今朝唔使咁早，八點集合，不過我地七點幾出左門口，在樓下行左一陣！齊人就開車，架車泊左喺街一晚，成架車凍冰冰，即刻要開暖氣！
第一站去中目黑Starbucks ，我同其中一個好友都各自嚟過一次，另外兩個就未嚟過，由酒店出發，大約揸車半小時就去到，我地泊左架車在旁邊DONKI 的地庫停車場，再行幾步過去，在門口影幾張相就入去，因為好凍，可能時間尚早，冇乜人，我地先行一轉，每層睇吓！ 見到今期D商品都好靚，走果陣先再睇！
我地在地下果層睇左食乜先，再上一樓睇吓D茶，好友的男友好喜歡飲抹茶，呢到有石𦥑抹茶🍵，喏晒佢！杯石𦥑抹茶🍵係冇得揀size 同甜度，而且只有熱飲，應該係已經調校咗最佳嘅效果，好友話好好飲，所以佢要飲多一杯！我地就叫左三杯Barrel aged cold brew，話個barrel 係浸過 Whiskey ，杯咖啡用個細的玻璃樽裝住，而個玻璃杯就有一舊四方形嘅冰，十足十人哋飲威士忌嘅杯同冰一樣🥃，杯咖啡滲出淡淡嘅威士忌味，都幾好飲，我哋另外叫咗啲麵包同牛角包，上咗去3樓坐低食，chill 左一陣，見到有Starbucks card賣，係成張黑色嘅好有型！我同好友👭🏻每人買咗一張，張卡要先充值¥5000😄 之後每次充值最少¥1000 ! 食完嘢，我哋周圍影吓相，唔知係咪因為就嚟聖誕節，呢度多咗一個聖誕嘅裝飾，喺好似一間玻璃屋仔咁，好有聖誕氣氛，我哋又出去outdoor座位度影吓相，落返一樓時，好友再買多一杯凍抹茶飲🤣
去到樓下，大家就 shopping 😂我買咗咖啡豆俾屋企人，見到D水樽好靚，但係屋企太多水樽啦，所以都係冇買到，另外買咗個裝咖啡豆嘅容器，我諗住用嚟再花茶🤣🤣 即刻用咗張Starbucks卡嚟找數，見佢張卡係要過機唔係拍卡，都驚佢好易整花張卡😅 等我研究吓裝佢個Apps，可唔可以將張卡入落個Apps度😄 我地都玩左兩個鐘要出發去渋谷了！
我哋book咗 Shibuya sky 12:20 pm ，揸架車過去渋谷泊低咗先，原本想拍上次同好友泊果個停車場，但係因為我哋架車太高入唔到，所以去咗附近另一個停車場，泊完車行返出去十字路口，再上Shibuya sky ，我地早左唔入得！在附近行左陣，等夠鐘再入去！
今日都幾多人，天氣好好係有D曬！我地冇特別排隊影打咭位，只係圍住全場行一圈影相，所以用左一小時就影完！落返商場冇乜野啱食，行去附近搵一間叫做魚秀的店，係食迷李丼的，我地搵左一陣先搵到，店入面唔大，不過應該有樓上，我哋坐樓下卡位，睇吓個餐牌，迷你丼有幾個套餐選擇，我哋揀咗最大個set，可以一次叫十種丼，另外再叫兩款正常size魚生丼，迷你丼係兩款魚生幾好，其餘都有D似中式嘅餸😅，魚生丼就普普通通！
行返去停車場攞車嘅時候，經過十字路口，見到上次有一間賣Burger 好多人嘅餐廳，已經冇咗，可能佢只係Pop up 形式做短時間，所以先至咁多人！
攞車之後，我哋就揸車去東京鐵塔！我記得人生第一次去日本嘅時候，跟團去過東京鐵塔，但係印象已經係好模糊，因為之後一直都冇再去，我哋揸車去咗最出名嘅打卡位果個停車場，停車場有條樓梯行出去東京鐵塔，果條樓梯就係打卡位，我哋出嚟嘅時候見到有對情侶喺度影緊相，佢哋影咗好耐，原本想等佢哋影完之後我哋就影，但係諗諗吓冇理由咁少人，原來有條隊排咗喺路面上高😅 原本都打算排隊，但係見每一組人都影好耐，起碼15分鐘，前面有成10組人，我諗都要排兩個鐘，所以我哋放棄咗 😅
直接上去東京鐵塔，先買飛入場，佢有兩種飛，一種係上到最高，我哋當然買最高果隻啦，首先要搭𨋢上咗去中層，然後再轉lift上去，其實鐵塔入面都好細，可能係咁多年前嘅建築冇預到咁多人嚟觀光，上到頂樓嘅時候佢會有條片講解一下鐵塔嘅歷史，當初點解會興建，同埋咁多年前嘅技術可以做到預防避震，都已經好犀利👍🏻 呢度有個位有人幫你影相，之後可以落返去商店嗰度買！
我地到東京鐵塔果陣時三點鐘，個天仲好光，走果陣將近五點已經成個天黑晒，可以影埋夜景嘅東京鐵塔，都好靚，行返落去停車場攞車嘅時候都係經過打卡位，雖然冇去排隊，但係偷雞影咗一兩張，當然個位都冇咁靚！仲影到人哋添，下次有機會先再影！
跟住去食晚餐，今晚book 咗阿媽家姐(Omakase)，在惠比壽，(好友成日話惠比壽麝香葡萄，應該係以前一個日本樂隊個名，係由一班AV女優組成，所以應該好多男士會識，我有印象呢個名，但係冇印象有D乜嘢人）原本係想book另外一間，但係因為book唔到，再上網search類似嘅，就係呢間叫做鮨よしかわ(吉川)惠比壽，我哋book咗6:00 pm，但係5:30已經去到，所以喺附近行吓，不過附近都冇乜嘢行，純粹周圍兜吓再行返返轉頭，5:50 返到去，早咗少少都可以比我地入去，我哋係第一組到步嘅人客，眼見呢度有12個壽司枱位，另外有兩張卡位，同埋一間好細嘅房，只係坐到兩個人嘅啫，壽司枱位除咗我地四個，另外有四個香港人，兩個日本人，後邊卡位嚟咗六個日本人，佢哋要分開兩張枱坐，不過兩張枱都係平排嘅，而好細嘅兩人房就冇人坐，見到師傅準備食物嘅份量係十幾份，坐低先去洗手間，呢度只有一個洗手間，所以要輪流去😅
我哋叫咗D果汁飲，見到師傅好快手就準備開始，先嚟一個金目鯛同白子shabu shabu，好食👍🏻跟住有兩個人客而家先到，師傅就補返之前嘅食物俾佢哋，然後要開始幫佢哋追進度😂，跟住係刺身，有藍鰭吞拿、魚肝沙律、煙燻鯖魚，跟住我哋都係叫咗 sake 同白酒飲，我揀左師傅推介嘅奈良 Mimurosugi 純米吟釀，味道比較清甜，我叫咗一杯，但係師傅會成支酒攞過嚟俾我哋影相，好友杯白酒就一般，唔伏😆 到壽司🍣，就有比目魚壽司、帆立貝壽司、柚子金䱽魚、竹筴魚、魷魚、醬油鰤魚、海膽，個海膽係師傅直接放喺你手上俾你食，唔知係咪因為用手食，覺得特別好味D😂 跟住係火炙大拖羅，呢個大拖羅比火炙燒一燒，D油脂出晒嚟，一入口即溶，好味到不得了！😝😝 我哋大家你眼望我眼，講唔出有幾好食，大家個表情都係”好好味呀！”🤩🤩🤩🤩 跟住本來有炸生蠔，但係佢唔知咩原因，改咗做炸蟹鉗伴少少菜，就好似中菜炸蟹鉗咁都幾好食！跟住壓軸出場係佢哋嘅招牌菜，吉村特製厚卷，平時喺IG成日見到人哋post 出嚟，佢係有未孵化嘅雞蛋黃、海膽、大拖羅，捲埋做一條，然後再切一件件，佢分俾我嗰件剛剛好係頭果件，所以有兩個蛋黃，好好食！😆😆 呢個厚卷有跟一個紅麵豉湯，俾個厚卷蓋過晒所有嘅味道，個麵豉湯飲完都唔記得咗咩味🤣🤣 最後再嚟一個燒鰻魚，用紫菜包住，個紫菜同鰻魚一樣咁脆，好食到不得了 🤩🤩🤩🤩 對於我鍾意食鰻魚嘅人嚟講，只能夠講”好好味呀 ‼️‼️‼️”，最後仲有蛋卷同埋甜品，呢兩個就普通啦！都被比下去了🤣🤣 整體成餐都好滿意，我地食得好開心！埋單嘅時候淨係比飲品錢，因為訂枱時已經碌卡比左基本Omakase 費用，所以只係比飲品錢！👍🏻四個人一共¥62,810 埋單 💴💴💴💴
食完飯再去附近的惠比壽花園廣場睇燈飾，佢呢度每年都會擺個好大嘅 Baccarat 水晶燈做裝飾，之前2019年果陣有嚟過！支水晶燈應該冇變過都係果支！廣場佈置仍然好靚！我哋影咗一陣，又同另一好友FaceTime，跟住去咗旁邊個商場，佢哋喺Starbucks買咖啡飲，我就因為太夜所以唔飲，不過佢哋話呢間Starbucks D咖啡唔好飲😅 可能今朝飲完Reserve，所以有個差距喺度 😅
睇完燈飾就返酒店，時間尚早，我同好友就出去行吓，記得本館嗰邊有間 Life🍀超市，入去見都冇乜嘢買，因為佢都係比較住宅區嘅客路，所以賣嘅嘢都係啲民生嘢！見到店員貼半額貼紙在食物盒上，D人就跟住搶購，見好多都係百幾円，幾蚊港紙一盒真係超平，跟住我哋行去淺草寺嗰邊，呢度有好多食肆仍然營業，可惜我哋已經食飽咗，唔能夠再食，我哋行咗去Donki，但係裏面超多人，所以行咗一圈就走，兩條友又走去機舖打機，玩咗兩鋪Mario，好搞笑！然後行多一陣就返酒店休息！
沒有留言:
發佈留言