今朝9:00 出發，在附近便利店買D野上車食，因為要揸個幾鐘頭車先去到 Fuji Safari Park ，呢個公園可以自己揸車入園，喺車上面睇動物，亦都可以選擇撘佢哋嘅籠車，可以餵嘢食俾動物，我哋選擇咗自己揸車，因為未試過呢個體驗，雖然唔可以餵動物，不過都可以近距離觀看，職員都強調好多次，要鎖好門，唔可以打開窗，我哋俾完入場費之後，就由第一個鐵閘開始進入動物園，個閘嘅設計好有侏羅紀公園feel😆我哋架車前面有一架園區嘅籠車，車係一個鐵籠咁，每邊大概坐十幾人，第一個zone 係 Bear zone ，有幾隻黑熊，見到籠車就埋去搵食，除咗籠車，仲有D職員揸斑馬圖案細車巡邏，必要時驅趕動物，跟住係 Lion zone、Tiger zone、河馬、斑馬、長頸鹿、駱駝等等，D動物知道籠車先有嘢食😂，所以唔係好行買嚟我哋啲車度，所以冇乜驚險場面，不過可以近距離睇到好多唔同嘅動物，我哋都睇得好開心！
離開咗大型動物嘅zone，另一啲小型動物嘅zone 就要泊低架車，佢呢度有幾個停車場， 1號停車場已經滿咗，所以要泊去遠啲嘅2號停車場，見到2號停車場得一架車，但係呢個位置可以好清楚睇到富士山，真係行多幾步都抵，而且佢都唔係真係行好遠，因為佢有另一個入口喺2號停車場呢邊，要行晒成個園區都係會經過呢度，我哋去睇咗一啲小型啲嘅動物，例如箭豬、袋鼠🦘等等！行咗成兩個鐘先至走！
攞車嘅時候再影吓富士山，因為頭先泊車嗰陣時都有少少雲，而家冇雲遮擋，正！
揸咗大概40分鐘車，就去到三島Skywalk，我哋一早book咗去呢度玩 Segway，呢度有條大吊橋，當然要影相留念，然後要行呢條吊橋過對面玩 segway，喺吊橋嘅側邊見到人哋玩 zipslide ，好友想玩，但係預計唔夠時間！過咗橋之後，先去辦理subway嘅費用，不過導師遲到，我哋要等多20分鐘，所以喺附近行吓，不過呢邊好凍，所以盡量喺室內暖吓！等到導師到咗，原來只有我哋四個人，首先係指導基本嘅操作，導師嘅英文都係麻麻地，大家明就得喇🤣 跟住導師上斜路，再入去一個樹林，冇錯係樹林，我哋要喺啲樹之間轉來轉去，都幾好玩，因為都有D難度，始終都係第一次喺十勝玩Segway最開心！導師又喺中途同埋臨尾幫我哋影咗相，而且影得幾好，都玩得開心！
我哋先去酒店做咗check-in先，呢度過去酒店要50分鐘，我哋唔放行李上房住，純粹做咗check-in先，跟住就上返車，過去御殿場個outlet，大概半個鐘頭車程就到，但係搵泊車搵咗好耐，因為附近有人指揮交通，叫我哋泊去一個位置我哋覺得好遠，因為我去過呢個outlet，記得有一個多層停車場好近outlet嘅，所以我哋搵返嗰個停車場，兜咗幾個圈先至搵到，拍完架車行落一層就已經係outlet喇！我哋去food court食少少嘢先，因為諗住今晚食燒肉，所以唔想食咁飽，買咗個crepe ，食咗兩啖，就去行街，好友又買咗兩對鞋，好友嘅家姐更加係買咗三對鞋，我就買左支 Steam cream 😅行左兩個鐘就走！因為已經差唔多八點喇！
The Celecton Hotel
酒店嘅位置比較偏僻，唔揸車應該都好難過到嚟，酒店亦都唔高，應該只有四五層，門口有一個好大嘅停車場，酒店嘅設計有一邊係向政府士山，好友揀咗呢間價錢唔貴，又有富士景，我訂房嘅時候就揀咗富士山景嘅房，雖然夜晚check-in，但係都睇到富士山白色嘅山頂🗻😍(夜晚因為玻璃窗反光，所以影出嚟個富士山則咗一邊，實際係可以睇晒成個富士山） 酒店嘅空間比較細，雖然係富士景，但係要企喺度睇🤣，不過喺房嘆住暖氣睇都好舒服！因為出面好凍❄️ 朝早都見到啲車嘅玻璃結霜，我哋有訂酒店早餐，不過食物嘅選擇就唔係好多，不過知道酒店嘅位置比較荒蕪，附近冇嘢食，所以點都要book埋早餐！明早再update 富士山景😍
沒有留言:
發佈留言