星期日嘅早上，由酒店隻窗望出去，冇人又冇車，好靜，我哋check out之後，揸架車去釧路，先喺附近食個早餐，去咗美芳町，我哋至愛嘅コメダ珈琲，順便食埋我哋前幾日買嘅扇貝牛油，用嚟搽麵包，食到一絲絲嘅扇貝肉，鹹鹹地都幾得意！又攞埋我前日喺船上買嘅棉花糖，擺落咖啡度，浮喺咖啡面好得意！😍見佢哋出左瑪德蓮蛋糕，又買嚟試吓！
食完早餐，我哋揸車去咗端野町，仍然係網走市，有間網走水產直売所，呢間有招呼遊客堂食，遊客就坐樓上，樓下就係賣水產手信，亦都可以堂食海鮮丼，我哋行咗一陣買咗粟米湯粉，買包大嘅，大家share一人10條😅
去到美幌町，見到一大片雪地，所以停低架車影吓相，好有就放架航拍出嚟，追住我哋架車影，點知又撞到樹🥺，根據定位去搵返部機，但係搵咗成個鐘都搵唔到，好有決定放棄，真係好邪，上次佢又係在北海道唔見咗部機，相隔六年，再一次在北海道唔見部航拍🤦🏻♀️ 不過今次佢冇上次咁唔開心，第一時間諗報失同埋claim保險🫣
跟住揸車去阿寒湖愛努Kotan，呢度好似一啲部落民族村咁，其實係一條好短嘅街，有好多部落嘅裝飾，亦都有啲專賣木製飾品嘅商店，反而冇手信賣，我哋行咗一陣影一陣間相就走！因為都冇乜特別嘢睇，不過順路經過就望吓，反正係唔使俾錢！
然後再去阿寒湖丹頂の里，主要係睇丹頂鶴，佢呢度有個養殖場，我哋去到嘅時候除咗我哋只有另外一家人，可能因為佢就快關門，所以冇乜人，入場要俾錢，離遠睇吓啲丹頂鶴，再喺場館睇吓展覽，介紹丹頂鶴嘅生長，我哋睇咗一陣就走！
跟住揸車去釧路市嘅Workman Plus，行咗差唔多一個鐘，因為好友去搵航拍機嘅時候整到條褲好污糟，所以即刻買條褲，另外佢冇帶防水嘅鞋，所以對鞋入晒水，即刻買返對防水鞋，我就買咗一套減疲勞嘅睡衣🤭
先去酒店check-in放低行李，跟住去食嘢，原本想去一間居酒屋，去到見佢只有一個客，但係佢哋唔招呼非日本人😅所以冇得食，跟住搵咗另外一間，叫做黑丸くろ〇，都係居酒屋格局，叫咗啲串燒、刺身、餃子等等，食完飯就去咗附近嘅警署，今次好友搵咗一個流利日語嘅朋友，喺電話同警員溝通，不過今次警員話冇紙本嘅報案紙，只有一個報案號碼提供，因為上次係有一張報案證明去claim保險，但係警員話而家係唔會提供，經過一輪溝通之後，唯有照攞低資料，返去問保險公司！
酒店住後感：
Hotel Global view Kushiro
酒店喺河邊，佢本身有兩座，reception 果邊本館翻新咗，另外一座仍然未裝修，因為我哋三間房有兩間喺本館，另一間喺舊嗰邊，所以知道我哋本館嘅房係好新淨，好友話佢間房係舊裝修！酒店有溫泉，如果需要浴衣同埋枕頭，可以喺reception旁邊嘅商店度攞，我就冇浸溫泉， 好友話佢係露天溫泉。房間空間唔多，床同枱之間僅僅放到一個打開的篋，浴室沒有浴缸，我覺得仲好，如果要浸浴就可以直接去浸溫泉！
沒有留言:
發佈留言