OPI

都好耐無塗指甲油,因為指甲好易黄同埋好易斷,之前見blog友買左OPI既甲油好靚,已經心思思,但係怕會斷甲,就放棄左.

連續幾期雜誌都有OPI既廣告,佢d廣告相都好靚,上個禮拜見雜誌OPI廣告出左西班牙糸列,見深色果幾支幾靚,其實睇完都算,點知見公司附近有得賣,我又唔想買大大支,見佢有mini set, 有我想買果兩隻色,細細支都ok喎,我雖然未用過呢隻牌子,不過我諗個牌子都好出名,可能質量好d無咁傷甲掛,即管買來試試,不過未試之前已經斷左一隻指甲,加上剛剛修短左小小,都係過多個禮拜先試啦!

時光旅的戀人 The Time Traveler's Wife

在想着要看那套戲,偽能叛變定係時光旅的戀人,兩套戲都唔算長,我見偽能叛變得89分鐘,呢類戲不該這麽短吧!最後還是選了時光旅的戀人,聽朋友說偽能叛變好悶,好彩無睇!

套戲講男主角Eric Bana自細已不能自控地穿梭時空,甚至跟小時候的自己見面,每次他穿梭時空都會光着身子,因此他很會開鎖和偷衣服,女主角小時候已跟他見面,並一直在等他,最終他們結了婚,當然,婚後都變得現實了,argue也多了,女主角一直想要孩子,卻多次流產,男主角因害怕下一代和他一樣,不能自控地穿梭時空,亦不想太太再流產而决定做結紮手術,他們因此而變得很不開心...........最後,他遇見未來的女兒,令他們再次重拾幸福快樂,可惜從未來女兒口中知道自己的死期,而且這天要到來了.............!

戲中男主角的母親在他六歲已死,他回到過去與母親相遇.......那場戲挺感動呢!尾段父女感情和死前道別都很令人心酸呢!

盛八

早兩個禮拜同肥仔同埋Karen三個人去旺角食飯,果日Karen仲有d發燒,佢响openrice揾到呢間盛八日式燒肉店,就在近朗豪坊果間王家沙對面,地方唔算大,燈光都幾暗,坐低先知有d類似我之前去過銅鑼灣果間燒肉店既形式,叫d生既肉好似韓燒咁燒來吃,我地叫左和牛,豬肉,牛舌,菜同炒飯,價錢都唔算平,份量都幾少,阿肥仔掌握燒烤時間都好好,燒出來啱啱好,只是和牛的味道唔係咁理想,雖然有海鹽調味,嚿海鹽好難"磨",成嚿粉晶咁,唔知係咪好多人"摸"過呢?碟牛舌就好好味,我地叫多碟,而豬肉味道都唔錯,只是太薄了,一人兩片,食落肚一陣風咁!所以都要食炒飯頂肚!食完飯我地再去發記食糖水,果晚Karen回家後發燒,公司驚佢豬流感,叫佢放左一個禮拜假,其實佢第二日已經好返,足足悶左成個禮拜呢!

石澗

果日去紅館之前,去左尖沙咀食飯,原先佢地想去赫德道食日本野,點知無位,响附近兜兜轉轉,行左兩間都無位,跟住有人派傳單,見呢間石澗好似ok,仲有七折,就去試吓,佢响投注站對面,要落地庫,入到去見都唔多客,我地坐左個大卡位,我地驚肥仔頂住個肚腩想換位,佢猛話無問題好鬆動,個waitress都笑佢.

我地叫左唔係好多野食,我病病地都無乜胃口,佢地就食得唔太飽,上次阿威無去盛八食唔到和牛同牛舌,所以就叫比佢試,呢度冇盛八既牛舌咁好味,和牛就兩間都唔好......懷念dry aged..........另外我地叫左天婦羅蝦,我無食到!同埋燒鯖魚,湯烏冬同炒飯,整體上食物都ok,價錢都唔算貴,叫d大路既野食,可以靜靜地坐吓,都係個好既選擇!

林海峰是但噏我願意

由星期一開始病,星期二三四都在家裏睡睡睡,直至星期四的下午,四點鐘用盡全身意志力撐起身去洗面,要不是一早訂了飛,我想我是不會起來,洗完頭又想瞓.......想打比個friend話唔去,諗諗吓,都係要起身,已經浪費了兩天半,再不振作就浪費埋呢半日同埋我個friend好辛苦才訂到的飛,坐左一陣定一定神覺得可以了便出門去,出到街有點點頭暈,大概這幾天沒怎麽吃過,可能血糖低了點,平時家裏有預備一包糖,今天要吃就沒有!坐車前去seven買了支葡萄適extra,和2寶糖,坐在車上一粒一粒吃,感覺好多了!果然迅速補充腦能量,掂!坐車時老細打比我,叫我take care,不要勉强返工! thank you so much!!

已經好耐無去過紅館了,裝修後,外牆像沒怎麽翻新過,門外多了小小裝飾,和小食亭多了些椅子,我們在場外拍了些照片,場外的紀念品好多好多人排隊買,如果真係諗住買既話,應該趕唔切入場.
入到場,山頂的坐位不再是只有一排石屎,真係一個個坐位,坐在高處向下望好驚呢!我地坐滿一排八個位,大家都好開心,拍照和拍片,大家都唔買野飲費事去toilet 喎!雖然遲左開場,不過大家傾吓講吓好快過,終於等到開show,大家都好興奮,一開始就講四大天王結婚新聞,每講完一part都唱幾句歌,有一part同黄貫中jam半斤八両,個個high爆,尤其Karen兩公婆係beyond fans,去到尾段,有葛民輝,謝安琪為一對新人主持婚禮,載歌載舞,好熱閙,有一part向MJ 致敬,跳MJ thriller隻舞好搞笑,中間有d都好爆笑,不過我覺得無"噴飯"果次咁好笑.d歌都無果次咁抵死.

我睇返d相,見到自己個樣超謝超驚嚇,扮thriller都唔使化粧,唔知以為我向又MJ致敬tim!

笑笑

屋企個讀卡器壞左,攪到攞唔到相,今日終於換左,可以upload返d相.

上次去完迪士尼,夜晚去左旺角果間笑笑,佢係同上次Megabox果間白木屋係同一集團,不過好似呢度多野食選擇d,我地一坐低就分左d戰利品先,响小鎮大街買野都有贈品送,送左有一隻Goofy 杯,一套六支原子筆,同埋兩對耳環,Flora無穿耳,所以耳環歸我,hehe...............我地雖然食住雞脾魚蛋睇煙花,但係出到嚟都好肚餓,叫左幾多野食,食左d冷盤其實都飽,件要食埋牛肉sabu sabu,烤豬肉同蛋餅,好彩有個雞肉餅漏左單,如果唔係,唔知好唔好打包!

始終係旺角區,比較多人,都好嘈吓,d位又近,旁邊d六人枱好嘈吵,不過都傾到計,如果想靜靜地坐吓傾吓,都係去和民好d,埋單時佢地有抽獎,我地抽到一客壽司下次食,個店忘記比張券我地,我地又唔記得,算喇!整定下次唔幫襯!

求婚的惡魔 The Proposal

久未有新作的Sandra Bullock今次現惡魔上司瑪嘉,為免因簽證到期要被迫遣返加拿大,而迫下屬阿祖假結婚,為了保住工作,阿祖唯有吞聲忍氣對上司的指令全面配合,為了和瑪嘉瞞過政府調查,便趁著長假期雙雙返鄉下拜會男家鄉親,自命見慣世面的瑪嘉以為易過借火,中間當然烏龍百出,亦加深了二人的了解,最終擦出真愛火...........戲中的Sandra 身型keep得甚fit,不過仍難免現出"老"態,尤其拍埋英俊年輕(點)的男主角Ryan Reynolds,劇情雖然順理成章,但仍很惹笑!

新電話

等左幾個星期先有機攞,用左一個禮拜,好多function都未熟,好快就用慣touch screen,不過影相麻麻地,尤其室內,雖然有閃燈,可能用慣相機,覺得唔太理想吧!

呢個幾禮拜過得好平淡,好似乜野function都無,又無乜戲睇,連平時超多人既H&M都好靜呢!竟然唔使排隊試衫同比錢!可能買秋裝又未着得,又無乜新款到!

前幾日去左電髮,電完都幾curl,但係第二日d頭髮就直晒!仲直過未電之前,得好少既curl, 真係好奇怪!

希魔撞正殺人狂 Inglourious Basterds

網誌日期：2009-08-28 02:02




較少看這類帶暴力的電視,雖然有點血腥,但導演拍得很出色,幾個chapter都編排得很好,我看得很緊張,近期最好的一部電影.

故事講二次大戰期間,德國佔領法國,女主角蘇珊娜親眼目睹家人被納粹德軍軍官殺害,她僥倖逃脫後逃亡巴黎,改變身分成為戲院老闆,隱姓埋名並積極醞釀復仇大計，以報滅門之仇.與此同時另一同盟國盟軍中尉正在結集數名猶太裔雜牌軍組織成一支部隊,並與實際身分為臥底特工的德國女星聯手,密謀刺殺希特勒.........

3D-超鼠特攻 G-Force

網誌日期：2009-08-26 01:44




故事講三隻天竺鼠經過長時間訓練,組成了隸屬美國政府一個神秘的專業戰鬥組織G-Force部隊,牠們精通各樣最先進的武器和裝備,杜得悉億萬富翁企圖利用意想不到的神秘武器征服世界,三隻「超鼠」運用最先進武器對付壞人,並以可愛外表作掩護由寵物店潛入敵陣,攻破敵方巨型電子怪戰,重新令隊員團結起來...........

如果套戲係由"人"去做主角既話,只能說是平隱的制作,用CG+3D增加了吸引力,只是劇情對白的趣味性對小孩來說又引不起共鳴,對成人來說 又過於"幼稚"!只有3D的畫質是取勝之處!

華記永昌隆

網誌日期：2009-08-21 00:40

都好耐無去銅鑼灣,今日去左睇牙醫,睇完好想食"細蓉"呢排睇得"絕代商驕"多,成日講"細蓉",即刻走去池記食,旁邊一對講廣東話+英文既情侶,猛話好味,可能係廣州人來自由行吧!,我順道買左XO醬同蝦子,原本諗住去么鳳買野食轉頭又唔記得,真係老人痴呆!

突然想起去華記永昌隆睇吓,去到見間鋪都好新淨,可能裝修過,不過無人行,我見有之前阿蘇介紹既紙豬肉乾賣,就買包試吓,都好大包吓,睇睇吓見佢地竟然有台灣醉雞,老天祿既鴨舌賣,仲要兩間都有齊,仲有鼎泰豐既急凍小籠包,同沙巴既榴槤雪條賣,樣樣都想買,樣樣都要雪,返屋企咁遠都好難搞,不過店員話可以用冰凍住幾個鐘,不過咁熱既天氣我都唔太放心,我都係買2包鴨舌同醉雞,佢地用環保冰包埋一齊,再密封在紙袋內,返到屋企d冰無乜點溶,包鴨舌仲好凍,不過醉雞就唔凍,可能個樽包左bubble,冰唔到啩!

先試吓個醉雞先,一樽都有八九件土雞,都好大件好多肉,又唔肥,都幾好味,鴨舌送左一包比左人,一包留返聽日食,紙豬肉乾就攞返公司食!

迷失侏羅紀 Land of Lost

網誌日期：2009-08-19 00:52




睇過trailer覺得應該幾好笑,不過事實係最好笑既已經在trailer睇晒!

故事講述神經質科學家馬素博士同美女助手賀莉和冒險專家威威,在一次野外探索研究中,乘著橡皮艇漂流時因機件出了問題突然捲入了時空漩渦,穿越時空進入一個神秘的迷失世界的驚險故事.在這個迷失世界滿是恐龍,及外表怪相的族群蜥蜴人,他們一行三人完全迷失在史前世界,幸好認識了新朋友原始人嚓咔,帶領他們在迷失世界冒險,他們一邊被暴龍追趕又要逃避蜥蜴人追殺.........!

The Hangover 醉爆伴郎團

今個暑假,好似無乜笑片,諗住呢套應該幾好笑,其實都係美式笑料,帶點2b級對白,加點無厘頭,不過劇本寫得幾好,令套戲可以用低成本制作得到比預期高的票房.

套戲講述三個伴郎在婚禮舉行前2天,帶新郎哥到賭城度過最後的寡佬之夜,佢地在豪華酒店飲酒狂歡之後,第二朝醉醒後,頭痛欲裂且完全失去記憶,他們還發現衣櫃有個來歷不明的BB,廁所有隻老虎,其中一人又無左隻牙,間房亂七八糟,更弊是新郎哥竟然唔見咗...............佢地茫無頭緒,唯有盡法想起前一晚發生的事,尋回新郎將他送到教堂.

當中也有些攪笑劇情,三人表現惹笑,劇中華人黑幫好騎呢,仲有拳王泰臣客串,尾段真相曝光,都好好笑,只是帶點三級吧!

Wai's Birthday

網誌日期：2009-08-09 00:54



尋日係阿威既生日,我地跟返上次個組合再加多個人,一行六人再去廸士尼玩,佢地上次加左$100可以在8月31日前去多次,所以上次已經約定再去,今次同上次一樣超熱~~~仲要幾多人吓,好多野都要排隊,阿威去左service counter攞左個生日badge, 個個職員都同佢講Happy birthday,佢好開心呢!我地去d上次無玩過既地方,先去米奇大屋,我地影完相出去到出口既時候,d相已經晒左出黎,個賣相既姐姐話過幾日會拆,我問佢係咪整Halloween,佢話係,仲話完左Halloween 會拆左間屋,唔知會整乜,叫我地要埋d相喇,我地見大合照幾靚,就要左一人一張.跟住去排隊同Winnie the pooh 影相,排左一陣,Winnie the pooh 要休息,返到來見佢細左個碼,矮左成個頭,而且仲係咁"中"眼瞓,攪到d相影得麻麻地! 我地影完都差不多夠鐘睇Parade, 今次企遠小小影相,都係覺得水花唔夠多,下次不如玩盡d!

睇完Parade 就去睇獅子王,好耐無睇喇,前段都幾悶,係白色仙子同玩火好睇d,睇完出來再去睇4D,每次都要睇,最愛阿拉丁同小魚仙,d歌好好聽,跟住去睇大街跳舞show,超能先生好攪笑,氣氛好熱閙呢!睇完去玩幸會史廸仔,去到既時候,得返英文版,我地照排,都要等成25分鐘! 入到去,因為係英文版,所以史廸仔都係揾外藉人士玩,第一個係印藉人,因為佢個名好難讀,佢就叫左另一個講完自己個名之後無反應既華人,佢仲用國語講"謝謝",史廸仔唯有揾個金髮既外藉人仕,點知個外藉人士問佢識晤識法文!!!!最後佢揾左阿威個老婆Karen,我地好開心可以玩,佢問Karen有無boyfriend,佢話無but husband,史廸仔好失望,問邊個係佢husband,佢見阿威有個生日牌,就叫everybody stand up,一齊講Happy birthday to Wai, 超開心呀!

睇完幸會史廸仔都夠鐘等放煙花,雖然玩左唔多野,但係好快天黑,睇煙花時好焗好熱,睇完就急急腳去d shop處凉吓冷氣,同埋去晒相,今次d相唔多靚,所以都無晒到,我地熱左成日,夜晚果餐去打邊爐!!!!吹住勁大冷氣去食,yeah !

BB Bronzer

網誌日期：2009-08-07 01:21




上次去Bobbi Brown 買野,見佢地出左夏天用既bronzer 主要都係d深啡古銅既顏色,當中都有2種粉紅色,我試左最淺既粉紅色,覺得好淡好自然,帶少少既閃亮,好啱夏天用,配合埋個brush效果比之前用既胭脂膏更好,所以都買埋個brush,個sales姐姐叫我買一盒深啡色打陰影,我覺得作用唔大,無買到,佢送左幾張coupon話可以預約一對一教4次化妝,睇吓有無時間去,可能到期前都未必去到.

今日去Log-on見做緊VIP promotion, 有折有coupon送,我就買左Blog 友介紹既睫毛夾,之前見卓悅賣$98, Log-on 賣$125,依家九折又有得試,試左覺得好啱眼形,就買左佢,之前無得試都驚買左唔啱會好嘥!等我叫朋友去試吓先!

酷熱迪士尼

上星期四,在這個酷熱警告下的天氣,都預左熱到溶,我同Flora兩個,入到去先睇吓動畫廊,然後行吓shop先,凉吓冷氣,行晒d shop都睇啱d野等走果陣先買,我地一路行一路買雪條食,又買飲品又買西瓜食,跟住就去睇巡遊,有d水淋吓無咁熱,其實都無上次咁熱,仲有小小風tim,其實我都唔介意出身汗,係怕成身臭汗味!

我地keep住去d室內地方,睇4D,睇金裝米奇,Bebe又換左人,雖然佢廣東話唔正,但係做得好,有第一代Bebe咁好,中途"小魚仙"個水母埋黎"炸"左我地一吓,落幕前阿"泰山"跳左上我地面前個木欄,大家即時尖叫,我地睇得好投入,好開心,跟住去左Banquet Hall 食野,叫左雞扒同小籠包食,可以想像到d小籠包唔會好食,不過Flora想試吓响廸士尼食小籠包係點既,食完之後,Flora 要玩Space mountain, 我無陪佢玩,我在後面的shop等佢,再一齊去玩巴斯光年,玩完出來先想起miss 左大街show !!真可惜,31號之後就無啦! 好彩上次我有睇過!

見仲有成個鐘先放煙花,就去森林果邊揾史廸仔境點影相,影完去買雞脾同魚蛋,食住等睇煙花,次次睇都影相影短片,要睇mon,今次我地唔影,完全睇現場,全程"岳"高頭大聲嘩,有時跟住音樂唱歌,好好笑,好開心..........快樂其實好簡單!

LE SALON DE THE de Joel Robuchon

再次到此店,原來相隔了兩年,時間過得真快,上次主要吃cake,今次則試了tea set,有咸點和甜品,還試了阿蘇話全香港最好食既牛角包,我唔知係咪真係全香港最好味,不過係我食過最好味,一向唔特別喜好牛角包,覺得幾油同幾"漏",不過呢個皮脆內軟,好香,唔會咁油,佢只係微暖都好好味,真係唔知新鮮出爐會係幾咁好味呢?

Tea set 有4伴迷你scone和4件好迷你既sandwich(唔知佢叫乜,總之好似sandwich就當係吧!) , scone 有牛油同士多啤梨玫瑰jam, 好好味既jam,大概係自家制造吧! sandwich 每件大約3吋x1吋大,上面好迷你既裝飾好靚好精緻,靚到唔捨得食,仲好好味呢,個朶只有一吋大既三文魚花好靚,雖然咁細件,都食得出新鮮味道.......正呀~~~~~!

食完咸點到最出名既甜點,總共有5款,先吃栗子蓉伴蛋白條果件,蛋白條對我來講略為甜一點,栗子蓉比較軟,像溶了點點,再吃macaron那件,都是甜了點,中間那件最好味,passion fruit帶點酸甜,配上三款berry和芒果.........賣飛彿!!!其餘都一貫水準,最後叫埋雪糕食,三款口味,有mango sorbet,開心果同朱古力,當然係朱古力最好味啦!