尋晚都好好瞓，今朝早餐在酒店食，西式自助餐，我只吃了 yogurt 和炒蛋，食完早餐，8:30出發，第一站比蕯斜㙮，車程只需30分鐘，去到附近的停車場，要轉巴士去，呢個停車場有些黑人賣紀念品，主要係雨傘、手袋、太陽眼鏡，有D都識講幾句國語同廣東話，今日雖然係星期六，都唔係好多遊客，領隊話七月先係旺季，所以唔算人山人海，我地坐巴士都係5分鐘左右，落車已經見到有好多小販，沿路有一座城牆，在城牆外是小販和食店，城場後面正是三大古蹟，洗禮堂、大教堂同斜塔，當然大家的目標是斜㙮，而且只有一小時的時間，所以只集中影斜㙮，斜塔的位置背光，要行去另一邊影，這邊看起來冇咁斜，但係對光，影出來也好睇，大家狂影相，又擺出例牌 post，手托斜塔，大家都影到身水身汗！影完相行返去城牆外，買了小小紀念品，然後我地去一家小店買 gelato食，因為要有幫襯才可以用洗手間，點解成日提洗手間呢？因為歐洲冇公共洗手間，又冇商場，要搵洗手間真係好難，加上要長途車，一定要去左先上車！我地離開斜㙮，坐返巴士去停車場，出發去下一目的地，佛羅倫斯！
兩小時車程到達佛羅倫斯，落左車仲要行成廿分鐘路，先去食午餐，今餐食西餐，這家叫 il fran 的餐廳，有室外坐位，坐位旁邊更是種了棵小小的橄欖樹，餐廳內有點懷舊風，牆上放了不少酒，還有店主與人客的相片，今餐食牛扒食紅酒，先來茄汁意粉，意粉略為腍了點，還有每人一片 pizza，這 pizza 只有一片火腿，不像香港的 pizza 那麼多配料，最後當然係今餐重點，佛羅倫斯牛扒，領隊話佛羅倫斯出名是皮革，因當地畜業都發達，所以牛扒都好出名，未煮牛扒前，先將牛扒show 比大家睇，然後去燒，再切開一條條比我地，牛扒睇落有八、九成熟，肉味算濃，只是略為熟了一點，如果五成就好D！仲有一碗沙律，配橄㰖油同黑醋，個醋好酸，支紅酒都唔好飲好酸！
食完飯行去聖日尼亞廣場，呢個廣場有個個美術館，大衞像的真跡就在此美術館內，當然要排隊買飛入場，不過附近都有好幾個複製品比人影相！在這個廣場上，有些馬車可供遊客租，問左行一個圈要€50，好貴呢！不過我地三個人夾就平D，始終人一世物一世，都可以叫做坐過馬車！可惜唔夠時間，將來有機會再去試吧！跟住領隊行去聖母百花大教堂，沿路都係遊各區商店街，幾乎每隔幾個舖位就有一家賣 gelato的店，加上天氣炎熱，每家都好多人買，我地跟住領隊行，冇時間停低，轉頭有時間先買！行到去聖母百花大教堂，呢座哥德式建築的教堂非常漂亮！白色石牆配上淡綠和淡紅色，好特別，加上大量雕像，好特別，好靚！不過陽光太猛列，令它影出來偏白了一點，現場睇靚好多！在教堂前的廣場，好多人影相時，見到吉卜賽女子在附近，有一個塗白了面，扮石膏像去周圍同人影相，例如人地影合照時走埋去影埋一份，好多人以為佢友善，其實搵機會打荷包，我都小心避開，呢度影完相，又行去另一度，見到有 Apple shop，shop前面的廣場有個旋轉木馬，不過有D人在集會示威之類，埋唔到去！然後領隊帶我地去睇最古老的佛羅倫斯建築，這些建築就在河的兩岸，見到有D裝左分體冷氣機，感覺就沒有那麼古老了！跟住行返去聖日尼亞廣場，經過一間博物館，好多人排隊，入面存不少達文西真跡，當然我們是沒有時間去睇！出返廣場是自由活動時間，只有一小時，我地去返聖母百花大教堂，再去影相，食 gelato！
到左集合時間，上返車去下一個行程，去蒙特納 (Modena)參觀陳醋場！未離開佛羅倫斯之前，去左附近的米高安哲奴廣場，這個廣場在小山丘上，可以望到整個佛羅倫斯市，我覺得佢唔夠高，不過呢度冇高D既山，呢度已經可以望到剛才去過的景點，而呢個廣場亦有一個大衞像比人影相，我地只係影左幾分鐘就要走喇！去蒙特納都幾近，大約半小時就到，領隊話呢個地方，家家戶戶都做陳醋，全部自家制，純天然小量生產，我地去左其中一間，這間像住宅的小屋，接待我們的是一位叫 Monica的女士，屋內地面一層是售賣處及講解室，樓上就是存放木桶陳醋的地方，一直以為陳醋會好似釀酒咁，存放在陰涼的地庫，原來只是室溫，絕對不能開冷氣及要關晒所有窗，在頗焗熱的地方釀造，現場所見，最耐的一個木桶是1500年！佢地話木桶唔會洗，只會不停加新的醋再釀，而木桶的入口是不會密封，只用一塊布蓋住，用作防塵及讓陳醋透氣，參觀完木桶，再落返地面試味，分別有三年、六年、八年、十二年及廿五年的陳醋比我地試，三年和六年都是用白葡萄做，三年的醋是透明的，酸得來味道頗清新，六年的顏色變了淺啡色，酸度減低了，保留了淸新地的味道，唔錯，八年以上的陳醋就用了白葡萄和黑葡萄，顏色就變了黑色，八年的味道小小酸，十二年的味道甜了很多，而且濃厚了，而最期待的廿五年，就有㸃失望了，竟然比十二年的酸！我和好友都喜歡陳醋，大家都覺得失望了，在購物時，見到原來尚有一樽三十五年，但係冇得試，不過價錢只比廿五年貴€18，我地諗過，決定夾份買一支，然後放在我家，之後來我家一齊吃！跟住再買D其他做手信，等緊的時候，見到有黑松露陳醋，只係€10，又試下，因為得 Monica 一個人做野，又有幾個團友買野，佢好忙，索性比我地自己試，其他團友見到我地試，佢地又試，結果大家都好鐘意個味，因為黒松露個味好香濃，反而白松露就好酸，試過的團友都有買！買完上返車返酒店喇！
今晚都係住 Best western 在 Modena district的地區，酒店外型係歐洲式尖頂木屋 ，團友都住二樓，我地住頂層三樓，一入房，我地都好鐘意，因爲見到尖頂的木樑，仲有天窗，只有在電影𥚃見過的格局，真正有置身歐洲的風味！放低行李後，落去食飯，點知話今晚酒店有婚宴，未能提供晚餐！要坐車去出面食，好彩只係幾分鐘車程，去左一間叫做 Ponte Guerro 的餐廳，呢間餐廳都幾靚，入到去只見一、兩枱客，我地上樓上果層，因為是西餐，我地坐一張好長的餐枱，見來了一支有氣紅酒，和兩款樽裝水，有氣同冇氣的分別，跟住上左一款麵包，外型四四方方，像意大利雲吞，裡面是空心的，好熱，味道幾好，有小小似 pizza的批邊，但冇咁乾同埋空心的，跟住上左 Parma ham同一款好似燒餅的包，火腿沒有肥膏，小小咸，燒餠無味！等緊主菜時，樓下忽然有班人大聲叫，被佢地嚇親，原來唔知幾時入在枱十幾人的客，佢地睇緊足球，今晚原來今晚皇馬對祖雲達斯！自己國家的球隊，難怪咁緊張，團友都有球迷，我地呢層都有電視，即刻叫人開電視，我地唔係球迷，所以繼續食，主菜有意大利雲吞，同埋慢煮豬肉，雞肉雲吞細細粒，唔道ok啦！慢煮豬肉好薄兩片，味道好咸，像咸豬肉腸！伴菜是茄汁豆同薯蓉，茄汁豆好咸，薯蓉加了陳醋，味道都ok，食埋甜品好甜的雲尼拿雪糕，要趕住走，因為司機要休息，走的時候，餐廳竟然問我地買唔買車厘子？€5一盒，正想食水果，即買！呢度好乾燥，真係要食水果先得！
2 則留言:
食物看來不錯呢:P
Not bad ( ◠‿◠ )
發佈留言