2025年11月日本東至西長途旅行 Day 14 - 中目黑、代官山、日比谷公園、囯立新美術館

每次去東京都必去中目黑的Starbucks Reserve Roastery ，今朝去食個早餐先！記得上次嚟飲咖啡，走果陣見到要排隊取飛等候，今次唔太多人，我諗櫻花季節會好爆🫣 地下行左一圈，上去三樓酒吧，叫左件panettone ，因為聖誕先有，及叫左杯焦糖咖啡，坐吓relax 吓！見旁邊有位男士自己一個用相機影相，佢去洗手間時，相機就咁擺枱面，個人物品就咁擺凳上，只有日本先至可以咁樣做！不過呢度遊客多，如果全部係日本人就唔使擔心，有其他遊客都係小心啲好😅 飲完咖啡又落去shopping，買咗咖啡豆同埋一個夾，用嚟夾住咖啡袋口！

然後行去代官山，之前睇到網上有人介紹一間炸豬扒店，性價比高，所以見順路就過去睇吓，代官山呢個地方都幾清靜，聽講係比較高級嘅住宅區，路過一間歐洲式嘅餐廳，都幾靚，不過要等位，所以繼續去搵我要去嗰間豬扒店，去到一間Muji Labo ，旁邊有條樓梯落去商場，樓梯底有間小店叫做とんかつげん田，係一間專賣炸豬扒嘅小店，餐牌上所有套餐只需要¥1,300，有湯有飯有炸豬扒，都非常抵食，豬扒係薄切，食物嘅質素不過不失，真係性價比高！抵食之選👍🏻順路可以一試！

食完嘢行去火車站附近有個叫做Forestgate  嘅商場仔，呢度有間Blue Bottle，有間麵包舖，同埋幾間小店，行過隔籬街都有啲特色嘅甜品店，不過我就冇去試，直接去火車站嗰邊，行過去惠比壽站，再搭車去日比谷公園！

依家係紅葉季節，今次日本之旅都好多地方有紅葉睇，嚟過東京咁多次，都未去過呢個公園，所以想去睇吓，日本好多公園地方都好大，呢個雖然喺市中心，但係都好大地方，呢度有個湖，都好多人喺度影紅葉加銀杏，因為而家呢個季節銀杏又未過，紅葉又出咗，所以兩樣都可以影到😍😍呢度環境都唔錯，我沿住個湖影咗紅葉同銀杏，然後就行過去日比谷站嗰邊出返去火車站，搭Metro 千代田線去乃木坂站！

今次特意去囯立新美術館影相打咭！因為館內建築比較有特色，去到已經差不多日落，不過仍夠光影相，美術館嘅地下係餐廳同商店，當然佢有好多展覽館，不過我冇特別去睇佢嘅展覽，商店亦都冇乜特別嘢啱心水，我淨係上上落落去影唔同角度，影完再出館外影吓，已經開始天黑！

跟住行過去六本木，搭返車返酒店睇吓附近有冇嘢食，近JR 火車站嗰邊就比較熱鬧，但係因為我搭Metro，所以唔過去嗰邊，純粹喺酒店附近睇吓有乜嘢食，不過真係冇乜選擇，見到有一間食蕎麥麵，叫做浅草橋 百そば，我叫咗一碗蕎麥麵，味道不過不失，不過唔係好夠飽，見隔離有間賣生果蔬菜嘅舖頭，門口擺咗個爐喺度賣煨番薯，所以買咗個返酒店食，天寒地凍都係特別想食番薯🤣