2016年9月東京之旅 - Day 3 築地、田原町、Skytree、新宿

尋晚真係失眠！感覺好似冇瞓過！不過手腳冇咁累，一早起身，先去築地，目標為本，直接去鮨國，去到未開門，十點鐘先開！門口外有11個人排隊，仲有20分鐘先開門，玩下手機好快過，預備開門前，先派了menu，然後安排入坐，9個 bar枱位，4張四人枱，果4張四人枱，只有一張可以一分二變兩張2人枱，佢地唔比撘枱，又多一pair pair，所以形成左3張四人枱只坐6個人，今朝有一家四口，所以有兩 pair 要等下一輪，不過廿五分鐘後有一個人走，過多五分鐘亦開始陸續有人走，如果未開門前已經等，頭圍入唔到，大約要等一小時，如果一個人，就有機會有位！呢度只收現金，同埋每人最少要叫一樣野食。

講返我餐飯，叫左海膽飯，佢加左價 ¥3800，之前第一次食¥3100，另外加左兩隻酒煮花甲，一隻牡丹蝦，質素仍然保持，正！食完野，走果陣見好多人排隊！行去下一條街買茶葉，上次來冇開到，今次有開，比張玄米茶的相店員睇，佢地D茶葉密封，睇唔到有冇原粒玄米，不過摸到一粒粒，買左兩包，跟住去田原町！

行去本願寺果邊，過本願寺對面入車站先啱月台，行日比谷線去上野，轉銀座線去田原町。都好快到上野，行去銀座線北千住方向，坐兩個站就到，今日醒喇，由 Elevator 出口出，一出閘就係升降機，上1/F，一出轉右行，兩個街口就到，好近，一見到田窯就係入口！跟上次一樣，先行右邊，今次幫人揾千代田模，有間叫做馬嶋屋菓子道具店的鋪，話自己賣果隻模同千代田模同一樣 coating，睇落又似我尋日買果個，因為個模有少少暗彩紋，呢度賣果D都有，仲有一樣的檸檬模，還有櫻花、貝殻、香蕉，長方、四方，價錢仲平好多！檸檬模平左一半！等回覆再去買！行左去上次路過的街口，有家賣刀的店，原來這條街有幾家食店，呢條街剛剛好望到 Skytree在路中間，上次來見不到食店，今次先見到！行左一陣，身水身汗，見到一間叫 Bridge 的店，只賣飲品和雪糕，環境不錯，坐下飲杯野凉下冷氣，坐一陣好舒服.....想瞓覺...zzzz

行埋最尾果段，去上次去過果間 báisè 成間 shop 的家品主要是白色的，上次買左個碟架，諗住買多個，點知冇晒！見有用緊果種不銹鋼卷墊，唔知應該叫乜野，見佢有白色，平過香港，買個返去，買左一個調味料盒！再返去馬嶋屋菓子道具店，買左兩個模，買完去 Skytree 了！

今日好熱！成身臭汗！終於可以去一個全冷氣的地方了！去返頭先個 Elevator 出口度入，坐一個站去銀座，再轉東寶線TS01，一個站便到 Skytree站，落車果陣又落雨！好在一路在商場，今次唔行咁耐，去目標店買野，買完行左一陣間就落返新宿!

主要去O1O1買衫，買完野去隔離伊勢丹行，第一次去新宿伊勢丹，平時好少去呢邊，呢度有間LV，證明呢邊賣D野貴D！上去睇煲，竟然有LC的楓葉煲同25週年煲，仲有水煲同有蓋的拉麵碗，雖然我唔會買，純粹八掛下！

行完伊勢丹都9點，行左成日，都好累，食D野先，近近地，去上次食過果間ねぎし，食牛舌飯，行過郵局見到絆壽司在這邊開了分店，明晚或者去試下！食完飯去華盛頓酒店訂巴士飛，訂先返酒店休息，明天一早去迪士尼！

2016年9月東京之旅 - Day 2 吉祥寺、日本橋、東京

瞓醒已經9點，尋晚瞓得幾好，今朝梳洗完就出去，落微雨！先去增值張 Suica 咭，然後撘中央線、総武線 （黃色果條）去吉祥寺，今次要去東口果間 Cuoca 買千代田模，落左車就落去搵出口，見到得南、西、北同中央口，係冇東口，日本地鐵好多係要在月台揾左出口先，所以上返去月台搵，果然在另一邊，東口係直接出去一個叫 atré 的商場，入到商場見到扶手電梯落去，先至係1/F，一落扶手電梯已經係 Cuoca 喇！近到不得了！

見隔離有間意大利餐廳，set lunch 都係 ¥1,000，食左野先，餐廳另一邊出口係街道，好似有D野行，陣間出去行吓先，叫左 set lunch ，是日意粉係茄子火腿，有個沙律同一片包，話係石窯燒，加杯咖啡，今朝食左半份巨峰，意粉原來都好大份，好飽！

食飽出去行，外面好熱，仲出太陽，好曬，呢度有兩條商店街，我記得來過，不過冇乜特別啱心水，都係入返商場，呢個商場其實幾長！不過1/F同 2/F係唔可以通過另一邊，要由B1 或者行出街先過到另一邊，因為中間有D地鐵出口，B1果層有間叫做 Afternoon Tea living 的店，D餐具好靚，但不能買太多，一來易碎品，二來要慳住買，真係好鐘意先買，明天仲要去道具街，要留返D位先得，買左膠碟、膠盒，同一隻碟，仲有其他碗碟想買，揀最鐘意果一隻先買！另外見到幾件衫都鐘意，不過太貴了，買唔落手！

跟住去Cuoca ，頭先未 confirm 買邊款，依家 confirm 左就去買，成間店都係賣烘焙食材，千代田模放左幾當眼處，不過得兩款，一款檸檬型同淺長方形，今朝見佢個架有貝殻模價錢牌但係冇個模，應該剛剛賣了，店員取走價錢牌，其餘兩款仲要每人限買一個，想買各一都唔得，唯有買左檸檬先，轉頭睇睇可否買到，上一層，去一去廁所，再見坐一陣，呢車度有冷氣，有 wifi ，有位坐，又新淨，hea一陣先！大約15分鐘後，返去見個檸檬模冇埋，價錢牌都收起左，我諗我買果個係最後一個了，攞個模去比錢，又係頭先個 sales，我諗佢認得我，佢照收錢，咁就買左兩個！

買完去東京站，見日本橋只係隔離站，即管去三越睇睇有冇模賣，在JR新日本橋站有通道去三越，想起香港三越是最後一間結業的日本百貨公司，從此只有崇光獨大！日本橋呢間三越有本館同新館，Basement 食物果層比較新淨，樓上各層好舊，而且D野好貴，不過都係靚野，有好多好藝術的展覽，見到有花卉展，又去影下人地D花！家品部D餐具好靚，可惜太貴了！

去返東京站，呢個站來過好多次，次次都係轉車，冇認真行過，今次行吓先，先在地下街行，大部份係手信店，買左兩盒手信，然後去大丸，上去家品部，見到有賣花茶的店，試左兩款茶，買左100g 同埋茶杯連茶隔，再行家品部，有D產品之前見過，覺得道具街會有，到時見到啱就買，唔啱就算！在地庫食品部見到D生果好平，走果陣先買，行左陣腳攰，坐左一陣休息，然後去食飯，見12樓有鰻魚食，就試試佢！

上次去大阪果間大丸食過鰻魚飯好好味，今次呢間叫伊勢定的店，女侍應都係著和服，比較傳統，應該係老字號，揀左 set，同埋一串燒鰻魚肝，套餐有湯、前菜、刺身、鰻魚飯、甜品，侍應介紹用日式胡椒粉，味道頗濃，食完個口仲有陣味，影響左食其他野味道！

食完返新宿，好多 shop 都關門，明天要早D起身先得！今日好累，飲左幾杯茶，唔知會唔會失眠呢？

2016年9月東京之旅 - Day 1 新宿

四月去過了東京，原本十二月再去，但假期被迫更改到九月，考慮了一陣子是否旅行，想起迪士尼會否有 Halloween promotion，見到promotion 在9月9日開始，正正是假期最後一天，立即申請多一日假，去唔到聖誕節 promotion ，去 Halloween 都好！

又去 EGL 買 package，今次又住 Sun member ，貪佢最平，今㳄坐 HK Airline ，早上9:15機，要一早5:00起身，尋晚瞓得唔好，驚唔知醒，鬧鐘一嚮，即刻起身，今日咁早，冇小巴搭去轉機場巴士，唯有行路，大約十分鐘路程，尋日睇左巴士5:45由總站開出，大家約18分鐘到我個站，去到巴士站，睇巴士公司網，仲有13分鐘巴士才到站，最後遲了3分鐘到，巴士都好快，半小時便到機場，去到機場，去G區搵旅行社攞機票，排隊寄行李，有成圑人，所以排左一陣，寄完行李就過關，因為閘口214都幾遠，要坐冇人駕駛，先去食野，今次去正斗，食左碗雲吞麵，遇見舊同事，但他看不見我，食完麵去搭冇人駕駛，兩個站就到，上去閘口時，又見到舊同事，佢兩公婆又見唔到我！我以為佢地同我同一班機，見佢地去左另一邊，應該去廣島，轉頭佢老婆已post 上 Facebook !

去到閘口仲有20分鐘登機，都好快！今次坐窗口位，坐㡳一陣就瞓著左，飛機 delay 了45分鐘才開！瞓下又醒下！派餐時吃了點心和米粉，食完又瞓，瞓醒已經飛了三個多小時，去一去廁所，聽到廣播預備降落，返埋位等，望出窗好好天，不過預計未來幾天都落雨，落機後，過關的人不多，條隊得十個人左右，好快過左關，行李仍然快過人，一出來已經可以取行李，跟住買巴士飛，條人龍超長，好似有成團人，我覺得應該有第二個售票處，果然有！仲唔使排隊，仲要
4分鐘後有車，車站就在售票處旁邊！平時買親都要半小時後才有車，今次好快，行出東站，等3分鐘，搭3:45果架巴士，巴士行車時間耐左，平時到左新宿西口，下個站就華盛頓酒店，但係多左個站，在新宿新南口，新果個商場 NEW0Man，果度有個巴士總站，停左呢個站先去華盛頓酒店，去酒店 check in 左就出去 !

去左高島屋，睇下D煲煲碟碟，自己買左隻碗，幫人買左個煲，行左一陣 Tokyu hands，跟住去超市買水果，好多做緊特價，買左巨峰提子，然後去 NEW0Man ，不過原來是好細的商場，每層只有幾間店，而且都好貴，再去搵野食，見樓上有間意式餐廳，叫做 Rosemary's Tokyo，剛剛在 NEW0Man 上去找不到，原來要在 Lumine zero 上去，上到去要等位，等三張枱，都好快有枱！

叫左一客薯仔同牛扒，加杯 Lemonade，薯仔係好細個，壓扁左再焗，奉上牛扒的男侍應幾靚仔 ^_^，牛扒約五成熟，味道唔錯，有個辣辣地的醬，唔係好夾，就咁冇 sauce都Ok，食飽飽，行返去酒店，經過便利店，見到上次買的八年梅酒，買返兩支返去先，今次諗住帶 bubble 同膠紙，最後都忘記了！=.="

飯局主場 - 第五回

又落雨，今日約左好友來我家晚餐，昨晚做了花雕雞翼，今日一早起身，洗左個廁所，執定明天旅行的行李，然後落街買餸先！

今晚得三個人，唔想整咁多野，做我經常用來宴客果幾味，買左條斑、一斤蝦、葱，昨天已經買了蒜和薑，晏D買埋牛扒同菜，買完返去處理左D蝦先，要蒜蓉開邊蒸，將蝦開左邊先，舖好蒜蓉，洗好條魚，放入雪櫃，然後出去買牛扒！

攪左成朝都冇食早餐，近近地，去食個老麥！已經唔記得幾多年冇食過老麥，食左個板燒雞腿包餐，食飽去搭車！

去尖沙咀 City super，買我最喜愛的韓牛！見到多左一個選擇，係之前有的河東郡鮮松葉牛，但係亁熟成，比唔係 dry aged 貴左$40 / 100g ，就買塊試試，另外再買一塊細的非熟成，再買埋沙律菜，就去會合好友！

去到我屋企，我切埋D蔥，可以開始煮喇，先蒸落條魚，跟住煎牛扒，然後蒸蝦，一個爐蒸三碟魚＋蝦，好方便，菜同雞翼唔使煮，好快食得，好友買左 Tony Wong 的 macaron，說起 macaron，今日在尖沙咀見到 Pierre Herme 的店已經 closed ，鋪位現正空置，應該得返 IFC 店，下次經過望望是否仍在，當年開業時，排了長長的人龍，在香港營商，大概就是很難持久！

花雕醉雞翼

同好友打完邊爐，返到屋企成點鐘！仲要整埋雞翼先，因為要浸過夜，明天用來宴客！

今朝已經將雪藏雞翼放左上格解凍，將薑加入水中煲滾，放入雞翼，水滾後煲8分鐘，然後將雞翼冲凍水，再浸冰水15分鐘，在盤內加入花雕酒和糟鹵，比例是一比二，一份花雕，二份糟鹵，原本要加杞子，但家中的杞子受潮了，不能用，原食譜要落話梅，但我去買花雕時，見到有話梅花雕酒，咁就唔使買話梅喇！將雞翼放入糟鹵花雕浸，放入雪櫃雪，攪掂！

第一次整，希望好食啦！

牛精皇

睇完戲，約左好友 dinner，去九龍城食火鍋，好友的男友剛從英國辦完白事返港，他們一家人食飯，我地另外坐一枱，今次食飯主要傾十月去大阪的行程，我們已訂了機票，尚欠酒店，用 hotelscombined search 難波車站的酒店，揀左大阪瑞士南海酒店，非常近車站，一直都想住，但係太貴，今次見減左價，計埋機票，比買 package 貴幾百，但係酒店升級左，都算平！即時網上訂房！

攪完酒店，食野先，叫左冬瓜湯底，牛頸脊、墨魚滑、蝦滑、紫茶嚮鈴、魚蛋、脆肉鯇、韮菜餃、皇帝菜，好多野食，份量又大，用料新鮮，正！

屍殺列車 Train to Busan

呢套戲，睇 trailer 已經想睇，今日終於得閒去睇！對上一次睇過一套類似的韓國電影，戲名好似係末世列車，又係講一班人在火車上發生的事！


劇情講述男主角孔劉係基金經理（戲入面好似冇提佢個名，因為佢個女叫佢爸爸）同老婆攪緊離婚，女兒秀安和他一起住，女兒生日要求去斧山見媽媽，他們上了火車後，火車開車前有個受傷的人上了車，而列車開出時，女兒看到車外有異樣，但爸爸睡了，而車也開出了，去斧山的車程約一小時，列車開出不久，那個受傷的人，開始病發抽搐，列車服務員協助她時受到襲擊，很快便變成喪屍，而且快速地漫延，各人紛紛逃往前面的車卡，有些人不幸被咬，有些人走到前面的車卡阻止了喪屍，列車根據控制室指示去到一個站停下來，待軍隊救援，孔劉在未到站時聯絡了朋友，得知到站後會被隔離，他與朋友夾好在指定出口等，他帶著女兒不和其他人走，卻發現所有軍人已變了喪屍，各人唯有返回喪屍列車.......!

套劇拍得好緊湊，睇到好緊張，喪屍變得好快，幾乎一咬到，過一陣就變喪屍！主角比好大量喪屍追殺，所以好緊張，套戲有講D人性醜惡，不過唔係好到肉，結局有點出人意表！

Panino Giusto

今日開始放大假，瞓醒唔知食乜好，本來想煮包水餃食，原來雪櫃已經冇存貨，走去又一城食野，今日星期六應該好多人，去到商場，去睇睇開左兩星期的意大利餐廳有冇位，一點鐘都竟然有位喎！

見餐牌主要係意式三文治、同埋 Ham、Cheese 的選擇也多， main course 都係意式雲呑、闊條麵之類，我叫左個煎牛柳配焗薯粒，同埋一杯 Earl grey tea，坐著等的時候，見店員團團轉好似好忙，因為我冇玩手機，在看他們工作，可能令佢地覺得我想叫人，所以先後有4個侍應問我叫左野未／叫左乜野？不過佢地亦先後3次攞左三碟我冇叫的食物比我！而我在喝茶等主菜的時候，侍應想再奉上另一壼茶，見我已經有茶才取回去，看來頗混亂，等了三十分鐘才有野食！

牛柳約五成熟，有小小血水，牛肉質素都ok，薯粒比較爽身，個人喜歡粉一點的！整體食物不錯，店員態度都OK，只是落單有點亂。