五月果陣時，我地約咗今日去深井食燒鵝，因為我地有兩架車，但係兩架車嘅車主分別一個病咗，另一個唔記得咗自己個仔正日生日，所以兩個都嚟唔到，本來有兩架車變咗冇車，唯有改地點啦！我地去咗九龍灣呢間菜館，其實好耐之前已經想試，但係佢好爆，經常都無位，今次我地都打咗電話來訂枱話冇枱，叫我地到時去到睇吓有冇得等，行過去之前我地打電話去，店員都係話冇得等，最好唔好過去等咁話，於是我地訂左第二間附近嘅菜館，不過我哋行去果間菜館嘅時候，經過呢間再作最後一次努力，去試吓問吓有冇位，點知佢有位不特止，仲俾咗間房我地，我地只係得九個人，都可以有房坐，真係出乎意料之外！
我地好快就齊人，今日大家都好準時，睇吓個餐牌食物嘅選擇都有好多，而且價錢都非常之相宜，我地叫咗一個六人九大簋套餐，真係足足有10個餸，有燒米鴨、五味雞、浸烏頭、盆菜豬肉、陳皮豆豉蝦、雜錦炒菜絲、鯪魚球、炆冬菇、糖醋酥肉青，仲有一桶白飯，有埋豬油豉油，可以食豬油撈飯！同埋馬拉糕，我地另外加多個雞腳、炸大腸、焗魚腸同埋炸魷魚鬚，雖然九大簋嘅份量係比較細碟，但係14個餸加埋真係食得好飽，因為食咗豬油撈飯！我哋仲有蛋糕食，佢有送埋甜品，真係飽到不行！
席間，我地傾左好耐，又喺度講返以前一齊做嘢果陣時係幾咁開心，大家都話真係希望有一日，可以好似以前咁開心，一齊做嘢就好喇！而家各散東西，根本上係冇呢個可能，而且事隔多年，大家都改變左好多，雖然坐埋傾計係好開心，再一齊做嘢就未必係果回事！
沒有留言:
發佈留言