今朝一瞓醒就去浸浴，大浴場內只有幾個人，地方都比較細，不過設備都唔差，浸完上返房換衫，再落去食早餐，去到食早餐嘅位置，見到好多人，而且地方都幾大，早餐嘅選擇非常豐富，收費¥2000唔算平，但係以質素同埋選擇來講係超值，來到日本唔少得食生雞蛋配白飯，同埋納豆，呢度仲有刺身、芝士等，有齊我鍾意食嘅嘢，所以我地都食得好飽！
食完早餐，出發去余市，今朝一直落雨，日本氣象廳預告今日全日都會落雨，我相信佢都非常準確！我地揸車去余市蒸餾所，沿途嘅雨勢都好大，去到見到都幾多人，停車場幾乎滿左，而且有旅遊巴帶團過嚟，但係入到去又唔係咁多人？我地一去到先去買酒！因為好友要幫佢哥哥買酒，哥哥指定要2000’s 果支酒，我地唔見有，要問店員，店員話冇晒，咁我地就買咗哥哥想要嘅其他酒，同埋我哋自己有興趣嘅酒，呢度好多款酒都係話地方限定，因為佢余市有幾間蒸餾所，有D就係呢間蒸餾所限定，有D係另外一間蒸餾所限定，有D係市面冇得賣，之前都未見過，所以揀咗一兩款細支嘅返去試吓！買完將D酒攞咗上車先，然後去旁邊試酒，試酒之前要在入口位置填表，其實果張表只係簡單寫名同年齡資料，上到去試酒區，張表交比店員，就有三款酒可以試，分別係Singlemalt Yoichi、Super Nikka 、Apple wine，攞咗三杯酒之後，可以自行加冰或者加水/碳酸水，係自助形式，呢度反而好多人，本身對威士忌嘅興趣唔大，不過一場黎到就即管試吓，呢幾隻酒嘅酒精度比較高，只有蘋果酒係帶甜，不過味道都算唔錯，試完酒我哋就去博物館參觀，介紹返酒廠嘅歷史，而有個位置係正在運作中嘅蒸餾所，真係有酒在蒸餾中，所以有人看管，而個蒸餾過程係要用炭去燒，啱啱就見到有工人在加炭，我哋行咗一個圈就返返去售賣部，原本諗住買多兩支蒸餾所限定嘅酒，點知賣晒，但係啱啱見到店員補緊 2000’s 既貨！買唔到次要嘅蒸餾所限定，但係就買得返首要買嘅2000’s ！真係行遲半步都冇，因為店員只係補左兩箱，一箱應該係10支左右，而且每人限買一支，我哋三個人啱啱好一人買咗一支比哥哥！
參觀完酒廠，去咗附近嘅海鮮工房諗住食海膽飯，因為睇電視介紹過，而且呢個地方如果唔係揸車嘅話根本唔會黎，所以順道去試吓佢，呢間海鮮工房在2樓，地下係超市，都有好多生果同埋酒類銷售，行一陣超市先上去食飯，上到去入口見到食物嘅模型，一見到海膽飯即刻就問店員有冇，點知佢話冇！好失望呢，因為我哋一心想食海膽飯，佢冇嘅我哋就唔食其他，因為其實早餐已經食得非常之飽，所以我哋就隨即揸車走！
跟住揸車去海威岬，海威岬位於積丹，今日落大雨預計去到個景色都唔係太理想，不過即管去睇下，因為積丹呢個地方都係出名海膽，不過沿路都冇乜比較旺少少嘅地方，周圍都係好鄉郊地區，我哋一路揸車一路上網搵附近有冇海膽食，喺路途上搵到兩間，一間在吉平町，去到先問下有冇海膽先，又係冇，店員話海膽季節是六月至八月，所以預計今次應該食唔到！
繼續揸車去海威岬，搵到另外一間叫做海鮮味處新生，問左店員有海膽我哋先至入去，睇到個餐牌見到有一個海膽飯係鋪滿兩款海膽，但係佢話果個冇供應，反而另一款配其他魚生嘅就有，都好啦！叫做有少少海膽食，叫咗兩個海鮮飯同埋一條一夜干魚，等緊嘅時候見到佢有賣冰鮮海膽，我地估計佢海鮮飯用嘅海膽都係冰鮮海膽，所以佢無供應兩款海膽嘅飯，只係供應一款少量海膽嘅飯，應該係呢個原因，個魚生飯一般啦，海膽亦都唔係太理想，不過折騰了一番，都想坐低食D嘢，因為天氣太過惡劣，出出入入都好麻煩，舒舒服服食返餐飯，繼續去海威岬！
差唔多去到嘅時候，見到海邊有好多石，離遠見到海威岬對出果舊石，就知道差唔多到，去到入口，發現佢關左門！前面有一架車同我地一樣入唔到，雖然諗住咁大雨都照去睇下，但係想去睇都冇得睇，門口寫住天氣惡劣所以關左門，唯有離遠影下舊石就走！
揸返車返札幌，直接就去酒店，今晚入住大通公園札幌景觀酒店 (Sapporo view hotel Oodori Kouen ) 我哋check-in 完，放低行李再出去，行返去狸小路，睇下仲有咩要買，然後去食野，尋晚出嚟嘅時候，去咗一間居酒屋訂咗位，今晚就去食，呢間居酒屋叫做 Hachikyo 海味 はちきょう，最出名係三文魚子飯，我地叫咗碗中份量，店員先會送咗碗白飯過來，然後捧着一個木盆，𥚃面係三文魚子，店員會大聲講幾句野，然後就會埋去每一台叫咗呢個飯嘅客人面前，一邊將大匙大匙的三文魚子倒在飯面，如果你沒有叫停，他就會倒到滿為止，我地數過大概有五大匙三文魚子，過程都幾搞笑，個三文魚子俾我哋想像中好，因為我哋都驚好鹹，但係呢個完全唔喊而且好新鮮，除咗食呢個飯之外，我哋都叫咗其他嘢食，有炸雞塊、一夜干魚、蟹肉沙律卷、魚生拼盤、豆腐、腸仔，個炸雞我哋仲叫咗兩份，所以食到非常之飽，食飽之後我哋再去行街，之前睇咗有D乜嘢要買，而家一次過買晒，因為見到驚安殿堂做緊優惠，除咗免稅8%之外，買任何嘢都有8% discount，所以一次過在同一間店買晒要嘅嘢，然後先至返酒店休息！
酒店入住後評價
大通公園札幌景觀酒店
Sapporo View Hotel Oodori Kouen
酒店位置對正大通公園九丁目，大通公園地標的電視塔在一丁目，近狸小路的六丁目附近，酒店的裝修有D Grand ，即係傳統酒店果種，玻璃電梯望出去中庭係餐廳，房間相對大堂新，應該D房翻新左兩、三年左右，房間的空間亦比較大一點，浴室、厠所、洗手檯係分開的，而浴室係傳統日式果種，浴缸旁邊係花灑，有張膠櫈仔同膠盤仔，淋浴後再浸浴果種，而床同洗手間有趟門可以隔開，我訂單人房，比左張雙床房我，可能是淡季吧！好友訂雙人床房，就比雙人床房，房價方面只是三百多元，非常超值！都係淡季關係吧！早餐選擇比一般多少少，飲品的選擇比較多，水亦有多款，最特別的食物是即場煎的肉類及蔬菜，而半熟蛋肉片飯及烏冬也不錯！
沒有留言:
發佈留言