲嘢先再出去食飯！
今晚諗住食燒肉，喺火車站附近，所以我哋冇揸車，就咁行過去，不過去到冇位，所以改咗去搵另一間串燒店食，呢間串燒店比較地道，店名叫做丸昌，門口都好多人排隊，店入邊都幾擠迫，座位都好緊張，我哋等咗半個鐘多啲先有位，四個人都要一字排開坐面壁位，而且個通道好窄，咁啱有個識講國語嘅女仔去招呼我哋，不過佢應該新入職，好多嘢都唔清楚要問廚房，我哋叫關東煮嘅蘿蔔同魚蛋，佢又俾咗雞蛋同魚蛋，好多我哋想食嘅嘢都話賣晒🤦🏻♀️，所以我哋只係食咗少少嘢，就決定搵第二間再食！因為頭先排隊嗰陣，好有去附近望吓有咩食，見到有間串燒店都唔錯，所以我哋喺呢度食完就再過去嗰間度食！
行過幾個舖位嗰間叫串鳥，主要係食雞嘅串燒，不過佢都有啲豬肉串，我哋都叫咗廿幾串嘢食！頭先嗰餐好似冇乜食過嘢，所以呢度食返補數🤣串燒質素普通，平均都係¥200 左右一串！食完就返酒店了！今晚又要執行李，好友明天返香港，我就繼續下個行程😆
沒有留言:
發佈留言