2025年11月日本東至西長途旅行 Day 10 - 上野、築地、銀座

今日好友飛過嚟 join我，約咗喺上野站等，在秋葉原轉車去上野，之前喺6號月台有間牛奶店叫做酪，而家5號月台都開咗一間，店名唔同，呢間叫ミルクスタン，但係賣嘅嘢好相似，因為約咗好友，所以冇時間試，我哋book咗酒店喺上野，佢零晨機到，所以我昨日先到東京，今朝唔使咁趕喺宇都宮過嚟，大家差唔多時間到達上野，先去酒店擺低行李，跟住就出去食嘢！

去咗築地場外市場，去咗うに虎，佢而家都有好幾間分店，而且亦都唔需要再排隊，我哋去咗其中一間分店，叫左兩個海鮮丼，跟住再去買蜜瓜食，然後例牌去米本咖啡飲番杯咖啡先，今次去咗另外一間分店，比較細間，而之前鍾意食嗰間芝士蛋糕已經執咗笠😓

喺築地行咗一陣，冇特別買嘢，就行過去銀座，又去咗UNIQLO買衫，好友要幫朋友買野！買完嘢我哋行去有樂町嗰邊，因為諗住食牛舌の檸檬，知道佢收三點，我哋差唔多兩點先到，去到只有三四個客，唔使等位，我哋叫咗牛舌嘅套餐，因為店員通常推介牛舌+牛肉套餐，我哋淨係想食牛舌，雖然佢係好厚切，我都係覺得略為生咗少少，如果每邊煎一煎會好啲😅

食完飯去咗附近行吓街，跟住就返去上野，因為諗住今晚自己煮，所以去上野買餸，去火車站附近嗰間吉池，上次喺度買過海鮮，今次就買刺身，同埋買咗一包生食用嘅蠔，再落超市買咗牛肉同菜，今晚食壽喜燒同魚生😋😋

去酒店check-in，將啲食物擺咗落雪櫃先，跟住就開始洗嘢，準備煮食！買咗兩款牛肉，黑毛和牛同埋松阪牛，每樣兩片，黑毛和牛就略為少油花，所以松阪牛好食啲🤭好友第一次食生食用嘅包裝蠔，話好好食😆

酒店住後感：
Monday Apartment Shin Okachimachi
已經唔係第一次住Monday嘅Apartment，上野呢一間係我第一次接觸，上次係好友兩公婆住，我過嚟食飯，而我就自己住附近嘅APA，今次第一次入住呢間，上次住秋葉原嗰間，又住過日本橋嗰間，基本上格局係一樣，兩張單人床，一張梳化，梳化上面有張摺埋咗嘅上格床，最多可以住四個人，有廚房，有洗衣連乾衣機，浴室乾濕分離，洗手間喺另一邊，今次呢間張枱仲大啲，兩個人住就好寬敞，今次見佢嘅餐具有用膠袋包住，可能佢哋想自己洗一次啲餐具先俾客用，所以要包住膠袋先至知嗰啲係已經清潔咗，咁樣都好！我同好友因為之前已經住過，所以都係鍾意住呢一類型apartment ，可以自己煮，最重要可以洗衫！