2024年12月東京伊豆自駕遊 Day 4 - AO terrace / Izu Panorama Park 伊豆パノラマパーク 、熱海、十国峠Glamping

今朝起身就落去酒店嘅餐廳度食早餐，早餐應該係九點完結，我八點幾先至落去，所以啲嘢食都清得七七八八，食物嘅選擇本身都唔多，主要都係西式早餐、沙律同埋麵包，我就烘咗兩塊多士，再加杯咖啡，我哋對住個富士山食早餐，都好開心，因為好有冇book到富士景房，所以佢哋房係睇唔到富士山，我今朝就睇咗一陣先至落嚟，食完早餐再上去攞埋啲行李落嚟，出面好凍，見到有啲車嘅玻璃都結咗霜，我哋嗱嗱臨搬埋行李上車，架車凍咗一晚都好冰冷，要即刻開返暖氣！

我哋揸車去伊豆 AO Terrace ，40分鐘左右就去到，泊好車就入去買飛搭纜車，纜車大約10分鐘車程，上到去係可以好清楚睇到富士山，雖然有啲遠但係好靚！難得天氣咁好，又冇雲遮住個富士山，仲有好多個打卡位，所以係咁影相，呢個地方都唔錯，都有兩三間食店，其中一間仲有啲座位對住個小水池同富士山，但係見佢有限時，就算你有幫襯都有限時坐幾耐，呢度另外有一個水池俾人影富士山倒影，影出嚟都好靚，再行入啲有條路行上山，佢就唔係好高，上面起咗一個好似迴廊咁樣嘅行人道，仲起咗一個位伸出去嘅平台，仲係透明玻璃圍邊，俾人同富士山打卡，及設計都好聰明，而且呢度唔係好多人，就算影耐少少都冇問題，因為冇乜人等，我哋都影咗成個鐘頭先至走，落返去纜車站又係手信店，呢間手信店賣嘅嘢，除咗手信之外仲有好多野賣，而且種類好多，例如富士山主題嘅餐具、袋、毛巾等等，有D都好靚，我哋都買咗少少嘢，跟住就去下一站！

我哋過去熱海市中心，大概揸咗40分鐘車就去到，不過搵唔到位泊車，可能正值午膳時間，去咗好多個停車場都係滿，原本諗住喺其中一個停車場等吓，睇吓有冇車走，跟住又話叫我哋先去排隊買布甸🍮，佢自己再去搵位泊車，我哋排咗一陣佢就到，可能啱啱過咗食飯時間，佢都搵到個位喺附近，今次排呢間叫做熱海プリン，在熱海有幾間分店，我哋排呢間係可以有得坐低食，排咗20分鐘，我揀咗最傳統嘅口味，佢會跟一小支糖漿，呢支糖漿嘅造型都係好似河馬咁，好得意，店入邊嘅座位是設計到好似一個溫泉浴場，當然要狂影相🤣布甸嘅味道都唔錯，蛋味都好濃，好食！食完布甸我哋再揸返車去商店街嗰邊，呢條商店街唔係好長，好快就行完，不過我哋冇買到嘢！

行完街，要出發去今晚煮嘅glamping ，差唔多一個鐘頭先去到十国峠！去到已經四點，上到山上高係非常之大風，而且好凍，先去Service Centre做check-in，之前酒店已經通知咗我哋住邊一間屋，我哋跟返指示泊返喺我哋間屋嘅泊車位，尋晚已經執定細件行李，因為唔想帶大件行李上上落落，因為始終呢度係山上高，而且要行樓梯，所以今朝已經執定輕便行李，方便今晚入住，一打開個車門，凍到不得了，大家都好急腳步衝入屋，我哋租住呢一間貨櫃屋 glamping，揀咗一個比較細嘅單位，因為價錢都頗貴，我哋住呢間係一個40尺櫃，入門口係一張碌架床，再入啲係廚房同廳，跟住係一張雙人床，廁所同浴室就喺碌架床嘅另一邊，屋外面有個燒烤爐，同埋有一張枱，亦都有一個爐俾你燒柴，亦都提供咗一袋柴，我哋放低嘢之後就燒柴，希望可以暖啲，但係完全冇料到🤣🤣　因為實在太凍同埋太大風，我哋亦都有嘗試上天台睇吓，不過只係影咗啲相就即刻走，因為真係太大風！租住呢個camping佢係包咗兩餐食物，晚餐已經擺咗喺屋入邊，有前菜、牛扒、豬扒、雞肉、仲有一煲芝士蕃茄醬，有晒Menu教你點樣煮，大部份要用燒烤爐，但係因為實在太凍，所以我哋選擇喺室內用電磁爐煮，不過牛扒都係用咗出邊嘅爐煎，辛苦好有要捱凍喺出邊煎牛扒😅因為佢都頂唔順，所以只係煎咗牛扒就返入嚟！我哋自己都買咗啲嘢食過嚟，同埋佢廚房都有齊餐具，我哋又買咗梅酒過嚟飲，食得好開心！

夜晚呢度開晒燈都幾靚，不過成晚啲風聲都好勁，亦都感覺到個貨櫃有少少搖動，同埋我哋應該冇綁好過帆布，所以成晚金屬嘅碰撞聲都好嘈，不過半夜突然間靜咗，我諗可能有職員幫我哋綁返好啲帆布，因為依稀見到有人揸電筒路過，之後就靜咗落嚟，可能隔籬左右啲屋投訴🤣🤣

酒店住後感：
The Glamping 箱根十国峠
上次同好友在鹿兒島住過glamping之後，好友都對佢情有獨鍾，呢個glamping嘅位置喺山上高，基本上你唔揸車係好難上去，上去嘅時候見到原來旁邊係一個墓園，不過我哋嘅位置比墓園高，所以喺個貨櫃屋外面都係睇唔到個墓園，上次住嗰個glamping係在平地郊區，今次喺山上高又係另一個體驗，可惜天氣實在太凍，留喺室外嘅時間比較少，睇資料都見到呢度有一D貨櫃屋係大啲嘅，我哋係住一個貨櫃嘅size，有啲係兩個或者三個貨櫃嘅大細，我哋都好鍾意呢個glamping，因為個景又靚，又對住個富士山，而且未住過貨櫃屋，大家都話下次夏天再嚟，應該會好好多，呢度嘅設備都好新淨，提供嘅食物質素亦都唔錯，所以我哋都期望可以再嚟☺️