今年只係二月去過一次旅行，足足等左成七個月先至第二次旅行，原本要10月先至去，要等足八個月，不過好友約我九月，所以先至改早左，最近好多社會活動，有幾次都係堵塞機場，今日都有活動去堵塞機場，不過通常係下午先至開始，我地搭早機所以可以避開！今日我地9:15 機，預計7:00 前到機場，因現時機場有禁制令，要檢查才可進入，要預多少少時間，Check 左巴士時間，唯一一架機場巴士N車經過我住的屋邨，只有三班車，搭第二班車的話，大約6:30 前會到，第三班車的話，大約7:00 到，因為第一次搭呢架N巴，而由總站來到這裏要經過廿幾個站，萬一爆晒上唔到仲可以轉其他巴士，在預計到站時間早10分鐘去到巴士站，沒有人，後來多了幾個人排隊，車來的時候都幾 full ，因為N車同E車一樣沒有行李架，行李要放通道，所以企位少左，我唔知樓上仲有冇位，因為好多人要睇住個行李，唔可以上去坐，所以可能架車根本未爆，只不過攞唔到行李上樓上，所以樓上可能大把位！不過不過企到去落車都係35分鐘左右，而且陣間仲要坐五個鐘頭飛機，大把時間坐！
N 車落車站在𣈱達路，要行小小路，檢查方面都唔太緊張，好快 Check check passport 同航班資料就入得，入到去先去 K 行辦理登機手續，今次搭 HK Airline ，因為網上只能預辦登機，但不能出電子登機証，所以要在自助機印機票，再自助寄行李，然後坐低等好友 W 兩公婆，佢地到埗後，等佢地寄埋行李先一齊過關，過左關之後一齊去食早餐，大家都用同一個 Premium lounge 貴賓室，原來呢個貴賓室在1號閘附近都有，平時我只係去40號閘嗰邊，不過去到1號見到好多人排晒長龍，所以一齊搭車過去40號閘果邊，因為果邊平時係比較少人，而且我哋登機閘都係要搭車經過40號閘，去到40號閘個 premium lounge 一樣大排長龍！不過都算快，我地食左半小時左，就撘車去登機閘，去到仲有25分鐘飛，竟然所有人已上晒機，Final call 個牌都熄埋，剛好上埋我地仲欠5個，上到機見原來有大把位，所以我地諗住起飛之後調位，因我後面是個小孩，很嘈吵還經常踢我櫈背！！
飛機起飛後，好多人都調位去前面坐，我地都唔例外，飛左一陣又派餐，食完餐揀左套戲睇，睇 Crazy rich Asian ，套戲麻麻，睇完瞓左一陣，醒左諗住睇多半套戲，點知就快要降落，因為飛行時間比預期的五小時短左近半小時！落機後，過關很快，所以要等行李，新千歲機場擴充了，擴充的部分很新，我們約了租車公司在巴士站等，他們接載我們到他們的公司取車，他們公司的位置頗偏僻，而且很細，像路旁的一家小住宅，對面仲有家 Touist center，一般遊客不會到這裡吧！Anyway ，攞完車返酒店 !
今晚入住的是船舶花園薄野酒店，Vessel hotel Campana Susukino ，我們在酒店的後門拍車，先放低行李，將車駛入停車場門內，便自動泊好，從停車場旁邊的小路前往酒店，酒店很新，大堂 reception 地方不大，我和好友分開不同一層，我住13樓是頂樓，好友住12樓，放低行李之後就出去行街，去咗狸小路行吓藥房，睇定有D咩要買，留返聽日先買，因為聽日都係住附近，然後我哋搵嘢食，因為好友好想食烤肉，所以用Google Map 搵吓附近有沒有烤肉店，行行吓見到一間叫做味覺園嘅烤肉店，寫住和牛一頭買，即係成隻和牛買返嚟咁嘅意思啩？見佢門口玻璃後面係熟成室，同埋話全部牛肉都係熟成處理，就試試佢！入到去，地方唔太大，我地上去樓上，地方就大D，睇完餐牌問店員有冇放題，原來有，¥4300一位任飲任食90分鐘（不包生啤），牛肉的選擇睇落次級D，當中亦有加工肉不過選擇都多，所以叫左放題，同大多數烤肉放題做法一樣，先會比一碟雜肉比你，先來三款肉，有羊肉、豬腸、牛肉，份量唔多，跟住可以叫我地想食既肉，主要都係食牛肉，因為我想食牛舌，所以另外加錢叫咗個厚切牛舌，所以最好味嘅都係牛舌，我覺得如果唔係叫放題的話，單點嘅質素係會好好多，不過我哋貪佢任飲，可以係咁飲梅酒，先至叫放題，放題果D肉質素一般！
食完飯好飽，我地行返去酒店，酒店有大浴場，好友話要浸一次先至瞓，我因為太攰所以唔浸啦，而且夜晚一定好多人，我情願明天一早去浸，今晚早D休息！
酒店入住後評價：
船舶花園薄野酒店
Vessel hotel Campana Susukino
位置接近狸小路五丁目
酒店好新淨，亦都有泊車位，我地在後門泊車，然後在旁邊嘅小路進入酒店，全部都係自動門，大堂接待處地方都幾多位，接待處有五個職員在幫人客辦手續，接待處旁邊有一個電視機播影片介紹酒店，電視下面係人客自取嘅護膚品，仲有 mask ，見到佢大部份用POLA呢個牌子，再過D有一幅好似青苔咁樣嘅的畫，旁邊再入係擺咗welcome drink 嘅地方，呢度有廿個位左右嘅休息區，比人坐低休息，旁邊有一間餐廳，不過非營業嘅時間佢會拉埋左個門，睇唔到果度原來有間餐廳，餐廳亦都係食早餐嘅地方，呢度嘅早餐收費係 ¥2000，食物嘅質素好，而且選擇非常之多，亦都係好豐富，最重要佢有魚生、蟹腳、芝士等等，呢度已經值回票價，房價方面，weekday 大約$480至$580左右， weekend 就要$800-$900左右，不包早餐，我同好友分別訂單人房同Semi Double房，房間嘅大細都係一樣，如果係平日入住嘅話真係好抵，因為包唔包早餐嘅價錢都係相差 ¥2000左右，亦都可以去到酒店俾錢買早餐券，我諗佢係新開先做呢個價錢，遲啲佢有口碑之後都可能會加價，而酒店亦都有大浴場，當然唔係好大啦，只有一個四方同一個圓形細池，不過化妝間就用 Dyson 嘅風筒，設備都算完善，呢度好值得再嚟，同埋一定要訂埋早餐，因為真係好豐富，而房間嘅空間唔算好大，都係一般市區酒店咁，水煲係用 Balmuda 不過裏面有常見既水垢漬，洗手間嘅沐浴露同洗頭水，亦都係用POLA呢個牌子，整體來講都好滿意呢間酒店，去狸小路行街都好方便，職員嘅態度都好友善，下次去札幌，如果係自駕遊就必定揀呢間，搭火車就未必會揀呢間，因為唔近火車站，要考慮行幾遠先去到酒店！
沒有留言:
發佈留言