又到農曆新年前整蘿蔔糕，都好懷念以前成班人一齊整廿幾底嘅日子，可惜朋友因為結識咗新嘅女朋友，同我哋減少咗聯絡，佢女朋友亦都唔准我哋去佢屋企，其中兩人中斷絕來往，所以應該冇機會再一齊整蘿蔔糕，呢幾年都係自己喺屋企整兩三底自己食算喇！
今次買咗
白蘿蔔4斤(3條)
300g粘米粉
75g澄麵
18g 馬蹄粉
500ml 水(開粉)
臘腸、潤腸各三條
瑤柱四粒
片糖1/3片
瑤柱我就早一晚浸咗先，因為都幾大粒，臘腸潤腸我就用安記，一齊蒸佢15分鐘，浸瑤柱水就留返一陣開粉，蘿蔔就將兩條刨絲，一條切粗條，蒸完嘅臘味就切咗片先，然後攞去炒，炒出香味之後裝起佢，原鑊炒蘿蔔，落片糖加蓋煮佢20分鐘，然後落胡椒粉同蠔油，份量就隨意，試一試味，唔夠味就落多少少調味，熄咗火先，再將蘿蔔水裝起，加埋瑤柱水，大約500ml ，攞去開粉，將啲臘味加返落蘿蔔度兜一兜佢，唔使開火，再落開好嘅粘米粉水，撈勻佢就得，之前喺上海街買咗錫紙兜，搽少少油落個錫紙兜度，再將啲蘿蔔糕鋪入去，一共有四底，如果裝滿啲可能三底都得，放入蒸爐蒸1小時，整完之後攞出嚟攤凍，抌咗啲芝麻上去先，攤凍再放雪櫃雪，聽日就可以煎嚟食👍🏻👍🏻
沒有留言:
發佈留言