一早起身就食早餐，去酒店地面大堂旁邊嘅餐廳食嘢呢度嘅早餐算豐富，酒店細細，早餐選擇都唔少，而且質素都幾好，我又食咗雞飯、溫泉蛋、納豆、蒸牛肉、豆腐，仲有大分嘅特產一種綠色嘅柑，做咗啫喱同埋果汁，好味！呢間 Dormy Inn hotel Oita 整體性價比，以酒店房價三百幾來計，絶對物超所值！值得一讚 ！
今日第一個行程就係上山，去一個叫做狹霧台嘅地方，當然係要放飛機啦！車程大概45分鐘就去到，沿途見到風景好靚，山上面嘅樹都好靚，排列整齊好有層次，而且都好大棵好靚！差唔多去到目的地之前見到一大片青草地，我哋諗住有需要就返轉頭睇下！去到狹霧台，有幾架車泊咗喺度，而且有間小店，由呢度望出去可以睇到成個由布市，仲有旁邊嘅山，都好靚！
放完飛機去小店睇下，買咗兩盒手信，跟住就出發去由布院，去到由布院見到好多拖喼黨！呢度好旺下，好多遊客，有火車站出來嗰條由布見通リ雖然多遊客，但係仍然能夠保持到小區果種味道，起碼冇藥房！見到有幾間買鞋同買袋嘅店，都係自家小店，買手做嘅鞋同袋，肯定唔會咁容易同人撞款啦！雖然佢價錢唔貴，不過我嫌佢啲鞋太過花巧，所以都冇買到，不過去到一間叫做 Parley 的店係賣袋嘅，佢係用麋鹿皮造，而且是日本造的，我買咗一個細嘅斜孭袋，同埋一個八達通套，佢個皮好軟熟，亦都睇到皮紋，就知佢係真材實料！
沿由布見通リ行，轉入另一條好長既街，由呢條街可以行去金鱗湖，沿路有好多嘢食，而且都好多人，我哋原先想買一個B-speak 蛋卷食，但半條裝賣晒，得返一條裝，太多了，食完都唔使食其他野，所以冇試到！我地又試左一間炸薯仔牛肉餅，跟住又試左一間叫花麴菊家的布甸餅，佢好似豆沙餅咁，只係夾心係布甸，味道一般！跟住又見到杜如風介紹過的那間木制家品店，行行下就到金鱗湖，呢度個景色都唔算話特別靚，我諗如果有太陽可能湖面倒影會靚D，不過今日就唔見！
睇完金鱗湖，沿路行返轉頭攞車，去下一個景點，九重”夢”大吊橋，沿路天色都唔好，天陰陰加上就快日落，個景睇起來遜色左D，呢條九重夢大吊橋是全日本最高的人行吊橋，有173米高，390米長，對於畏高的我，要鼓起勇氣先可以行呢條吊橋！要過呢條橋係要比錢，收費係每人¥500，今日冇乜人，橋上面只有幾個人，售票處旁邊都有小店，賣下手信同紀念品咁，條橋睇落都好穩陣，雖然左右兩邊上落的部份，好似行石屎路一樣，但係中間係好似坑渠蓋咁通窿架，可以望到下面條溪，所以我都好驚，我大概行咗半條就已經唔敢行喇！行半條嘅原因，係因為要在中段先可以望到對面有兩條瀑布！好友行足全程來回，然後一齊返去攞車！因為大橋嘅兩邊入口都有好多工作人員，我哋相信唔可以放飛機，所以我哋去搵附近有邊度可以放架飛機過嚟，因為就快天黑我地都要快D搵地方飛！
雖然搵到地方飛，但係天色唔係太好，影出嚟都唔算好理想，即使好友部新機個鏡頭咁靚，影出嚟都唔係太理想，始終天色太陰暗！影完相就要去酒店check-in，要過返去別府嗰邊，今晚住溫泉酒店，我地住別府温泉海薰之宿新松實酒店，間酒店有D舊，不過全部都係榻榻米，所以D房都幾大，好友book咗一間有私人風呂嘅房，不過個私人風呂好似一個浴缸咁，只係鋪左石，同埋對住個窗可以望到海！我果間雖然冇私人風裏，但係都可以放溫泉水在浴缸浸浴，只係完全冇 view！我地放低左行李之後，就出去搵食，我哋好想食上次食果間倉壽司（くら寿司)，搵到附近有分店，不過都要半小時車程，一於照去！
店子位於一個叫做畑中的地方，店舖嘅外型同我哋上次去果間幾乎係一模一樣，上次果間要等位，今次就唔使喇，仲有好多位添！我地目標明確，主要集中叫大拖羅、蝦、油甘魚，其他只係要少少，我帶拖羅真係好好味！上次我哋一共食咗67碟，當中有D係一件壽司計兩碟價錢，今次一共食咗58碟，我地特登將D碟唔放落去收碟糟，特登留返佢叠高影相！
食飽飯返酒店浸溫泉！好友房間有私人風呂就可以自己在房𥚃面浸，我選擇上去露天風呂到浸，上到去見個溫泉其實好細，不過上來的時候沒有人！咁一個人浸就唔算細，不過浸到咁上下就有人上來，不過我都浸完，因為開始出左一身汗，沖個涼就返房瞓覺，日本榻榻米係好好瞓嘅，加上我真係好攰，所以好快就瞓著！
沒有留言:
發佈留言