上星期放完飛機，今星期又去，今次去元朗南生圍，南生圍聽得多，今次真係第一次去，呢度真係好偏辟，如果冇車真係要行好遠路，我地跟 Google 揾，中間都有兩次行錯路，兜左個大圈！ 由於車程耐左，一到步，第一時間搵廁所！行南生圍路入去，呢條路係單程路，中間有D避車處，沿途冇乜車，只係需要避車一次，呢條路好長，中間有D士多、農場，同埋擺左好多共享單車！我地要搵廁所，所以去左一間士多幫襯先！士多老闆正在拆緊架共享單車！我地先去廁所，士多個廁所好簡陋，亦冇冲水設備，只有條水喉，不過都ok 乾淨！去完廁所，食返碗山水豆腐花！今日天氣好熱，整碗凍豆腐花，好夠冰凍！望住個池/湖？有D風吹下，真係心礦神怡！
食完豆腐花，再駛入D，去到馬路盡頭，呢度有條仙貝河，睇 Google 地圖話呢度叫做南生圍基圍遺址，見有個牌寫住全港唯一橫水渡碼頭，話行七分鐘就到，唔知係咪上星期比人縱火既橫水渡呢？跟住指示行，見到一個橫水渡碼頭，冇縱火痕跡！旁邊有個牌，寫住婚紗橋，唔知係咪因為好多人在此影婚紗相而得名？不過水中又有架單車！再行入D，只有樹同一地共享單車 (*´-`)！太多樹唔太適合放飛機！行返轉頭，離遠見到有人在一間屋頂放飛機！似乎係呢度唯一可以放飛機位置！
我地駛返出去，因為頭先經過一處空地，泊左幾架車，見到有人攪緊D飛機，好大型，非航拍果種搖控飛機，我地又泊架車响呢度，見到呢個空地都幾大，見到有人玩賽機，飛得好快！我地行埋一邊，搵個樹蔭位，坐低玩航拍！見旁邊人地玩搖控直升機，都幾大架，不過見佢低飛，可能唔可以飛太高！等人地架直升機飛完，我地先至起飛，今日有D天陰，仲幾大風，部機不停出 warning 話太大風，有時又話冇 signal ，影片都有小小窒！
影片拍出來都唔太理想，天氣唔好，加上訊號弱，原本想飛埋D影錦綉花園，但訊號弱，要飛返轉頭，所以都係影左D河景同埋附近水田，好快影晒三舊電！又要走喇！我地出返元朗市中心，都有幾年冇去元朗，先去食返串元朗燒賣皇后-妙舒，好友未食過，買左一串五粒 share 食，跟住去茶餐廳食個 lunch ，然後就出返去九龍，好友車我出去尖沙咀，佢就自己返過海！我去 iSquare 買定戲飛，月尾同好友們睇復仇者聯盟3！
沒有留言:
發佈留言