香港潮州節

今日特登走去灣仔會展，就係為咗睇香港潮州節，因為佢係免費入場，所以都幾多人，而且以長者為主，今日剛好有肥媽表演，所以就更多人，其實呢個展覽，真係講潮州嘢嘅係好少，都係講少少僑批，其餘大部份係食嘢，應該叫做潮州美食節🤭 有好多係潮汕牛肉丸，因為要冷藏所以我都冇買，佢亦都有啲即食嘅，亦有唔少試食，當然要排隊攞，我就冇排到，原先見到一檔煎韭菜餃，好似唔錯，見冇人排隊，諗住轉頭去買，轉頭返去已經排晒隊，所以又冇買到，淨係見到嗰啲潮州粿公仔，覺得好得意，不過佢係非賣品，所以影吓相就算！

行咗個圈冇乜嘢睇，就行咗去睇新開嗰間京東，佢未正式Grand Opening，暫時係soft opening，店嘅面積都幾大，都好多嘢賣，除咗電器仲有賣座廁、鋅盤等浴室用品，而且好多產品佢都有得試機，真係幾吸引，不過暫時冇需要買電器，所以純粹參觀！