今朝我哋喺Apartment飲咗咖啡，食埋尋晚食剩嘅餃子，今次我哋book咗兩架破冰船，第一架係紋別是嘅破冰，佢船頭有兩個巨型鑽，約左12:30 所以我地食完嘢， check out咗，就去附近影吓相，我哋去到海洋交流館，仲未夠鐘登記，佢呢度只有一間shop同一間便利店，仲有少少嘢食，見到商店有賣蟹鉗同埋帶子嘅公仔，我就買咗個帶子😆
等到夠鐘上船，我哋就坐咗上樓上，隻船有三層，而睇破冰嘅室外位就只有樓上船頭，中間同最低嗰層就要隔住玻璃睇，開咗船之後未見到有冰，所以落去中間嗰層小賣部睇吓，見到佢有得抽布蟹鉗，¥1,500 抽一次，有四五個size，當然大部份人都係抽到最細嗰個，我哋亦都唔想抽到咁大個，因為最細嗰個啱啱好放落隻手度，另外亦有得抽海狗，佢亦都有賣一隻棉花糖，都係海狗造型，幾得意，可以放喺飲品度，好似浮喺咖啡上面嘅浮冰一樣😍
坐左40分鐘開始見到有啲冰，船員會要求乘客睇一陣就要讓位俾人睇，可惜今日嘅冰實在太少，基本上只係見到幾舊，同想像中爭好遠！隻船來回接近個半鐘，落船果陣職員好熱情同乘客影相，彌補返睇唔到冰嘅情緒價值🤣🤣
跟住我哋揸車去一個碼頭，搵一間叫做湧鮮館買帶子，不過睇唔啱，反而買咗少少海鹽😅跟住經過一個湧別町海旁，影幾張相就走，跟住又經過一個サロマ湖，見佢個湖面結晒冰，所以又落車影吓相😅呢個就係自駕嘅好處！
我哋經北見市常呂町，又有間賣帶子的店，我哋買咗一瓶帶子牛油，諗住搵日早餐食麵包嘅時候搽咗佢！另外又買咗一瓶海膽海藻
跟住就揸車去網走市，先去酒店check-in，搞掂之後就去搵嘢食，網走市比想像中靜，除咗酒店側邊旅遊區比較熱鬧，過咗我哋酒店之後嗰段路都好靜，原本想去遊客區搵嘢食，但係行咗幾間都冇位，大家都肚餓，所以去咗一間酒店附近嘅燒肉店，叫做網走ビール館，去到都要等一陣先有位，呢度主要係食烤肉，佢都有自己做嘅啤酒，不過我就冇飲，啲肉嘅質素都唔錯，最驚喜係雞肉同埋羊肉，雞肉好鮮嫩，羊肉一啲都唔羶，好好食！食飽就返酒店樓下間7–11便利店行一陣，再返上房休息！
酒店住後感：
網走中央飯店的 Abashiri Central Hotel
酒店嘅位置喺最熱鬧嘅市中心旁邊，所以望出去都係比較僻靜，樓下就有一間7–11便利店，酒店提供幾個停車場泊位，但係酒店入面嘅泊位只有幾個，所以大部份要拍出街，大風雪嘅時候成架車就會積咗雪！酒店嘅內部比較舊，睇得出佢以前應該都算幾grand，而且應該係成日搞婚禮，因為大堂都有婚紗店，酒店共有六層，只有四層有房間，酒店沒有浴場，但係會提供一份浸浴片，讓你可以在房間自己浸浴，房間都有少少空間，可以打開個篋，房入面有一個迷你嘅電爐，應該係用嚟俾你熱住啲飲品，我冇使用，所以冇去研究佢，佢都係中央暖氣，所以只有開同關，對香港人嚟講暖氣太熱了，所以我哋通常都係關咗佢！😅
沒有留言:
發佈留言