2017年6月 開心西歐遊 - Day 1 意大利、羅馬、梵蒂崗、路家

相隔三年，再一次去歐洲，今次和好友及她的男友一起三人行，上個月我地硏究左唔同既旅行社資料，最後揀左 Jetour 的11天西歐團，去四個國家，同我上次行程相似，但係今次多左三日，主要係留意大利的時間多左，會在意大利留四晚，今次都係零晨機，零時四十分機，坐國泰航空！

晚上九時半集合，我地八點半上的士，九點已到機場，在A區等，搵到領隊，比左 passport 佢辦手續，又要等到十點先可以將行李寄艙，攪掂晒就去搵野食！好肚餓呀！

去返我地平時去果間 Spaghetti house，點知關左門！去左 Pizza express，我地叫左一個 Hawaiien pizza 、闊條麵、risotto 、蒜蓉包、雞翼，大家都好肚餓，唔知係咪咁，覺得D野特別好食！食得很飽呢！食完坐到十二㸃先行去閘口，坐國泰唔使老遠去撘冇人駕駛同巴士，輕輕鬆鬆慢慢行去就得，例牌在閘口指示牌影返張相先，見有D新牌個目的地同航班編號牌不是凸出來的而是用了屏幕，下面柱身也可以播廣告！

上到飛機，坐位是3、3、3排列，我地坐窗口位，三個人啱啱好，飛左一陣就派晚餐！頭先食得太飽，所以叫了最 light 的魚柳，食完野未瞓得著，當然要睇戲啦！睇左鋼鋸嶺，睇左大半，有D眼瞓，關機瞓覺，但係瞓唔著，睇下時間原來已經飛左三個鐘，好友都瞓唔著，大家都努力嘗試瞓，當然最後會瞓得著，但係瞓下醒下，好友買左個長途機用的 cushion，設計可以托起個頭瞓，開頭試果陣都覺得ok，到真係用果陣就唔係咁理想！瞓到九點幾醒左，都差不多要起身，去去洗手間，再搵套戲睇下，大約香港時間十點左右派早餐，早餐有粥或者奄列，我食粥，好友食奄列，食完早餐仲有個半小時才到，又睇下戲，好快就到埗，終於捱過左12小時！

到達羅馬，當地時間七點，落機要坐巴士去T3，海關大排長龍，不過都算快，主要塞住樽頸位，加上冇人睇住，排到中間突然將兩邊人龍在同一位置入，原本差D到的，又被後面的人插隊，好亂，領隊乘機放我地在前面入，其實係去返我地未被插隊前的位置，我們才沒有延誤，過左海關之後，行李已到，當然要去洗手間，才上旅遊巴士，我們的巴士是大巴，但其實我們只有18人，可以坐得好鬆動！

上車後，第一站去梵蒂崗的聖彼得教堂，9:30左右便到達，這裡好多好多人，教堂好靚，可以想像教友們聚集這𥚃做彌撒的話，埸面有多震撼，現在有很長很長的人龍，估計要排兩、三小時才能進場，幸好我們的團安排左唔使排隊，用快線入，要經過安檢，像機場海關一樣，手機、皮帶等一律要放膠盤過X光機，有個團友唔知，過唔到，要放返手機出來，又過唔到，再攞條皮帶出來，個職員用唔流利的廣東話皮帶、電話通通要攞出來，好攪笑！我地等過機時，不停影相，驚嘆這建築的漂亮和宏偉，好心急入去睇，過左機入去前，要去攞講解的機器，這𥚃有洗手間之外，教堂裡是沒有洗手間的，我們等到部講解機到手後，領隊講完部機點用，就開始自由在教堂內活動，我地冇用果部機，因為講國語，而且冇時間，我地狂影相，因為真係好靚，好宏偉，教堂內有紀念品賣，主要是一些宗教用品，如十字架、頸鏈等等，我們也想買，但太重宗教味道，所以最後只有我買了一條頸鍊，買完野又趕去集合，今日好熱好曬！好乾燥！好友想去廁所，已經不可以去返剛才那個廁所，幸好教堂外賣souvenirs 及咖啡的小店有洗手間，當然大排長龍，都要等，等的時候， 好友的男友買了支裝水給我們，要€2.5，約$22港幣，只有500ml 好貴呢！去完洗手間看看有沒有零食賣，見到同一款樽裝水賣€1.5 ! 在行返去旅遊巴士的路上驚見低至€0.5 ！！！在景點賣的東西是最貴的！

去完梵蒂岡，去食 lunch 了，今餐食中餐，12:30到餐廳，餐廳叫做長龍飯店，店員都是港人，講廣東話，一去到就緊係去廁所先，這𥚃的冲水系統是只有一粒銀色按鈕在牆上，要長按才冲水的，好多人唔識，只按一下以為冲唔到！剛才教堂外的洗手間也是這樣的！今餐5餸一湯白飯任裝，還有幾枱都是港人團，飯餸算唔錯，只影了湯和魚，食完飯，領隊帶我地去對面街的超巿，我們去買水果，但唔太靚，只買了香蕉，又見到剛才買的樽裝水，只賣€0.25 ！！！在教堂外足足貴了10倍！即刻買多幾支溝淡！

買完野，下一站去羅馬鬥獸場，由餐廳去好近，1:45已到，但只在外圍影相，見排隊入場的人非常多，雖然未能入內參觀，但仍可見它的宏偉，而且見多處正在維修，始終已經有多年歴史，我們在外圍影相只有10分鐘便走了！跟住去羅馬許願池，2:30去到，得半小時影相，領隊介紹附近一家 gelato的店，𥚃面有廁所，叫我們上車前去一去，順便買杯 gelato 食，我地先去左廁所，再買 gelato，之後才去許願池，好多好多人呀！個池好靚呀！陽光照在白色的雕像上，加上池水和水中的錢幣，令它看起來好新，閃閃發亮！在上面影完想去池邊影，但太多人，又唔夠時間！見到池邊有警察睇住，如果有人用手以外的東西接觸池水，便會即時吹哨子叫停，今日見有小孩將腳浸入池，即時被阻止！影完相，沿路去返頭先經過的小店丶試左檸檬酒和蜜瓜酒，仲想睇 pasta 同 olive oil ，但係唔夠時間，只係買左支蜜瓜酒就走，去到車站，巴士未到，我們在路邊乾煎，因為冇瓦遮頭，又好曬，又冇舖頭可以入去避！我地發現黑色行人路的表面，竟然溶了！因為見到我們的鞋印！

跟住係長途車，由羅馬去路加，約四小時車程，行了兩小時車，大家都瞓左一陣，去到中途站，有間 Autogrill，有廿分鐘時間，去廁所同買野食，呢度有好多大大份的食物，例如巨型的貝殼粉、大大盒爆谷等，而且價錢頗平，可惜我們用不著！我們只買了零食上車食，然後繼續長途車，剛才大家瞓左一覺，呢程車大家都冇乜瞓，領隊又講下野，又介紹沿路見到的一些廠房，有 Gucci、Prada、Miele同 Siemens，大可以話去過門外！( ◠‿◠ )！

再坐多兩小時，終於到達路加，直接就去酒店，今晚住的酒店，叫做 Best western grand hotel Guinigi ，房間頗大，雖然加了張單人床，亦有足夠空間打開三個喼, 酒店位於住宅區，好寧靜，check in 後，放低行李，就在酒店食晚餐，晚餐食通粉、豬扒、焗薯，食飽上房休息了，勞累了一天，要好好休息了！