今日要離開法國喇！時間過得真係好快！早餐又係酒店食，同樣蛋和麵包，今日要坐火車去英國，乘坐歐洲之星，一早8:00到左火車站，拖住行李去排隊，領隊取了團體車票後，一同過海關，英國的海關一向比較嚴格，但係偏偏最多恐襲！我見有個人行李中有個唔知係木定金屬公仔，俾海關檢查左好耐，雖然已經過咗X光機，佢哋好似想拆開佢個公仔咁！我過咗關所以冇再睇之後點，過完關之後有個細細地等候區，喺果度等火車，見到前邊有D Shop，見仲有一個鐘，諗住去行吓，行埋去睇下原來就係得嗰兩間舖！冇野行唯有繼續坐低等，各自上網消磨下時間，仲有15分鐘就行埋去入口排隊，好似排隊登機咁，一有人排隊就全部人都去排，領隊派左車飛俾我哋，車飛係電子飛咁，我地當然坐埋一齊，不過等等下覺得唔對路，夠鐘都未入得，領隊話 delay 左，要等多半個鐘，原來我地要搭果架火車壞咗！臨時抽左一架舊車來頂替！換過另一張車飛，好似飛機登機證咁，好簡單！等多半個鐘終於可以入去啦，要落一層，有樓梯或者斜路，而斜路係好似扶手電梯咁，自動行的，但係因為佢係斜的，個喼想碌落去，要自己拉實！去到月台見到火車都好舊下！隔離月台果架就好新，上到車，行李擺放的位置好細，好彩領隊一馬當先，將我地D喼塞晒上行李架，用盡每一個位置，先剛剛好上晒我地D行李！D座位就好似卡位咁四個位面對面坐，中間隔左一張枱，好逼夾！領隊本來坐我隔離，但係同好友的男友打對面坐，兩個都比較高大，對腳都頂住，於是佢自己走咗去其他車卡坐，咁我可以一個人坐兩個位喇！拉起個手柄，我就打橫瞓了！一上車瞓到落車，足足兩個小時，都幾好瞓！( ◠‿◠ )
好快就去到英國，落咗車沿着月台行去出口，基本上係由車頭行到車尾，見到個月台上面有個鐘，熟口熟面！正正係經常在電影見到的英國火車站！一出火車站就有旅遊巴士接我地喇！架車基本上同之前果架一樣，其實我地跟團去到任何景點，都係見到呢D咁大架的旅遊巴士，第一站去食lunch ，領隊話去新醉瓊樓，當然唔係香港嗰間啦，只係同名，食中餐就當然係唐人街啦，一去到酒樓，就認得上次都係食呢間，上次係食小菜，今次就食點心，係配給點心，點為之配給呢？就係每人一粒燒賣、一粒蝦餃、一隻鳳爪、一個叉燒包同埋一條春卷！另外仲有乾炒牛河同埋肉絲炒麵，我記得上次食完飯在附近行咗一陣，今次當然照板煮碗啦！既然配給已經食完，嗱嗱聲走出去行一個圈，一行出去就見到Lego專門店，好友開心到不得了，立即衝埋去睇，門口有一個大大個的Lego 倫敦大笨鐘，又有英國電話亭，同埋火車，火車上有御林軍，要排隊先可以埋去影相，D職員會幫你影合照，條隊都好短，好快可以影到，好友睇中左一盒塔橋 Lego，約港幣＄1300，佢話香港大約賣＄2000！不過個盒真係好大，佢哋話考慮下先，因為之後佢地會再 stay behind ，睇完Lego行出去望左一陣就走，去返酒樓搵領隊，領隊話俾多少少時間我哋，又行多半個鐘，在唐人街竟然見到有個英國人拿着一個用報紙包住的榴槤影相，我地對佢讚好！因為我地都好想食！
食完飯上返車，多左個人，係英國當地導遊，正正係上次我來英國時，同一個導遊！這位80後（80歲後 ◠‿◠ )的女士，名叫 Chris，佢好多野講，少少串又少少攪笑，所以記得佢，佢叫我地，千祈唔好隨便做好人，你去幫人，分分鐘比人打荷包！要小心扒手！第一站先去大"拎"博物館，大英博物館之所以叫做大"拎"博物館，係因為裡面好多展品都係拎人地既 ( ◠‿◠ )，意思係好多展品都係屬於其他國家的，好似一D古埃及的石雕、木乃伊，仲有D中國古董，好似鎮館之寶的 Rosseta stone，上面雕刻左好多古文，導遊都攞住本書同埋圖講解，一來唔想企響石前面講阻住人地，二來舊石在玻璃箱內反光睇唔清楚，所以先講解後影相，睇完呢舊石，仲有人頭鳥獸身石雕，最大嗰一對曾經因為入唔到博物館，而將佢分割開，導遊話好似好可惜，但係其實有目的，就係唔想將佢交還，所以寧願割爛佢之後，再修補返！另外仲有希臘神殿的部分石雕，導遊話如果去希臘睇神殿，入面都冇野睇，得返幾條柱，因為入邊的石雕，大部份都响呢度！我未去過希臘，所以唔知係唔係！雖然好多石雕都爛左，都睇得出以當年來說，確實是精雕細琢！今日本來都想去睇中國館，但係依家休館翻新，所以暫時冇得睇！睇完石雕就去睇木乃伊，呢度D木乃伊都幾多，仲有D係冇打開，或者冇拆開，導遊話以前有D掘到木乃伊的人都死於非命，其實以科學角度睇，D木乃伊收埋咗咁多年，一旦拆開，可能有D化學物質同埋細菌，會因此感染到人，才會引起死於非命之說，佢仲話有D木乃伊冇打開，都係因為尊重死者，唔係怕有乜野事發生，而果D冇打開的木乃伊，考古學家都透過X光掃描，睇到木乃伊的內部，我都覺得唔打開仲好，始終接觸咗空氣，都會氧化，亦都無謂搞人！除咗人的木乃伊，當然還有貓啦！因為貓木乃伊之前來過香港，所以見到都有印象！
睇完埃及文物，仲睇咗D畫，好快都離開博物館，上返車之後，就去倫敦橋，之前也來過，一直好多人誤會左塔橋係倫敦橋，其實地標果條係塔橋，反而倫敦橋只係塔橋對面，一條普通的橋，上個月呢度發生過恐襲，有D團友冇落車影相！我地就唔太驚，覺得同一地方好細機會再恐襲，而且該死唔使病，好多野整定，避都避唔到！我地落車影相，見有車仔檔賣焦糖花生 £2一杯，又買杯試試，車上團友又想食，叫我地幫手買，好快影完買完上返車！
跟住去白金漢宮，導遊話白金漢宮的屋頂有支國旗，如果女皇不在皇宮，就會見到呢支國旗，如果女皇在宮中，就會收起支旗，導遊講笑話英女皇係佢契媽，今日契媽出左去，所以見到支國旗！影相時間只有15分鐘，剛開始影時，見到好多人跑去馬路邊，個個都笑笑口，導遊大聲話有祼體遊行！所以個個衝去睇，我地都睇下，原來係一班人祼體踩單車遊行，佢地有男有女，有D有著衫，有D真祼體！而且車隊好多人，我諗有幾百人，遊客都夾道拍片影相，好攪笑，有D遊行人士仲叫人幫佢地在白金漢宮前影相添，影完都夠鐘集合，跟住去西敏寺同大笨鐘！
15分鐘左右車程就到西敏寺對面！呢度有個金色郵筒，導遊話當年英國主辨奧運，為紀念英國取得金牌而油成金色的，我地在郵筒前，隔住馬路影西敏寺，然後行前小小有個草地，在草地可以遠眺大笨鐘，仲睇到小小倫敦眼！其實個草地有好幾個銅像圍住，都係一D名人銅像，例如甘地、孟德拉等等，不過導遊冇提到！
去完西敏寺之後，行程完結，今晚的晚餐自費，領隊送我地去返唐人街附近，比個半鐘我地食飯，呢度午餐時來，頭先在 Lego shop 果陣已經見到有間叫 Angus steakhouse 的餐廳，巴士剛好停在旁邊，我地在門口睇餐牌時，幾個團友都睇埋一份，見價錢都ok，成團有4組人都入去食！餐廳有兩層，我地坐地庫果層，地方頗大，餐牌有好幾款牛扒選擇，有D有份量選擇，大致上有8oz、10oz、12oz，亦有18oz的T bone，價錢 £17.5-27，即係話最貴都係二百七十港元，雖然店名叫 Angus ，但餐牌冇提過佢地係用安格斯牛，係唔係都冇所謂，最緊要好食！我地叫左招牌菜 Fillet steak 同埋 New York strip ，另外叫左 fish and chips 同沙侓！我地等野食到齊影下相，又自拍下，店員話幫我地影，又影埋佢自己入鏡，另一男店員又影埋一份，好攪笑！D牛扒好好味，到左歐洲咁多日，終於有餐好食的西餐！個 fish and chips 就一般，我地要叫多一件牛扒，真係覺得好抵食！加左個 Rump steak ，呢個冇之前兩個咁好食，真係食得好飽！
食完飯返酒店，旅遊巴經過 Oxford street，呢度係一條購物街，好多商店，又有百貨公司，導遊話呢度有13號巴士去我地間酒店，見車程都好近，我地梗係諗緊夜D出返來啦！返到酒店，今晚住 Danubius hotel Regents park ，間房唔算好大，都夠地方開晒D喼，放低晒行李之後，就出街啦，在酒店出面的大馬路，見到有巴士站，剛好有車埋站，上到巴士先發現原來唔可以入現金，只可以用當地的八達通 Oyster！！跟住個司機話車我哋去附近地鐵站買八達通，佢另外俾咗張紙我地，話我地可以俾返呢程車錢，其實巴士行前左一個站，就到咗地鐵站，入到地鐵站，原本想買單程車飛，去到自助購票機，睇睇個價錢，搭兩個站要 £4.9，而來回就要 £9.8，好貴呢！只係兩個站，而且個站好近，三個人要成＄300港幣，於是我哋決定買八達通去搭巴士，因為巴士只係 £1.5一程，而且好友會留在英國，又有親戚在英國，之後攞返按金都得，職員教我地買八達通，佢哋都係要比按金 £5再入€5， £10買張八達通，同香港差唔多價錢，跟住我地出返去搭巴士，見到有架113號巴士，都係去 Oxford street，但係呢格車的車費就貴D，要£3.5，可能好似香港D過海巴士咁，剛剛開車的車站都係最貴收費，過咗海之後就分段收費都唔定，既然已經上咗車都冇辦法，去到 Oxford street，好多鋪頭都收咗啦！我哋沿路行都冇乜嘢好睇，行過有啲酒吧都想入去飲吓嘢，不過見佢地好嘈，所以冇去到，最後冇乜野睇就諗住走，走的時候搵唔到13號巴士站，因為來的時候，見坐車都好快到，所以決定沿路行返去，不過行行下覺得唔對路，好似行咗好耐都未到，而且條路越行越黑，越來越少人，行到都有少少驚，我諗我地行左成大半個鐘，先去到酒店附近，行到身水身汗，好攰！返到酒店要快D瞓喇！
沒有留言:
發佈留言