2023年5月東京7天遊 Day 5 - 銀座

今朝在星野 OMO3 check out ，都係放低張卡入收集箱就得，趁我嗰張廿四小時任搭嘅 Metro 車飛，仲未夠廿四小時，就去赤坂見附站，搭Metro 去東京站！

去到東站先去買手信，因為要上午先買到 NY perfect cheese ，所以趁有個喼，買埋裝入喼，另外再買 Tulip rose ，仲有新嘅 Tokyo Chocolat Factory ，今次行李只有23kg，所以只買細盒的！跟住就去酒店放低行李先，在東京駅一番街的26號出口係最近酒店，不過要行樓梯，應該有其他出口可以有lift，不過行到嚟，都搵唔到有lift，所以照上左樓梯先🤦🏻‍♀️ 好彩行李唔重！

行返去東京駅一番街，見到有間星乃咖啡店，食個早餐先，呢D咖啡店嘅早餐通常都係得一塊多士，所以我就叫咗個多士同埋咖啡，跟住叫咗鮮奶咖啡，因為日本啲豆奶咖啡真係唔好飲，佢又冇燕麥奶！

食完早餐，然後行去銀座！先去 Loft 行咗幾個圈，買咗少少嘢，又要搞埋退稅，跟住再去食lunch，本來想去 Venci 朱古力店樓上食鐵板燒，但係見到嗰間店係樓上店，門口又冇餐牌，所以轉左去地庫一間壽司店 すし処きたむら，因為佢門口有餐牌知道有咩食，佢主要三款set，當然有散叫，我諗呢D 壽司set 係等D客最少要食一定銀碼，因為日本又唔興最低消費，所以通常呢D壽司店會限制你最少叫一個set，我見個set 有我鍾意食嘅赤貝、拖羅、海膽軍艦，所以就叫呢個，落到去見店入面只有十個位左右，傳統壽司店嘅格局，即係吧枱圍住師傅個廚房，店內已有5-6個日本人食緊，另一邊冇人，我自己坐另一邊，落左 order 就等食，佢係逐件上果種，先嚟三片魚片，酸酸地有D芝麻，師傅話唔好點豉油，店員都係有限嘅英文，但係總算溝通到！先嚟茶碗蒸，跟住有玉子、三文魚籽軍艦、甜蝦、拖羅、赤貝、海膽軍艦、最後個鰻魚壽司好好食！整體D壽司唔錯👍🏻

跟住再去三越行街，又買返幾年前買過嘅 Enherb 花茶，又買左小飾物，原本想買個錫杯，但係太貴，所以冇買到！行咗大半日對腳好攰，好彩呢啲百貨公司都有啲凳俾人坐，咁就坐下休息吓！😮‍💨 行吓坐吓，又去咗幾個鐘！又去 Uniqlo 行吓！天就快黑就去食晚餐，諗起篝拉麵，又去排隊！去到已經有十幾人，店員話排50分鐘左右，排排吓落微雨，好彩好快就停咗，跟住排咗45分鐘就入得喇，因為排隊嘅時候已經落咗order，所以一坐低等幾分鐘就有得食，上次叫咗個特製雞白湯soba ，特製兩個字係紅色嘅，因為對應返餐牌上小食果度紅色字嘅特製仕樣，即係 topping ，即係有多兩塊叉燒、半熟蛋、雲吞，我覺得個雲吞麻麻哋，所以今次叫雞白湯鮮松露soba ! 個湯好濃稠！加埋松露油，好香好好味，上次我又買佢嗰支黑松露油，今次因為行李有限，所以冇買到，我覺得今次呢個好食過上次個特製soba 😅

食完飯好攰，返酒店浸吓溫泉先！♨️

酒店住後感：
八重洲中央頂級超級酒店 Super hotel Premier 
今日入住東京站的這家酒店，位置很方便，可以由東京八重洲近大丸出口路面，過條馬路，在Midtown tower 後面就係，亦都可以由東京駅一番街行去 Midtown tower 地庫上一層出路面，後門一出去就係！

一入酒店左面係餐廳，右面係reception，職員好有禮貌，所有職員都會同你greeting，朝早放低行李嘅時候，佢都問我會幾點鐘返嚟check-in，佢話如果三點後的話，會將我行李放入房，如果早過三點的話，就叫我去接待處同佢哋講，所以佢都俾咗密碼我先，因為呢間酒店係唔使用匙卡，係用密碼輸入門鎖開門的！同時比埋浴場密碼我！所以晚上返嚟可以上房，不過先在電梯旁取牙刷，佢有入浴劑、潔膚護膚品和刮鬍刀，但沒有梳，而且有枕頭可以揀，我未知房入面枕頭點樣，所以冇揀枕頭！
今次同尋日一樣又係住八樓，一入房有小小空間放鞋和行李，房間的空間比預期大，因為市區酒店通常都係比較細，佢竟然有一張長長嘅書枱，另外雪櫃上面亦有個枱面可以放野，地方都幾新淨！

放低野之後，去3/F浴場浸吓先，女湯呢邊叫做有兩個池，一個大一個細，細嘅只可以坐兩個人，大嘅就可以坐到大概八個人，今晚唔係好多人，我入去嘅時候有三個人，我走嘅時候得返一個，不過跟住又有幾個入咗嚟，兩個池分別細池係碳酸水，大池係八重櫻，不過浴場原來冇毛巾！要在房帶出來！浸完個人舒服D ，跟住返房舒舒服服瞓返覺 😌😴