今朝瞓醒先去酒店嘅餐廳 Audrey 食早餐，食完早餐就揸架車去附近嘅Francl 度買野，買完野再上車去星野度假村 Tomamu，今次行程最貴嘅一晚酒店就係呢間，而且渡假村入面都好多設施，同埋最重要係第二朝要去睇雲海，希望可以睇到啦，不過我見天氣都幾晴朗，睇到機會率應該唔大，由札幌揸車過去大約一個鐘頭就到，渡假村入面主要有四幢酒店，我哋今次book咗上面嗰兩座 Risonare ，去到酒店門口我哋先放低行李，好友將架車揸去停車場，我哋就在大堂做check-in等佢，接待我哋嘅人原來係香港人，佢問我地邊度來？我哋話香港佢就話即刻用廣東話同我地講嘢，呢位張小姐好友善，詳細講解節目時間等等，然後一路帶我地上房，一邊幫我地推埋行李。
我地今次 book 左間大房，係四人房，有兩間房，仲有個 Jacuzzi 浴缸，張小姐介紹房間後便離開，我地放低行李就出去行下，我地四圍行，一路再睇下有乜節目，我地先去訂左今晚的晚餐，因為張小姐話今日有四百幾個學生入住，所以晚餐會比較多人，建議我哋揀一D要book 位嘅餐廳，咁就可以避開個幾百個學生，唔使咁迫，我哋訂左一間食 Shabu Shabu 的，跟住就行去搵牧場，呢度有個牧場係有牛同羊，我地沿着指示行落去農場嘅時候，見到間餐廳應該係食 buffet嘅，經過左下面果兩座之後，然後行落去大草原就係農場，我哋去農場係因為要放飛機，睇完牛🐄羊🐏之後，我哋就搵咗個位置放飛機，好友嘅太太等我哋嘅時候，上網睇過D餐廳評語，發覺Shabu Shabu 好貴，一碟 120g 嘅牛肉要 ¥15,000，所以我地改咗去食buffet，放完飛機之後再行返去最近嘅一座酒店，搵接待處同佢講叫佢幫我地改Booking，呢度有個細商場，我哋喺度行咗一陣間街，睇下有D咩手信，不過都唔係太吸引，然後我哋搭 shuttle 上返去我哋住果座，因為我地在渡假村裡面可以自己揸車，周圍都有車位泊車，所以我地揸車落去泳池果邊，見到呢個泳池都唔錯，有人造浪，而且室內係好暖，亦都有好多設備可以租用物品，原本好友係想去玩水，而我都諗住在泳池下一層浸溫泉，但係D時間唔係好夠，距離訂枱時間只有一個鐘，可能要好匆忙咁遊一陣，所以最後都係冇落水！
由泳池行返出嚟見到係 Club Med，呢邊亦都有D低密度嘅酒店淨係比 Club Med ，而旁邊就係纜車站，我相信住 Club Med 果D客，可以早一步去到纜車站上去睇雲海，因為 Club Med 收費貴好多，當然係優先啦! 睇到纜車站嘅位置，我地就決定明天一早自己揸車過嚟，唔使迫 shuttle ！
我哋揸車過返去餐廳果邊，比預約嘅時間早左去到餐廳，一樣可以入去食，食物嘅選擇都唔少，最吸引嘅係蟹腳同埋牛肉鐵板燒，另外就係三文魚配三文魚子嘅手卷，其餘都係一D大路嘢，佢仲有個特色嘅甜品，係一杯牛奶雪糕入面有D士多啤梨糖漿，面頭一個用棉花糖做嘅雲，配合返佢哋雲海嘅主題！
食完飯上返酒店房，晏少少8:30有煙花睇，所以返房休息一陣，返到房又唔多願郁，因為張小姐話喺我哋可以在酒店樓下睇煙花，我地以為在我地呢一座附近放煙花，所以諗住慢慢先落去，當我地聽到放煙花嘅聲，先發覺原來要係我地樓下個位置先睇到煙花，於是嗱嗱聲落下，落到去非常之凍，睇咗大概10分鐘就完咗啦，煙花比我哋想像中好睇，我地以為係好簡單嘅煙花，原來都係認真，好似樂園D煙花咁，當然係細規模好多啦！
睇完煙花，揸車落去水之教堂，介紹話呢個教堂夜晚配合燈光會好靚，但係佢開到9:30 ，我哋覺得佢D時間編排得唔好，如果8:30 睇完煙花再落去水之教堂，如果真係坐 shuttle 都有D頻撲，應該安排到每個住客都可以睇完一個節目到另一個節目，其實水之教堂就在食buffet嘅餐廳旁邊，不過食完飯佢又未開，所以要走來走去，當然你可以喺水之教堂附近睇煙花，亦都可以慳返D時間，如果食完飯去睇水之教堂，又會唔夠時間去睇煙花！
去水之教堂⛪️，要行一段路，去到教堂附近大家都保持肅靜，見到原來教堂之所以叫做水之教堂，係禮堂前面有一個水池，水池上面有一個大十字架，如果有人在禮堂結婚，對住個水上十字架，個景都幾靚，加上夜晚嘅燈光，亦都有D美感，不過佢個燈光亦都冇咩特別效果，只係照住個十字架同埋照住旁邊嘅樹，而禮堂果邊本來係關咗玻璃門，到一段時間佢就會打開玻璃門，然後大家就係咁影相，影完相其實就走得！
影完相我哋都返房休息，因為聽朝要晨早4:00去搭纜車上山，所以今晚要早D瞓，返到房梳洗完畢都10點幾先至瞓！
酒店入住後評價
星野度假村 Tomamu
Toshiro Resorts Risonare Tomamu
呢間酒店要上官網訂，雖然好多洒店 App都 search 到，但基本上你 book 邊日都話冇房！呢個渡假村一共有四座，高D果兩座係 Risonare，即係我地住果座，低D果兩座係 The Tower ，即係地標啡色同綠色格仔外牆果兩座，呢兩座以家庭客為主，所以四人房係四張床平排，冇獨立睡房，而呢兩座亦係最熱閙，設施亦較多！
我地住的 Risonare 先至有獨立睡房，我地三個人要 book 一間兩房一廳的 suite，官網價錢是以人頭計，每人 ¥19000，我地三個就 ¥58000幾，呢邊比較豪華D，走 Grand D路線，房內有一個 Jacuzzi 浴缸、一間桑拿浴室、兩個洗手間、兩個淋浴間，兩間睡房有一間是套房，面積大一點，好友兩夫婦用，而 Jacuzzi 浴室內，有齊浴缸、桑拿、淋浴室，這浴室有兩邊門，一邊出廳，一邊去睡房的走廊，這浴室是沒有鎖的，好友兩夫婦浸 Jacuzzi 都要穿泳衣，而我冲涼要告訴他們，並關了兩邊門，其實我住套房比較方便，但套房空間大，我也不需要咁大空間！
酒店的設計是上一代西式設計，大門是不會自動上鎖那種， 整間房也沒有 USB 插口，Wi-Fi 也見到是後加 Router 的，不過設施尚算新淨，只是走廊和房間有小小舊！
服務很好，英文程度亦理想，這兩座還有講廣東話職員。酒店早餐有幾間，最近附近的餐廳，要步行前往，其餘可乘 shuttle 或自駕，我地食早餐的餐廳是 buffet 型式，食物選擇算多，有三文魚子、甜蝦、三文魚做丼，其他都係大路，不過冇我喜歡的芝士同生雞蛋！餐廳有提供小童餐車，在小童/嬰兒車後面可以放餐盤，一邊取食物，一邊推小朋友，不怕小孩四處走，頗細心！成個渡假村面積好大，如果要玩晒所有設備真係要住兩晚！冬天滑雪更加要住兩晚！雖然 check in 時間係3:00，我地12點幾去都可以照 check in ！
沒有留言:
發佈留言