一早起身落酒店大堂食早餐，早餐非常之簡陋，除咗飯就係飯，尋晚食咗烤肉好 heavy，今朝想食得清淡D，想食沙律，但係都冇乜選擇，所以只係簡單食咗片多士就算啦，因為大家都好飽飽滯滯，好似D烤肉仲未消化完咁！做完check out 就去攞車，跟住入去熊本市，將架車泊左喺上通町附近，然後去行街，呢度有兩條購物街亦都有少少百貨公司，我地成個行程都係去郊區為主，難得一條購物街行下，大家都去藥房度睇野，一人買咗一D野，我就冇乜好買，因為我成日都去日本，都冇乜野特別需要買，不過見到佢D洗衣珠珠好平，我行李有大把位，所以買左兩大包返去慢慢用，雖然香港有類似嘅產品，但係價錢就貴好多，所以買返兩大包返去慢慢用，雖然重，但係都係果句行李大把位！
呢度亦有百貨公司，我哋今日其中一個目的地，就係百貨公司𥚃面嘅熊本熊社長辦公室，其實呢個辦公室地方唔大，簡單D講一間 shop 位置咁啦，去到就見唔到人扮嘢熊本熊表演，但係成間鋪都係熊本熊嘅產品，亦都有佢嘅辦公室，可以入去影下相，買下紀念品，我就買咗兩盒手信，同埋影下相就走啦，行完街出來睇下有乜嘢食，因為都過咗午飯時間，搵咗一間叫做赤ぐみ的拉麵店，簡簡單單食拉麵，呢餐算係呢兩日行程之中最平嘅一餐，拉麵嘅味道都唔錯，我哋食嘢嘅時候遇到隔離一枱好友善同埋好好客嘅日本人，佢見我地係遊客，一坐低就幫我地倒幾杯水，仲好過D店員！好多時喺日本都會遇到一D咁友善嘅人！食完拉麵又再出發，我地行過一條大馬路，望到熊本城正在維修，因為之前颱風吹爛咗部份嘅外牆，所以見佢喺度維修，我哋都影返張相叫做睇過！熊本市呢度有電車，好似香港嘅輕鐵咁，在日本唔係周圍都有，之前在函館見過，呢度亦都有!！
離開熊本市就出發去大分，呢個路程比較遠，差不多3小時車程，全程行高速公路，我地坐車都覺得好眼瞓，何況好友揸車，佢要狂食香口膠同埋糖，仲要飲埋monster先至頂得住！我要 keep 住同佢講野先確保佢唔好瞓著，真係好攰！
去到大分市已經係6:00，先去酒店 check in ，今晚住 Dormy Inn hotel Oita ，就在大分火車站旁邊，泊好車去火車站的商場行一陣，就在商場搵食，去左一間叫とよ吉的食店，主要食日式 set ，一人一個 set，食到好飽！再去附近超市行左一陣就返酒店！
呢間酒店有温泉浸，每日19:00-21:00可以在温泉外面的飲品部免費領取一杯生啤，而晚上21:00-23:00可以到大堂旁邊食免費拉麵，而且酒店的設備好貼心，有好多插電位，包括 USB 插，床頭有插位，兼夾有埋兩條線，iPhone 同 Android 都有！房間的空間亦算大，單人房浴室和座厠在浴室，而雙人房是分開的，浴室門口有 sensor 開燈，可能大分呢間係新開，所以設計好 update 跟足現時大部分人需要設計！
沒有留言:
發佈留言