2023年5月東京7天遊 Day 6 - 橫濱、中目黑、築地、銀座

今次旅程考慮左去唔去睇高達，知道佢會做到三月，所以都想去睇吓，本來對高達興趣不大，不過上次同好友去九州睇完，又覺得可以一睇！而且呢個係期間限定，更加值得睇，行程去到第六日，就去睇吓！

上年去東京時，都有去橫濱，主要去中華街睇吓，因為横濵呢個地方都幾大，之前去過兩三次，有一次去櫻木町果邊，有一次就去紅倉庫果邊，今次去高達呢邊，係未去過，要由中華街出口行過去，去中華街出口要行幾遠，如果有山下公園出口過去會應該近D，不過諗住去中華街睇吓先！去到中華街，見到有胡椒餅賣，又買嚟試吓！🚁🚁🚁🚁🚁😅！唔好食！完全唔係果回事！🫣 食完胡椒餅就去地鐵口果間 Doutor 飲杯咖啡！今日陽光普照，有小小熱，飲杯凍咖啡先！

跟住行去山下公園，穿過公園就可以行去高達嗰邊，離遠見到冇乜人，行到埋去見到原來今日休館🤦🏻‍♀️，唔怪得冇乜人🥺 唔記得上網check一check先，唯有喺出面影多幾張相！😔

行返去山下公園嗰邊，見到有隻船，叫做冰川丸，可以上去參觀，既然睇唔到高達就上船參觀下，上到船先至買飛，入場費300円，我諗呢個係一架好舊嘅船，入邊啲格局好友鐵達尼feel，保留左一D餐廳同房間嘅擺設，仲有介紹隻船嘅歷史圖片，都睇咗成個鐘！落船之後見到山下公園好多花好靚！🌹🪻🌷🌻🌺🌼🌸 咁就梗係要狂影相😍

影完一輪相，搭講港未來線去橫濱站轉東急東橫線，過去中目黑，專誠去Starbucks Reserve Roastery ，雖然佢都開咗幾年，疫情前已經有，但我從來未去過，今次特登過去睇吓，由中目黑站出嚟，就見到有一間賣冬甩嘅店好多人排隊，由店嘅後面沿住條河一路行，由中目黑站行過去慢慢行，大約15至20分鐘就到！旁邊竟然有間Donki ！ 去到Starbucks門口，當然好多人喺度影相啦！我入到去喺地面嗰層都影咗好多相，然後買杯咖啡同買個包，落完單佢會俾個感應器你，佢響嘅時候你就可以埋去攞嘢食，等緊嗰陣見到佢仲有樓上，上一層係賣茶嘅地方，佢仲有部機喺度整抹茶，睇咗一陣落返去等嘢食，樓下非常之full，咁啱吧枱位有人走，我坐咗一個位，旁邊個位見到有個背囊，但係唔見人，可能去咗買嘢食，我攞完嘢食之後就坐低喺度影相，跟住旁邊背囊嘅主人返嚟，原來係一位外籍嘅女士，佢見我喺度影相就主動幫我影，跟住就同我傾偈，佢都係一個人，佢由澳洲過嚟日本旅行，佢話本來有朋友一齊嚟，但係佢朋友病咗，所以佢自己嚟，佢話佢同我一樣係第六日在東京，佢明天會搭火車去京都，而我明天就會搭飛機返香港 😂 閒聊左幾句之後，本來都想話問吓佢會唔會一齊去其他行程，不過見佢聽日都走就算喇 😅 跟住再上樓上睇吓， 3樓有個酒吧， 4樓有個露天茶座，早知上嚟樓上先至慢慢買，不過一個人都係難搞D！行完成間店，就落返樓下買嘢，買咗咖啡豆同埋少少野，咖啡豆可以幫你即場磨咗佢！

離開Starbucks之後，去返中目黑站搭銀座線去築地，未試過黃昏時間去築地，去到真係靜晒，基本上所有商店都關咗門，剩返有晚市嘅壽司店，但係呢啲壽司店都唔少客，我又去返鮨國！店入面都有幾枱客，當然係唔使等位啦，今次唔食海膽飯叫咗個海膽海鮮飯，有海膽之餘，亦都有牡丹蝦同其他海鮮，水準都保持到，當然唔少得要叫我最鍾意食嘅清酒煮蜆！仍然係非常之大隻！👍🏻👍🏻👍🏻

食飽之後行去銀座買D野，再搭車返東京站！由地下街行去Midtown 地庫，發現上次想去的壽司店根室花まる在這𥚃有分店，但我已經食飽了，見佢開10:00am ，一於聽朝過嚟食完先去搭火車去機場！