2023年11-12月東京自駕遊 Day 6 - 築地、原宿、新宿

今朝一早去築地，泊好車一出嚟就係場外市場，我哋目標係去食五種海膽飯，我哋要去嗰間叫做築地虎杖うに虎，疫情前我去過佢哋嘅本館，要上一層的，去到門口已經有廿幾人排緊隊，於是行去佢個別館，只有得一個人排緊隊，咁我哋都唔考慮，直接排別館，佢哋開八點，排10分鐘左右就開門，不過別館呢邊係半露天，所以比較凍，雖然佢有D膠簾，但係佢冇打開，所以都係有D凍！

店入面只有八個座位，主要得一個師傅，同一個助手，店裏面會展示今日嘅海膽來自邊個地方，主要都係北海道幾個地方嚟，我哋叫咗兩個海膽飯，一個係有埋拖羅，另一個就淨係海膽，另外再叫咗四隻牡丹蝦，同埋兩份大拖羅！海膽飯好大碗，其實叫細碗都夠食，不過大碗有六種海膽，而細碗只有五種，同埋大碗嘅有埋三文魚籽，師傅攞晒五盒海膽出嚟show俾我哋睇，第六種就係用鹽水浸住嘅，話係最靚嘅一種，雖然好友碗飯已經有拖羅，但係都唔及散叫果D大拖羅咁靚！牡丹蝦同埋大拖羅都非常好食，海膽六種味道都好鮮甜，好好食，食得非常之飽！正👍🏻👍🏻👍🏻

食完海膽飯，我哋再去掃街，買咗燒生蠔食，呢個就普通D，跟住就去搵咖啡飲，之前記得有一檔咖啡，而家好似搬咗入舖，見到另外有一間叫做米本咖啡，印象中之前冇見過呢度有呢間咖啡店，見佢入門口嘅位置好多人，原來裏面仲有座位，而且冇乜人，我哋就入去裏面坐，我哋四個人當中有三個都飲咖啡，而唔飲咖啡果個就去對面買抹茶，然後一齊坐低飲，估佢唔到築地入面呢間咖啡店又幾好飲，可能因為我哋飲嘅係藍山一號🤭 飲完咖啡之後，又睇吓佢D咖啡豆，揀咗一包送俾朋友！

行返出去停車場果邊，見到有一檔賣鐵板燒牛肉，叫做伊八，佢哋賣嘅係神戶牛，見到有牛肉串，同埋見佢即刻鐵板燒，所以買一串試吓，價錢都唔平要¥3300，不過又真係幾好食，如果買成塊牛扒🥩要過萬円，就真係貴咗D😅 食埋呢個真係好飽，跟住行去買cheese cake，之前食過呢間eFfe ，我覺得佢嘅cheese cake好好食，諗住買一個細嘅上車食，佢竟然出咗條裝，仲擺出門口外面賣，我哋買咗三條，攞上車度食，跟住行外面大街去停車場，經過好出名嗰檔牛肉飯，好想試不過太飽了，我哋話睇吓搵一日朝早再嚟試！

行到去停車場入口，見到有個自動販賣機，係買咖啡嘅，大家又想試吓🤭 於是又買咗三杯，攞上車飲用嚟送cheese cake 😆 呢個自動販賣機嘅咖啡都唔錯，下次可以再買！

跟住揸車過去原宿，因為好友想買波鞋，我哋上咗車之後就食cheese cake，大家都話好味，連唔係咁鍾意食cake嘅司機，都話好食，好快就去到原宿，搵個位泊低架車，就出去行街，我哋主要係去搵Air Jordan，因為好友好鍾意籃球同埋米高佐敦，我哋一路行，順便睇吓其他嘢，我都好多年冇嚟過原宿，我哋中途又買咗一串長長嘅炸薯片，又去咗一間叫做The Tokyo Matcha，去飲抹茶，仲食埋抹茶雪糕，然後就行去Nike專門店，開頭揸車經過嗰陣時以為佢係裝修緊未開，原來係未夠鐘開門，而家行過去佢就開咗，就入去睇吓，見到有個位好似一間房咁，有張梳化同埋掛咗好多同米高佐敦有關嘅海報，好友睇唔啱D鞋，買咗件T恤就走，行返去之前睇過嘅其中一間舖頭，佢哋買咗兩對鞋，足足行咗四個鐘😅

要揸車過去新宿，因為今晚訂咗食燒肉😄 泊好車之後行過去新宿站西口果邊，之前在思憶橫丁旁邊有間寵物店，果個位置已經夷為平地！今晚我哋訂咗六歌仙，呢間燒肉店都頗耐歷史，好多朋友都食過，但係好少聽到有人會再去或者極力推介，所以我都有所保留，不過好友話佢朋友食過話好正，因為佢價錢都唔係平，所以今次去試吓！今晚都座無虛席，我哋預早訂枱嘅時候已經訂咗要乜嘢餐，我哋個餐除咗有燒肉之外仲有壽喜燒，牛肉有好多個部位，我哋揀咗幾個唔同嘅部位去燒，我覺得個壽喜燒都ok ，當然同木曾路比就比下去！😅 整體嚟講唔算話好出色，有一兩款肉係幾好食，而且佢係放題，所以都會食到好飽！不過都係嗰句，唔會再嚟，因為我覺得個質素未去到呢個價錢！

食完燒肉，我哋喺附近行咗一陣間，又去京王百貨買手信，原本想買NY cheese， 但係咁夜當然賣晒啦！所以買咗其他手信，順便喺FANCL買少少嘢，然後上去退稅，跟住就返酒店，返到酒店冇幾耐，佢哋話要食宵夜🤨 我就因為太飽了，所以冇去食，佢哋三個自己去食！