今日去坐第二架破冰船，因為約咗晏晝嘅船，所以上午我哋去咗北見市常呂町，去左一間叫做帆立屋，先去便利店買個包食，帆立屋位於公路上的一間海鮮產品店，呢度夏天會提供燒海鮮，即買即刻燒，冬天就冇呢個服務，所以店入面都非常清靜，就只有我哋幾個人，呢度售賣嘅貨品都幾多，有好多係急凍魚類，亦有唔少乾貨售賣，我哋就買咗即食濕帶子，我又買咗元貝俾阿媽，亦都買咗少少其他零食！
買完再去另一間叫北勝水產，主要都係買即食濕帶子，以前呢啲帶子都唔係咁貴，而家越賣越貴，大粒嘅好多時都要十幾蚊一粒！買咗少少做手信，就揸返車去網走市！
去到碼頭，等上船，又喺度shopping，我哋買咗幾盒咖喱，我就買咗支鮮奶飲👍🏻
等到夠鐘就上船，今次呢隻船就大啲，呢隻船反而要坐低層先至近距離睇到啲冰，佢有一啲貴啲嘅座位，喺船頭嗰邊，不過見佢都係室內，始終要出去室外睇，就冇需要俾貴啲，當然比貴啲嘅位，俾咗錢之後你就可以坐返呢個位，因為當大家出晒去睇破冰嘅時候，其餘嘅座位就會俾人坐到亂晒，我哋因為擺低咗外套同手套喺個位度，個位先至keep得到，其他出咗去睇破冰再返嚟就已經冇咗個位，要坐去第二度，隻船都係有三層，仲提供咗啲船員制服俾人着嚟影相，又有一個小賣部，不過呢度嘅主題係鹿，唔似得尋日嗰隻用蟹鉗咁得意，坐咗大約半個鐘，開始見到冰，全部人都湧晒出去睇，尋日坐嗰架破冰船只有少量冰，今次呢架就多好多！除咗成個海面都係冰，仲睇咗一段幾長嘅時間，大家都睇得好開心，因為有啲冰真係好大嚿，如果可以見到企鵝就好喇 🤣個個都睇到嘩嘩聲，我睇咗差唔多半個鐘，就入返去坐，見到隔籬左右啲人已經唔同晒，全程坐咗大約個半鐘，我諗如果去北海道睇破冰船，建議坐網走呢一架較好，如果book到第一班船可能會更加震撼，因為我哋睇嘅時候啲冰已經破開咗，我諗早上第一班船D冰未破開嘅時候去睇會震撼啲，尋日紋別果架可能要一二月去會好！
落咗船之後大家都好肚餓，就揸架車過旁邊有間流冰硝子館，因為喺架船埋岸嘅時候我哋已經望到，所以諗住過嚟睇吓，佢旁邊有個網走番屋，入面有兩三間食店，我哋揀咗間拉麵店叫做麵屋海嵐，叫咗四碗拉麵同埋一份炸雞，味道都唔錯，而且都幾大碗，食到好飽！ 我哋都有去硝子館行吓，不過冇乜收穫！
跟住我哋揸車去網走監獄博物館，過到嚟呢邊落雪，所以都幾凍，入場要俾¥1,500 ，呢度地方好大，好似一個小社區，仲要有鳥居，因為天氣比較凍，低過零度，我哋要急急腳行去室內，因為都好大風，呢個監獄係好多年前嘅監獄，好有歷史，睇裏面嘅間隔就知道好古老，展館有一段video介紹，仲可以揀粵語版，呢度亦都有商店售賣紀念品，因為好多同監獄有關，所以我就冇買😅
行到五點左右，我哋就揸車返酒店check-in，放低行李之後就出去食嘢，我哋去咗一間叫做トリトン迴轉壽司，去到要等位，等咗超過半個鐘先至有張卡位，呢度嘅壽司由¥130起，都幾多選擇，我覺得質素比くら壽司好，我哋要留肚今晚返酒店食拉麵，因為今晚住Dormy Inn ，佢係每晚都會有提供拉麵，要九點半後先有得食，所以我哋返去酒店Hea一陣，就落返去溫泉嗰層，食返碗拉麵，仲有雪條可以食，多數人都係浸完溫泉先食，我就冇浸溫泉，所以就咁食，佢哋都係食完之後先再去浸溫泉！
Dormy Inn 北見 天然溫泉常呂川の湯
酒店唔算好舊，可能曾經翻新過，房間都有空間可以打開行李，酒店嘅泊車位只有幾個，不過附近有幾個車場都係可以比住客泊，酒店有溫泉，我沒有去浸，所以唔知溫泉嘅情況係點，溫泉區有拉麵同埋雪條，亦都都有益力多，不過益力多只在日間供應，晚上係鎖起左的。酒店房入面提供一支水及一個甜品啫喱，放咗喺雪櫃，入住嘅時候真係要開雪櫃睇吓先知！😅
沒有留言:
發佈留言