Pavia

睇完戲我哋搭車去九龍城，因為約咗好友個 Ex 嘅媽媽食飯，好友和男友分手後，難得佢媽媽仍然同我哋有聯絡，好難得一齊食飯，揀咗呢間意大利餐廳，餐廳嘅面積唔係好大，大概只有六七張枱，今晚只有三枱客，睇吓個餐牌，食物嘅選擇都幾多，我哋揀咗兩個 dinner set，一個牛扒同埋一個魚，再加另一個牛扒，再加咗個薯蓉，頭盤有水牛奶芝士，之前食過意大利新鮮寄過嚟嘅水牛奶芝士之後，再食呢啲覺得佢真係冇味，可能唔夠新鮮，另外叫左個蜆，同埋蘑菇湯，呢度D麵包幾好食，不過冇得refill，要另外加錢，磨菇湯都好飲，牛扒都做得唔錯，甜品 crème brûlée 都唔錯，但係個榴槤芝士蛋糕就真係好難食！😅

食食吓得返我哋一枱，我哋傾開計講去唔去打針，侍應都俾啲意見我哋，因為佢哋做飲食嘅好多都打咗針，始終每個人嘅體質唔同反應都唔同，我就諗住月尾去打埋佢，因為都係諗住八月之內打，始終疫情未過，病毒又變種，好多地方都有限制，日後我諗過澳門都要打咗針先去得，始終都係要打，不如趁佢免費同埋有假期，快啲打埋佢！

4DX 黑寡婦 Black widow

 

1995 年 Natasha 同妹妹 Yelena 和父母在 Ohio 生活，一天，他們要匆匆離開追捕，到達古巴後，姊妹兩人與父母分開了，後來兩姊妹亦分開了，他們分別被訓練成特工，廿一年後，妹妹在一次任務中，發現大家都被紅室的主人Dreykov所控制，她取得解藥之後，希望能夠解救其他特工，過程中，他與姊姊 Natasha 再重聚，更一起見返當年的”父母”，四人一同前往尋找紅室所在…….！

一早同好友訂咗飛睇呢套戲，因為大家都鍾意睇 Marvel 嘅電影，當然唔會錯過呢套啦，套戲都幾好睇，睇片尾嘅彩蛋，係 Natasha 死後的時間，就知道妹妹仲有續集可以拍，而且佢嘅目標仲會係鷹眼，又一套令人期待嘅電影！😅😅

The coffeeology （tc)

我哋食完鐵板燒，已經想飲咖啡，所以去耀華街睇吓，原本想去果間冇位，就算有位都要分開坐，因為佢係收六點，所以每張枱只能夠坐兩個人，跟住去咗隔離呢一間，佢都係坐兩個人，不過佢有張四人枱可以中間加塊板，店入面只有五六張枱，都有D迫！

因為我哋食飽咗，所以冇特別叫嘢食，我哋叫咗一杯 Mocha 一杯 Cortado ，而我就叫咗一杯 Cranberrino，店員推介我哋試吓佢嘅芝士蛋糕，所以叫咗一件share食，味道係焙茶，都幾好味，我個杯 Cranberrino 係咖啡加 Cranberry 蓉，兩隻味唔係太夾，所以麻麻哋😅

 

饗11

今日約咗好友去睇戲，先去食個lunch，我哋訂咗呢間鐵板燒，因為我哋有coupon，午餐只有一個餐牌，Set lunch 頭盤係刺身，跟住揀一款海鮮同埋一款肉類，因為我哋三個人，所以都揀三款唔同嘅食物，海鮮我哋揀咗鮑魚、北海道帶子、銀鱈魚，而肉類我哋就揀咗肉眼扒🥩、羊扒、豚肉，另外仲有炒野菜同埋櫻花蝦炒飯，我都食過好多次鐵板燒，我覺得大部份鐵板燒嘅食材都係好新鮮，當然師傅嘅手藝都係重要嘅，我哋見serve 我哋果個師傅處理食材嘅時候，已經覺得佢唔係太專業，例如個銀鱈魚，佢會將個魚皮特別整到成脆片，然後插喺個魚肉上面裝飾，佢整咗兩次都整唔到就放棄咗，求其將塊魚皮撻上個魚肉到就算，而每一碟食物嘅伴碟都做得好求其，係我見過最唔專業嘅鐵板燒，海鮮都好新鮮，肉類嘅質素就真係麻麻地，老實講好彩係有coupon，用咗coupon都覺得唔值呢個價錢，如果唔用coupon就更加唔值🤦🏻‍♀️，唯一係店員嘅服務幾好！甜品係番石榴 sorbet ，好友覺得唔係咁好食所以冇食到，我哋跟住去咗SOGO 地庫食榴槤Gelato🍨，因為上次食過覺得好好食，不過今次就爭D喇！😅

 

Pixar Fest

最近好多人出去尖沙咀碼頭，有D人好似我咁想睇呢個 Pixar Fest ，但係大部份人係想去巴士站嗰度影Anson Lo嗰張生日海報，真係好多人影相😆

今次海港城用 Pixar 做主題，有幾個位置都有D巨型嘅擺設，好似停車場上面就有Pixar 嗰個招牌嘅枱燈、Up 嘅 Carl 叔、Dory、港威嗰邊仲有胡迪同埋巴斯光年！我我去停車場嗰度影完相，就去海運大廈個中庭影Toy Story，影完相就去咗飲咖啡，食咗碟意粉，因為仲有幾張coupon過幾日到期，呢幾日應該都唔會去尖沙咀，所以今日用埋佢！不過都係用唔晒！😅 今日約咗去剪髮💇🏻‍♀️，所以食完野匆匆忙忙咁走，經過港威中庭，就見到巴斯光年同胡迪，不過就冇停去影相，因為好趕時間！😅

For Single

尋晚成晚瞓唔着，可能只係瞓咗兩個鐘左右！🤦🏻‍♀️ 今朝一早起身去複診，跟住攞嘢去比家姐，然後去佢屋企附近呢間coffee shop，店入面只有五張枱，同埋一啲吧枱！今朝店入面冇乜人，可能時間尚早，我就揀咗吧枱坐，呢度嘅咖啡應該都幾專業，因為我自己就唔識，但係見佢沖調咖啡嘅方法都有好幾種，而呢度夜晚應該係有威士忌飲🥃，我諗咖啡店淨係賣咖啡嘅話，夜晚都好難有生意做，賣威士忌應該就幫到好多！😅

睇吓個餐牌，食物主要係多士同埋沙律，我就揀咗個牛油果🥑三文魚 bagel 🥯 ，同埋叫咗一杯 Dirty ，杯咖啡因為加咗奶，所以佢另外比一杯original 冇加奶嘅咖啡，份量只有兩啖，用嚟俾你試吓個味道，佢仲有張咭仔俾你Mark低飲完之後個評分，有咖啡嘅酸度、香味等等，我就唔識品咖啡，不過都貪得意Mark低杯咖啡嘅評分比自己睇🤣 

 

Smart cafe

今日就去土瓜灣，先去食啲嘢，原先想去嗰間餐廳，因為今日假期只有lunch，所以去咗隔離呢一間咖啡店，店入面只有十幾個位，門外面就有兩張枱，餐廳標明係虹吸式咖啡專門店，除咗有咖啡飲亦都有售買咖啡豆，我就叫咗一個三文魚炒飯，配一杯latte，杯咖啡雖然冇拉花，但係又真係幾好飲！炒飯都唔錯，只係份量少D 😄

門外面有一枱客帶咗兩隻貓🐈🐈，兩隻貓都好靚，但係唔記得咗叫做乜嘢品種，身上面好似豹紋咁嘅花紋，忍唔住要埋去同佢影吓相😆

食完野就去土瓜灣地鐵站，呢個站只有兩個入口，我由街市嗰邊入去，影吓相就去搭車，因為呢個站入面冇乜嘢睇，搭一個站去宋皇臺站，呢個站就熱鬧好多，因為呢度有D展覽品，部份係起呢個站嘅時候發現到嘅文物，雖然我都想睇，但係站內通告表示要排隊等候30分鐘，所以我冇排到，日後冇咁多人先再睇，只係在出邊影吓相就算，跟住行返去上次影相嗰個出口，由出閘到出口都要行幾分鐘，而家好多地鐵站都係咁樣嘅設計，都係要行一段路先至去到某D出口😄