今朝早餐又係酒店食自助餐，真係食到怕！每次我都只係食多士同埋蛋，好友就食好多野，腸仔、煙肉、炒蛋，仲有牛奶粟米片，食完早餐又出發喇！
第一站去凱旋門！上次來凱旋門，佢做緊維修，有一部份遮住咗，今次已經維修好，而且接近7月14日國慶，凱旋門中間加左一幅國旗，隨風飄揚，我地經過香榭麗舍大道，領隊講笑話要向LV總部朝拜！落咗車之後，領隊帶我地去凱旋門斜對面影相！竟然唔可以直接去凱旋門影！上次唔單止可以去凱旋門影，仲可以在香榭麗舍大道行一陣，我地當然失望啦！原先諗住在馬路中間影凱旋門的正面，難得今朝早冇乜人，不過依家冇辦法啦！
去完凱旋門，去左軍事博物館出面的草地，只有在草地遠眺博物館同埋大皇宮，同埋在草地上坐下、影下相就走！跟住去羅浮宮喇！
其實呢個幾個景點都係在附近，所以車程都好快，去到羅浮宮，先經過地面的玻璃金字塔，但係領隊話暫時唔好影相，因為又約咗Linda做導遊，先去咗圓形雲石枱集合，上次都係呢度集合，集合左之後匆匆忙忙要趕入場，今日唔算多人，基本上冇排隊，都有先叫我地去咗洗手間，因為佢話呢個皇宮，以前係冇洗手間的，後來在門口附近加建了，所以要先在入口附近去洗手間，才開始入內參觀，裏面再沒有洗手間了，Linda話羅浮宮有三寶，第一當然係蒙羅麗莎的微笑啦，第二就係維納斯女神像，第三就係勝利女神像，印象中好似冇睇過勝利女神，因為見到的時候覺得好陌生，而且平時好少見到呢個神像，這個古希臘雕塑沒有了頭部，只有身體和一雙翅膀，Linda講解的時候都好投入，佢形容神像身上的衣服，雕刻得像薄紗，清楚展現她的身形，能雕刻出像布質一樣的質感，令人嘆為觀止！而維納斯女神之前已經看過，加上經常在很多地方都見到他的蹤影，知名度不遜於蒙羅麗莎，至於蒙羅麗莎畫像，當然是最受歡迎的一件藝術品啦！一樣圍滿好多人，個個影呀影！今次見到畫像兩旁冇咗警告牌，之前有警告牌提示人小心扒手，依家冇咗！而在蒙羅麗莎畫像對面，是一幅很大的畫"迦拿的婚禮"，Linda話全館最大同最細的畫都在這𥚃，蒙羅麗莎實在太細幅，應該話實在放得太遠，根本無法欣賞，而迦拿的婚禮雖然不可以近看，起碼佢夠大幅，點都睇到D！除咗睇呢三件主要作品，當然亦都有睇其他作品啦，只係有D睇完唔係好記得個名，而我最喜歡就是拿破崙的加冕圖，這幅畫好大幅而且畫工很精細，拿破崙和他的妻子身上披上了紅色袍，那件紅色袍畫得栩栩如生，就像真的有一塊絨布在畫上！畫中拿破崙的母親坐在包廂的中央，其實她當時根本沒有出席，只是畫家加上去的，當然畫家亦有將自己畫進這幅畫內！我講到好似好熟悉，其實都係聽導遊講嘅！(^O^)
睇完羅浮宮出返來，去返玻璃金字塔影相，匆匆忙忙影完就要即刻走，先去午餐先，今餐又係中菜，正呀！間中菜館又係港人開的，全部廣東話對話，又有湯飲，都係食中餐最開心！餐廳入面有好多泰國人同埋韓國人嘅遊客，睇來亞洲人都係比較喜歡吃中餐！
下一站去協和廣場，呢個廣場就係路易十六和瑪麗皇后被處決的地方，如今當然只係一個廣場，上次來的時候呢度拍咗好多靚車，可以有啲名車出租，今次反而乜嘢都冇，因為呢個廣場只有一個古埃及的方尖碑，當然好快影完啦，影完之後個個團友都在一家小店外聚集，而且好多都買到souvenir ！
買完野又上返車繼續下一個行程，今次D行程都比較趕，到shopping的地點就會有多D時間，跟住就係去百貨公司，去最著名的老佛爺及春天百貨，領隊話兩間百貨公司買的東西都差不多，價錢也一樣，但係佢叫我地儘量去春天百貨買，因為佢話佢地公司會將D退稅單帶返香港公司，然後等下一團去法國時，人手交返退稅單去春天百貨，咁就唔使怕在機場寄會寄失啦！所以佢帶我地去咗春天百貨，加埋我地邊度退稅，然後先放我地自由活動，我地都行一行，去到化妝品果層，見到有用開的 Bobbi Brown，睇下個價錢，計一計數，大約平過香港¼！咁就買少少啦，三個人加埋買咗二百幾歐羅，就可以退稅啦！買完化妝品又去家品舖行吓，當然睇下 LC乜嘢價錢！見到個40 cm的鑄鐵鍋，好大個呢！見到D價錢比香港略為貴左少少，退左稅應該平少少，價錢差少少就無謂拎喇！雖然個喼大把位，但係佢D款唔係特別靚，都係留返去日本先買！睇完野又去food court 望下，啲食物好吸引，好友又話肚餓，其實食完飯冇幾耐都係一個鐘左右，我仲未肚餓，所以叫佢哋買比自己食，再經過超市的海鮮檔，見到有生蠔，只係€18至€23就有一打法國生蠔！都算好平，不過好友話食一兩隻，咁我一個人點食10隻8隻呢？所以都冇買到，跟住見到有個肉櫃，D斧頭扒好似好正，揀完一輪先發覺佢地只係賣，係唔會幫你煮！所以得個睇字！見到啲生果都好靚，不過見到其他人都係影相多過買，有D攞起車厘子影相，比店員阻止，佢地唔係開口阻止，而係俾個紙袋你叫你袋起計錢，唔係買嗰D當然即刻放低啦！我地就咁影冇掂到D生果，所以冇俾人阻止。好友原本想買鵝肝醬，但係價錢唔係太抵，最後都冇買！
買完外賣食物要搵地方坐低食！我地行到去聖母歌劇院，呢座建築好靚，門口有一排長闊的樓梯，好多人坐咗係樓梯，我地都坐埋一份，在歌劇院的斜對面是著名的The Grand hotel，頭先坐車經過的時候，領隊話呢間酒店好多名人住過，而樓下果間餐廳都好出名，我地坐樓梯食完野，仲有時間又冇乜地方好去，於是決定去酒店樓下間餐廳飲杯野，去到無位，不過等左一陣就有位喇！我叫左一杯凍的macchiato ，好友叫了兩杯凍朱古力，侍應送來的時候，我杯凍飲竟然有兩包糖！摸下個杯，係凍的，唔知點解要比糖我，而好友果兩杯朱古力雖然冇冰，但係有飲管同埋忌廉，點知杯朱古力係熱的！好友仲飲咗啖，差D淥熟條脷！真係整蠱！不過坐响度飲嘢又真係幾舒服！飲完野差唔多時間要返去集合啦！跟住要去食晚餐！
今晚的晚餐係自費的，個團安排左自費海鮮餐，成個團得我地三個冇參與，因為我上次跟團參加過自費海鮮餐，結果係好失望，唔係話唔好食，而係唔值果個價錢，因為收費要成五百幾一位，淨係聽到有麵包蟹已經覺得唔得！因為三個人加埋都要千五元，自己出去食嘢一定唔使咁貴，所以我哋自己去咗第二度食，行返去春天百貨附近，見到有間outlet ，好友又想去行，但係我地得個半鐘，行前D見到有間意大利餐廳，就決定呢度食，一坐低叫左野，好又話去outlet望一望，我地叫咗三文魚闊條麵、牛扒、果汁，因為大家都唔係太餓，佢地都好快買咗一對鞋，意大利做千零蚊都算好抵！食完飯行返去集合點，又見到有D餐廳幾特別，又過去望下，行下行下，見到我上次食海鮮餐果間餐廳，竟然發現團友在餐廳內！原來上次同今次都係同一間餐廳，好彩我地冇參與自費海鮮餐，如果唔係又中招！聽返D團友講佢地都唔係太滿意！
食完飯仲有自費活動，就係去紅磨坊睇表演，成團又係得我地三個冇參與，因為收費實在太貴，每人要€150，三個人加埋要成港紙4千幾！只係包一杯飲品，覺得唔係好值，所以我地同領隊先返酒店，睇完表演會有另外一架車接佢地返酒店，我地情願早D返去休息！
沒有留言:
發佈留言