今日要入宮！凡爾賽宮！例牌要排隊，不過團體隊算快，今次有當地導遊講解，而且有耳機，方便得多！導遊叫 Linda，講解很詳盡，對凡爾賽宮和路易十四加深了認識！這個皇宮確實富麗堂皇，瑪麗皇后的畫、路易十四的寢室、鏡廳，充滿好多藝術品，御花園亦非常之大，真係唔夠時間睇！
行完皇宮之後，領隊帶我地去買喼同包包，去了附近一家由香港人打理的商店，主要售賣的品牌有 Rimowa、Longchamp、Michael Kors，本身對名牌興趣不大，不過全團人都入咗去，就入去望下啦，我地望下D喼賣幾錢，發現售價比香港平好多！一個32吋銀色的 Rimowa 基本款，香港的售價大約要一萬多元，這𥚃賣700多元歐羅，退埋稅大約5000多港元！平左好多！這家店是最多團友幫襯的，大約有一半人都有買野！
買完野去食午餐，今餐又係中菜，餐廳在包包店附近，今餐有六個餸，好豐富！有雞、叉燒、麻婆豆腐、炒菜等等，六餸一湯白飯任裝，麻婆豆腐好送飯，加上食咗幾餐西餐，個個都好想食中菜，第一次要叫店員添飯，平時一盤飯剛好食晒，今次個個都食唔夠，我都扒左兩碗飯呢！食到好飽！
食飽飯去遊船河！坐船去遊塞納河，船公司叫做Bateaux Mouches ，領隊話呢間船公司做咗幾十年，所以個老闆好有錢，除咗遊覽船佢仲做埋餐廳船，不過領隊話有新競爭對手加入左，令呢間公司唔能夠做獨市，不過佢經營多年，當然有唔少相熟的旅行團帶客來坐啦！今日唔太多人，不過好曬，乘客上晒船之後仲有好多位，當然大家都會坐樓上啦，今日雖然曬不過好大風，所以唔算好熱，隻船沿住塞納河經過好多名勝古蹟，沿途有多種語言廣播，可惜中文只有國語，不過都有一張簡介，介紹兩岸嘅古蹟，會經過巴黎鐵塔、大皇宮、凱旋門、教堂、法院、酒店等，不過好多都唔係靠近旁邊，只能夠在船上遠眺，例如凱旋門雖然在附近，但係根本睇唔到，唯一睇得最清楚當然係巴黎鐵塔啦！因為佢夠高呀嘛！而且佢比較近岸邊，所以睇得特別清楚！仲有經過鎖橋，之前呢度有幾條橋都做咗鎖橋，但係因為D鎖太重，令到條橋負荷過重，政府要經常剪咗D鎖，而家索性唔俾人掛D鎖🔒上條橋度，所以條數鎖橋已經冇晒鎖，而在其中一條橋的兩邊，就加添左位置俾人掛鎖，因為掛鎖嘅位置係岸上，就唔會影響條橋啦！當然就失去左佢嘅特色啦！
游完船河，先返酒店，因為夜D仲有節目！就係上去巴黎鐵塔食晚飯喇！今晚入住 Mercure Paris Orly Rungis ，連續兩晚都會住呢間，終於唔使搬酒店啦！返到酒店放低行李，換件衫就出發喇！今次西歐之旅的另一個目的，就是求婚大行動！好友的男友一早已經和我溝通了，預備在巴黎鐵塔下向女友求婚，戒指一直由我保存，直至今天才交到他手上，知道晚飯之前，會在鐵塔下有少少時間，他預備在那個時候求婚，因為好友不喜歡別人在餐廳求婚，所以佢男友不打算在鐵塔內的餐廳求婚，我地坐旅遊巴士去到鐵塔下，在前面的草地上拍了一陣照片，要經過安檢才可以進入鐵塔範圍，我們在鐵塔下等候領隊去取飛的時候，有少少時間讓我們在附近影相，當然是最好時機求婚啦！之前暗中夾左話比手機我拍片，就即是要求婚的時候啦！當我開始拍片，他拉着女友說了一段話，其實太細聲我聽不清楚他說什麼，只能做手勢叫他說大聲一點，因為我怕錄唔到佢講乜，當他單膝下跪，取出戒指求婚，好友眼濕濕答應了！好戥佢地開心！在這個浪漫的地方求婚，實在好難忘！他單膝下跪的時候，我聽到旁邊有兩三個人在歡呼呢！
完成求婚之後，我地搵返領隊準備上去，其中一個眼利的團友，看到好友的鑽戒，即刻知道有人求左婚，笑說在正確的地方做正確的事，好 sweet 呢！巴黎鐵塔有電梯和樓梯上去！我地乘坐電梯上去第一層的餐廳，電梯一共停三層樓，越高就越貴，越高的餐廳就越少位，領隊話最頂層的餐廳只有12個座位，而且非常貴！我地跟團當然係去最低果層啦！餐廳叫做58 Tour Eiffel ，上到去餐廳，好熱！雖然餐廳已經開咗冷氣，而且開到最大，但係對於港人來說，就是25度那種室溫，有團友忍唔住要投訴，因為團友的太太覺得好焗，直情有D頭暈，忍唔住要行出餐廳呼吸，店員也說冷氣開到最大，其實對本地人來說冷氣是適中的，因為他們都穿着長袖衫！後來店員找來一把風扇，在後面吹，再加上打開餐廳的門，令到我地冇咁焗！講返間餐廳，座位唔係好多，大約有40個座位，因為餐廳只係佔咗鐵塔的¼位置，而餐廳亦提供拍照服務，我們也想叫她幫忙拍照，因為見到佢會執完相先晒出嚟，不過幫人拍照的女士，一直很忙，沒有機會過來拍照，至於個景，就算係麻麻地，因為唔夠高，又唔係向住我地想睇果邊，因為鐵塔依家有飛索活動，可以有鐵塔飛索到草地，而位置正正在餐廳的另一邊，我們這邊是看不到的，不過剛才在草地上，已經看到人玩，好友都好想去玩，不過他穿裙子，不方便玩！坐左一陣，就上左每人一杯香檳，領隊講咗今餐只有三道菜，以及一支紅酒，香檳的味道不錯，紅酒就真係麻麻哋，領隊原本話頭盤係有個湯，但係而家變咗係鵝肝醬，味道都唔錯，而今餐嘅麵包都係最好味嘅一間，食完頭盤，主菜就係煎魚柳，法國菜真係多舊魚！( ◠‿◠ ) 條魚柳味道都唔錯！好快就到甜品喇！甜品係蛋白餅，都係比較甜咗D！食完飯有少少時間自由活動，先去一去洗手間，間餐廳都叫做唔差，但係個廁所竟然好似公廁一樣！而且廁格入邊仲有個酒杯在地下！即時覺得佢哋D酒杯.............(*´-`)
仲有少少時間梗係想去上高睇吓啦，點知電梯唔俾上，只可以行樓梯！我地都嘗試行高少少睇下！上咗大約四、五層，我開始腳軟啦！因為我畏高丫嘛！但係好友忘形地繼續上，我話比佢地知我唔上啦，因為我真係好驚！佢地先想起我係畏高的，我自己落返去餐廳嗰層，佢地就繼續上！我在餐廳旁邊的商店行下，呢度當然好多紀念品買啦，不過唔係好睇得啱，應該話唔係好啱送俾人，例如多數係巴黎鐵塔擺設，未去過嘅人係唔會欣賞，冇興趣擺個巴黎鐵塔响屋企，不論大小！而鍾意嘅當然可以買比自己啦！但係我上次已經買咗啦，所以唔會買，而且呢度的售價都頗高，行咗一陣夠鐘集合啦，佢兩個仲未返來！好在都好快出現，不過佢地又要買野，所以都係遲咗少少，到等齊人，又要等電梯，呢度架電梯真係非常慢！我情願行樓梯落，但係好友着咗高踭鞋，唯有等電梯，雖然電梯有兩層，但係好多人搭，最終我地唔能夠全團人一齊搭到一架電梯走，有幾個上唔到，包括我地！落到去地面，鐵塔正準備11:00 夜間閃燈表演，我地未行到出草地，就開始閃啦！好靚呀！我哋即刻衝出草地影相、拍片，因為個閃燈只係閃幾分鐘，我哋只係有部份相影到佢閃緊，部份相影唔到！不過都好開心！影完相要返酒店休息喇！今日好開心，返到酒店仲見到原來我地間房，可以遠眺巴黎鐵塔，雖然巴黎鐵塔睇起上嚟好細粒，不過都值得開心！
沒有留言:
發佈留言