屍殺半島 (IMAX) Peninsula

 

喪屍迅速蔓延至全國，正錫是軍人，他帶同姐姐、姐夫、姨甥一同前往碼頭，一家乘船離開韓國，前往日本，在船上，將軍突然改變地點轉去香港，中途有一個市民原來已經中咗喪屍毒，在船艙裏病發，咬傷了多人，包括正錫的姨甥，正錫的姐姐抱着他不願意離開，正錫唯有放棄拯救姐姐，離開船艙並鎖緊門口，姐夫剛回來看見這一幕，透過門上的玻璃，看着自己的妻兒死去，而正錫和姐夫便留在香港生活，四年後，有人想找一些韓國難民，返回韓國盜取金錢，早前有一批人已找到金錢，只係冇命回來，今次他們只需要找到該批金錢，並利用衛星電話通知船隻來接他們，便可以分到一半金錢，他們在香港的生活並不如意，所以希望搏一搏......！

好期待睇呢套戲，因為之前睇死殺列車已經覺得好睇，呢一集係佢嘅延續篇，本來我哋係7月15號睇，套戲原定係7月15號上畫，但因為第三波疫情爆發，同埋限聚令，剛剛好在7月15號開始，戲院便關門，今日亦都係戲院第一日開返，雖然每日都有雙位數字確診，但係都開返晚飯夜市，開返戲院同美容院，始終好多人冇工開真係好慘，希望大家可以捱得過，講返套戲，成套戲可以講係冇乜點冷場，全程都係追車，打喪屍，睇到都好緊張！不過喪屍空群而出嘅場面，冇上一集咁震撼，今集多咗講人性、親情，喪屍病毒就好似而家啲病毒咁，傳得好快，保住條命比金錢重要！

今晚睇戲之前，我哋去咗食飯，今日開始有返晚市堂食，原本想去食台灣嘢，但係爆曬場冇位！最後去咗名代宇奈奈食鰻魚飯，食到八點幾，仲有成個鐘頭先入場，商場有冇嘢行，所以我哋喺戲院睇 trailer 消磨下時間😆😆 戲院都為咗保持社交距離，每兩個位嘅前後左右兩個位都唔可以坐，我哋三個人，所以分開咗坐，而且戲院唔俾飲食，所以大家水都唔飲，最主要係唔想除低個口罩，盡量小心D！始終疫情仲未過，疫苗又仲未有！

Kactus Koffee

早前睇雜誌，介紹咗深水埗區有幾間文清咖啡店，有幾間嘅位置都在深水埗同太子之間，今日要去深水埗，但唔想去到太子果邊咁遠，所以揀咗最近深水埗果間試下，這間小店在海壇街，呢條街大部份都係車行五金之類嘅店，斜對面有幾座新樓起緊，果幾座樓應該叫做愛海頌，呢間咖啡店樓上係酒店，咖啡店同酒店係同名，咖啡店嘅面積係非常之細，所以佢用埋店外則邊條橫巷做室外位，而呢條橫巷有一幅牆係畫左畫，令到佢有返D特色，而呢幅畫下面亦都有幾個座位，不過呢幾個座位嘅下面其實係坑渠，都幾難坐喺上面，就算坐對面果行位，對住條坑渠感覺都唔係咁好，加上天氣熱冇冷氣，所以出邊都冇人坐，門外面亦都有兩張高櫈，我去到嘅時候成間咖啡店都滿座，入面只有12個位，入口位置已經有人坐喺度等緊位，所以我就坐出面，呢度食物嘅選擇好少，只有多士同埋沙律，我揀咗一份雞蛋牛油果多士，同埋一杯凍嘅 Iced Triple Dolce Latte ，因為驚住坐出邊好熱，不過今日唔係好熱，頭先由地鐵站行過嚟我都冇出汗，買完之後坐喺出邊等，等緊嘅時候見到有人走，頭先等緊位果兩就坐咗入去，跟住再有兩個人走，我就啱啱好可以入去坐，我入去坐低左D嘢食都未有，因為我嚟嘅時候只有一個店員，後來再有兩個店員返來，咁就快手左，坐低咗之後嘅期間，一路都keep住有客嚟，有D都係坐出邊，可能係想食煙，亦都有人在室內等，我見好多人好似坐咗好耐，始終coffee shop 嘅人客都係慢慢坐，所以我咁快有位都算好彩！我係返緊工食 lunch 所以唔坐得耐，個多士味道一般，睇個樣都可以想像到味道係點，只係個麵包嘅皮比較硬，而佢哋提供嘅係即棄膠刀叉🍴，所以好難切得到舊麵包，至於咖啡就幾好味，而且都幾濃幾好飲，飲完即刻有D後悔，驚今晚瞓唔着 🤦🏻‍♀️

 

DPD 大牌檔

星期六條街好多人，雖然每日確診都係雙位數字，不過個走勢好似減少緊，都係30宗左右，學政府話齋，好多人都有抗疫疲勞，始終抗疫左成七、八個月，不過見出街嘅人少咗帶小朋友，可能限聚令始終都係兩個人，一家幾口出嚟都唔方便食飯，不過午餐同下午茶嘅時間真係多咗好多人，我諗而家D人聚會改晒午餐啩🤷🏻‍♀️

今日出去旺角，去咗呢間新開冇幾耐嘅食肆，見到都係爆晒場，不過好彩有一個面壁位，印象中呢間餐廳前身係翠華，唔好肯定係咪，店入面嘅地方唔算好大，門口有幾個面壁吧枱位，啱啱好有一個位，我就可以唔使等位，後面兩位果D就要稍等一等，見到D人都好快食完就走，所以都唔駛等好耐，頭先喺門口已經睇咗餐牌，食物都幾多元化，有中式、西式、三文治小食、全日早餐，甚至素食，不過每類選擇唔係好多，我就試一試佢個海南雞飯，跟餐有一個湯，包一杯飲品，咖啡就要加錢，亦都有少少甜品蛋糕🍰，原本想試吓佢個拿破崙，不過店員話我已經賣晒，所以叫咗雙層芝士蛋糕，先食咗個飯先，食物嘅賣相都好吸引，呢個海南雞嘅雞都整得幾靚，而且啖啖肉，佢個油飯冇咁油膩，都幾好食，好多時食海南雞飯，跟飯果三個醬都好重要，試過好多間個雞做得唔錯，但係個醬有味精，呢度個醬就冇呢個問題，個例湯煲到有D溶溶地，可能係賣剩最後果D，所以好溶，不過都幾好飲，不過就冇乜湯渣俾你，食完飯就上埋個甜品， Cheese cake 嘅味道都幾清新，雖然係兩款芝士，但係唔會好Heavy，而且佢比一般蛋糕細件，應該話好似一件西餅咁上下，不過我覺得都夠食，大件D就會太漏，整體來講呢度D食物嘅質素唔錯，價錢合理，店員服務態度亦都好好，下次可以再嚟幫襯！👍🏻

Jo Malone x Zara 香水

 

頭先在LCX食完午餐，就去海港城果邊行吓，去咗Zara 行咗一陣，見到人頭湧湧，諗起佢同名牌香水聯乘 英國 Jo Malone 出咗一系列嘅香水，之前想上網買，但係單試唔到個香味，而家就可以試吓喇，佢一共出咗八種香味：

VETIVER PAMPLEMOUSSE

葡萄柚、柑橘、香根草

WATER LILY TEA DRESS

佛手柑、薄荷、麝香

EBONY WOOD

胡椒子、丁香、黑檀木

AMALFI SUNRAY

香檸檬、柑橘、橙花

TUBEREUSE NOIR

依蘭、晚香玉、檀香

FLEUR D’ORANGER

牡丹、廣藿香、癒創木

FLEUR DE PATCHOULI

橙花、橙花油、依蘭依蘭

BOHEMIAN BLUEBELLS

薰衣草、檀香、麝香

現場有兩款已經賣晒，剩返六個選擇，其實可以試完之後上網買，不過如果而家睇啱就唔使再上網買，佢個價錢都好實惠，細支裝40ml 賣 $199 ，大支裝100 ml 賣 $299 ，雖然100 ml 係抵買好多，不過我都係買咗兩支細嘅，試晒八種香味，個人比較喜歡2號，其次就係5號同6號，之後就係1號，不過2號同5號已經賣晒，所以只係買咗1號同6號兩款，同朋友WhatsApp 傾計嘅時候，朋友話訂咗一隻同一品牌 Jo Malone 嘅限量櫻花香味，我叫佢都幫我買一支，反正冇咁快有，可以用住依家新買果兩支先，之前朋友送咗一支Tiffany 嘅香水俾我，我覺得個味道都唔錯，不過已經用晒喇，所以就趁今次佢做聯乘就買，因為呢個牌子一向都係賣得比較貴，不過佢嘅香味較清香，所以好多女士都鍾意呢個牌子，今次就親佢平平哋買來用下！店員話已經返咗三次貨，不過之後買一段時間就唔會再出，所以有興趣真係要快D買！

奇納百川

今日出去尖沙咀，商場出奇地多人，好似疫情已經過咗咁，十足十疫情之前嘅星期六日，本來想去海運大廈食啲嘢，連平時冇人嘅度小月都要等位，在LCX 行返過去海港城果邊，突然間見到呢一間新開嘅韓國餐廳，門口有個餐牌，呢度主要係食韓國菜，那些食物嘅選擇都唔算好多，主要係有D定食套餐、炸雞、卷物、疏乎厘 pancake，仲有D西式小小嘅漢堡包、三文治等等，我叫咗一個韓國辣炸雞伴鐵板芝士醬，另外叫咗杯梳打，個鐵板芝士好快就凍咗，所以D芝士就硬身咗D，炸雞嘅雞肉唔係好滑，不過味道就唔錯，炸雞都幾辣，而且偏鹹咗少少，炸雞嘅件頭都係比較細，一碟大概係有六七件，原先想試吓佢哋嘅疏乎厘 pancake，不過我覺得價錢都係偏貴，如果叫埋甜品，應該埋單都要$500以上！雖然佢價錢都唔算平，不過都好爆場，可能而家冇晚市，大家都爭取時間，出嚟午餐或者下午茶！

麵屋福

疫情仍然持續，都唔敢去太多地方，近期午餐都係主要去兩、三間食肆食嘢，今日去試吓呢間拉麵店，上次食果間團拉麵就淨係做湯麵，呢間就淨係做沾麵，店入面嘅位置大概20個位左右，今日去到一個客都冇，睇睇個餐牌，只有三款Jimmy，其實係三個唔同嘅湯，有魚介豚骨、黑蒜油豚骨、蕃茄紅油、其餘嘅都係配料同埋飲品，叫咗個番茄紅又沾麵試吓，湯頭幾甜，唔會油膩，而且味道比較濃，始終沾麵嘅湯都係要濃D，其實食完可以叫店員加湯落去，整淡D先至飲嘅湯，不過飲咗好多水同埋飲品，所以唔飲湯喇！

 

古早味蛋糕

呢半個月整第四次古早味蛋糕，因為之前果三次都唔滿意，亦都可以話係失敗，綜合三次失敗嘅經驗，我覺得主要係個油溫嘅控制出咗問題，之前參考過好多個食譜，個油溫對比較高，最少都70至到88度，我覺得油溫太高令到雞蛋會熟咗，令到蛋漿有D一點點嘅深黃色，但係亦都試過等佢凍咗先至落蛋黃，降低油溫都有同樣嘅情況出現！因為我係轉用咗菜油同埋羅漢果糖，我相信呢兩個材料應該唔會有影響，好多食譜都係用橄欖油、植物油、牛油，因為唔想太Heavy，所以轉左用菜油同埋羅漢果糖，可能唔同嘅油，唔同嘅油溫亦都有影響，既然三次都失敗，我就100% 跟足原著食譜去做，即係用牛油同埋白砂糖去做，其實我諗糖只會影響個甜度，不過我咁岩用晒羅漢果糖，所以就用上白糖，今次亦都跟另一個食譜去做，份量大致上係相差無幾，今次跟 YouTube 入面嘅 Emojoie cuisine 食譜去做，我將佢個食譜份量減半：

古早蛋糕（六吋模）

雞蛋三隻🥚🥚🥚

麵粉 50g

牛油 50g🥛

牛奶 50g🧈

糖 50g

雲呢拿精油數滴

我通常先裁左牛油紙，放落個模度，然後量好所有食材嘅重量，準備好之後就開始做，首先雞蛋將蛋黃同蛋白分開，蛋白放喺大碗準備陣間要打發，蛋黃放在小碗待用，牛油加熱至溶化，溫度係50度，將牛油溶液倒落麵粉度，攪勻之後加牛奶，攪勻再加蛋黃，攪成蛋漿，然後去打蛋白，糖分開三次加落蛋白度，打到蛋白企身，就可以勻和蛋漿，咁就可以焗喇，用水浴法150度焗80分鐘，我諗溫度都係偏低咗D，因為我見好多食譜都係160至190度，果然出嚟個顏色係淡咗D，不過裏面就好鮮黃色同埋氣泡比較多, 都做到個效果，都滿意！😌

 

The Italian Club

上次食過意大利嘅 mozzarella 芝士之後，有D念念不忘，在網上見到呢間意大利餐廳，食材都係意大利嚟，所以去試吓，白布街呢邊好多食肆，只有Knockbox一間係要等位，旁邊意大利餐廳就只有兩個客，一心想嚟食 mozzarella ，不過佢比我個餐牌就只有一個午餐餐牌，一律$58包汽水，好明顯係一個求生餐牌，因為市道太過低迷，好多食肆都係掙扎求存，基本上D價錢做到好平，都只係希望生存到，佢嘅午餐分咗主要幾個種類，意粉、薄餅、漢堡同埋沙律，見到有 mozzarella 配蕃茄，淨係叫沙律又驚唔夠飽，所以最後都係叫咗個 mozzarella 薄餅我🍕，叫完都有D後悔，因為個芝士焗完個味唔同咗，因為比茄醬蓋過咗味道，而且芝士嘅份量好少！唯有搵日再嚟試過淨係芝士好唔好食啦！

 

團拉麵

尋日終於收到通知，檢測結果呈陰性，但係都唔能夠鬆一口氣，因為個結果只係話上次檢測之前冇事， 唔等於以後都冇事，加上疫情都未過，仍然要好小心，近期食飯都係集中去一、兩間食肆，今日就去試吓食其他嘢，去咗呢間拉麵店，入面一個客人都冇！店外面有一部自動販賣機，就好似日本嘅拉麵店咁，不過之前果間別天神都已經有，見到每款拉麵都只係$58 ，價錢就好平，拉麵嘅款式只有五款，全部都係湯麵，佢冇賣沾汁麵或者冷麵，我揀咗魚介湯麵，碗麵睇落幾大碗，配料好多，要撥開D配料先睇到有兩塊火炙日式叉燒，以價錢計真係抵食夾大碗，而且味道都唔錯！可以再去！👍🏻👍🏻👍🏻

 

手工粗幼意粉

 

上次整嘅闊條意粉效果唔錯，今日冇出街，所以又整意粉，今次將D意粉一半整幼身嘅意粉，另一半整粗身嘅闊條意粉，每樣一半，根據上次經驗，將個麵團調教到去三度，就薄身好多，不過個麵團幼身意粉麵條機嘅時候，好容易捲曲，可能太薄，所以試咗兩次先至滿意D，今次預多少少時間煮意粉，同埋先煮咗粗意粉先，今次煮左大約8分鐘就煮熟啦，最後果3分鐘先落幼意粉，今次同樣係茄汁🍅帶子，不過加咗D三色椒🌶，尋日用剩左唔好嘥！😆

煎三文魚

今日 WFH ！咁耐以嚟第一次！😝

開完視像會議之後，攞咗上次我在荔枝角攞芝士果陣時買嘅三文魚嚟煎，今朝一早由冰格放咗上上格解凍，舊魚解凍之後，顏色唔係咁靚，感覺唔係好新鮮！不過佢冇臭味，我諗應該冇問題，可能只係個質量唔係咁靚！

先落一D鹽、黑胡椒同埋檸檬汁，抹勻魚身，然後好似煎其他魚咁樣煎佢，剪出嚟個效果都唔錯，跟住炒咗D三色椒🌶一齊食，好味！影相果陣時覺得舊魚冇乜裝飾，所以切咗幾條檸檬皮落去，影完又覺得怪怪地，但係又冇一張相係冇檸檬皮.......所以就係咁樣🤣🤣

 

手工闊條意粉

疫情嚴重，放假宅在家裡，又玩手工意粉，瞓醒覺先做古早蛋糕，但失敗了🤦🏻‍♀️，跟住就整意粉，上次整過一次，有咗經驗之後，今次就覺得容易好多，上次個份量整得太多，今次整少D，一人份量，只係用咗100g 麵粉，加一隻雞蛋就搞掂，搓完一輪麵粉，搓到麵團光滑之後，用保鮮紙包住佢，閒置20分鐘，跟住放去麵條機搞之前，多灑一些麵粉在表面，用最厚的 0度轆幾次，轆薄左舊麵團先，然後先教去1度，等佢薄D，跟住先轆過切條器，今次整闊條麵，出嚟嘅效果都唔錯，不過我整得太過厚身，應該起碼要3-4度嘅厚度，因為佢太厚，用水煮嘅時間長咗，我一邊爐煎蕃茄🍅，另一邊爐煮意粉，蕃茄煮好佢都未得，大概煮左10幾分鐘先至熟！😅跟住就加落蕃茄度兜勻佢，咁就食得喇！😄