2026年3月北海道自駕遊 Day 6 - 釧路和商市場、帶廣市、幸福駅、札幌市

今朝check out 之後去河邊地標Kushiro字影相，跟住去旁邊有個魚市場，但係太早未開😅，跟住去咗魚市場叫做和商市場，呢度都幾熱鬧，我哋想食蟹，行咗幾檔，有一檔即場秤咗隻蟹俾我哋睇，只需要¥6,130 ，我覺得新鮮長腳蟹嚟嚟講算平，但係好友見到有一檔賣已經煮熟咗嘅蟹，兩隻¥1,600 😳當然佢唔係新鮮嘅蟹同埋比較細隻，不過呢個價錢都冇嘢可以挑剔，所以買咗兩隻試吓，其實我偏向想食新鮮嘅長腳蟹，不過佢哋覺得呢隻好抵，所以都係買嚟食，另外再買咗少少刺身，呢度有一啲座位俾你坐喺度食，亦都有幾檔係賣海鮮丼，自選海鮮，我哋唔想食飯，所以就冇買丼食！刺身正常，蟹就麻麻地，始終唔新鮮，冇鮮味！

跟住揸車過去帶廣市，上次係在帶廣市報失航拍機，當時食咗個豚肉丼覺得好好食，今次食第二間，呢間叫做ぶた丼のとん田，都幾多人，不過佢座位都唔少，等咗10幾分鐘就有位，佢嘅豚肉丼主要係唔同部位嘅豬肉，同埋唔同份量嘅價錢，我哋一人叫咗一碗，我就食豬腩肉，店員唔小心倒瀉水落我度，只係濕咗少少，店員都好緊張，仲即刻換過第二張枱俾我哋，之後店長仲要埋嚟say sorry😅 其實只係濕咗少少，問題不大👌🏻個豚肉多味道都唔錯，不過冇上次食嗰間咁好食，食完飯我仲喺出面收銀處，買咗杯軟雪糕食，佢呢度有豚肉丼汁賣！

食完飯，揸半個鐘頭車就去到幸福站，之前好友已經嚟過，我哋就第一次嚟，呢個站係已經停駛咗，只係擺咗兩架火車喺度俾人影相，火車嘅旁邊好厚雪，我哋喺度影相又玩雪，玩到好開心😁 都玩咗成個鐘頭😄

揸返車過去札幌市，都要三、四小時車程，中間有在道の駅休息，返到札幌市，先去酒店check in ，再出去食飯，今晚冇訂枱，所以喺市中心搵吓有咩食，不過行咗幾間都冇位，最後決定去拉麵橫町食拉麵就算，雖然呢度有好多間拉麵店，不過間間都要等位，我哋揀咗一間冇咁多人，叫做一角，店入面只有八個位，呢度嘅拉麵店間間都唔大，呢間只有一個人做嘢，我哋要分開坐，坐低先去售賣機俾錢，跟住交俾師傅煮麵，呢間嘅麵都唔錯，有兩款豬肉，都好食，個湯都唔錯，食完就走啦，因為出邊都好多人等位！跟住喺藥妝店行一陣，佢哋買咗少少嘢，跟住就返酒店！

酒店住後感：
Holiday Inn & Suites by IHG
酒店好新淨，房間都有啲空間，酒店提供軟硬兩款枕頭，都好貼心，浴室都幾大，酒店亦有浴場，酒店提供嘅早餐都唔錯，食物嘅選擇都多，酒店嘅位置亦都近狸小路第7段，旁邊仲有AEON超市同便利店