民宿住到今日要 check out，因為訂左一晚溫泉酒店，今日要搬行李去酒店，先 check out 民宿，落樓下check out就得喇！跟住推住行李去酒店，我哋訂左大阪光芒酒店，原因係貪佢有溫泉浸，見佢在心齋橋過咗戎橋之後，行過幾個街口就到，我哋沿着心齋橋購物街行，因為呢條路鋪左磚，係比較行得舒服，過咗戎橋之後行一條橫街過去，呢條橫街好難行，因為係石路，路面凹凸不平，又多車，條路又窄，成日要停低避車，行左好耐先至到，真係後悔訂左呢間酒店，早知訂 Dormy Inn 仲近D！好唔容易先去到酒店，先寄存左D行李在接待處，然後出去搵食，行返頭先果條街，冇拎住行李行起上嚟都覺得快咗！行到差不多到心齋橋，見到有一間寫住穴子重的食店，佢係食鰻魚飯的地方，因為我哋三個鍾意食鰻魚，見佢個門面好傳統日式食店，應該唔會差，就入去試下！
店子叫做 対馬穴子や，剛剛才開門，店內沒有客人，只有我們三人，店員給了我們一個平板電腦，餐牌是他們的網頁，可以選擇語言，食物選擇當然唔多，只係唔同份量的鰻魚飯和 鰻魚飯 set，同埋生鰻魚片、白烤鰻魚片同天婦羅鰻魚，我地叫咗兩個set ，同埋一個鰻魚飯，我地其中一個飯加大要咗一條鰻魚的份量，再叫左個白烤鰻魚片，店員好友善，上前菜的時候，每一小點都逐個介紹是什麼食物，用來點白烤鰻魚片的調味料，都逐一講解，告白烤鰻魚片，係用一個明火的小陶爐，熱住一塊鹽板，鰻魚片基本上熟咗九成，店員叫我地燒一陣之後，將魚片在鹽板上刷幾下，令到魚片沾到鹽做調味，呢個烤鰻魚片好好味，魚肉好肥厚，好好食！店員又好殷勤幫我地影相，我哋食得好開心，在我哋食飯嘅期間，只係入個兩個客，因為食店門面嘅格局，係望唔到入餐廳果種木門，睇落好似好高級好貴，正常吸引唔到遊客，應該係做本地人多，我地都係睇咗門口餐牌上價錢，先至入嚟食，呢度有佢哋個網址：
食完野，在心齋橋行多一陣，尋日有一部份冇行到，所以今日去行埋佢，主要想去 Disney Store 同 Sanrio，在 Disney Store 冇乜嘢睇啱，只係買咗三對特價耳環同埋一個掛飾，去到 Sanrio，都睇唔啱野，不過見到佢做緊聯乘美少女的產品，但係全部係非賣品，係要玩抽奬睇吓你抽到乜嘢，不過一定有奬，只係未必係你想要嘅野，見到佢D精品都好吸引，好友係咁抽，期間有幾個港人又來抽埋一份，我地前前後後抽左差不多10個，雖然抽唔到最想要果D，但係都有唔少收穫！
行完心齋橋，就搭火車去阿倍野，只係幾個站就到，但係好友都瞓咗覺！我哋搭御堂筋線，四個站去到天王寺，轉谷町線一個站去到阿倍野，我哋一早上網訂左美少女餐廳的下午茶，去到阿倍野，尚有少少時間，當然在商場行下先啦，我哋去咗一間賣帽的店，每人買咗一頂 NY 帽，好友買的是情侶帽，一黑一白配金鏈圖案，好搶眼，我就低調地買咗一頂淨藍色的帽，只在 NY字旁有個櫻花刺繡，買完差不多要去搵下間餐廳在那裡，其實餐廳的名字叫做 DELASOUL CHARBON，位於Q’s mall 的4樓，4樓其實全部係食肆，商場有一個室外的地方，中間一個圓形的位置，可以望到阿倍野地標Harukas ，餐廳就在這個室外的位置，我哋約咗三點鐘，仲有15分鐘已經有人排緊隊，好快就排滿晒預約咗嘅人，在排隊的時候已經派了餐牌給我們，又問定我哋食乜嘢，搞掂晒之後就逐一入座，餐廳地方唔算大，餐廳中間有一幅好大的美少女圖畫，我地坐唔到果個位置，就趁未有人入座即刻埋去影相先，影完之後，所有人客都入坐，完全是 full booking，我們在等待時已落 order，叫左漢堡包、pancake同埋牛角包，三杯飲品同甜品，食物的造型很漂亮，食物的質素就真係麻麻地，我地除左食呢D，另外叫左兩款外賣，一個是飲品，另一個是麵包，因為包袋布袋才買的，後來發現布袋是可以單買的！走之前好友買了很多 sailor moon 紀念品，好開心！
食完野在商場行了一陣，就返去心齋橋，今晚想食返去年食過的立食，行返去樂座果邊，上次食過呢間叫做 産直鮮魚と天ぷら 立ち呑み あたりや食堂 なんば店，今次去到剛好有位，雖然大家有D腳攰，但係都好想去，呢度係居酒屋，主要係一D小食，唔會有飯麵之類的食物，我地叫左刺身、冬菇、鮑魚、帶子、雞翼，全部係小食，另外叫左梅酒同可樂飲，呢度氣氛熱鬧，又有好多清酒選擇，不過我地尋日飲咗好多sake，所以今日淨係飲梅酒，食完好快就走喇！
跟住去返心齋橋行多一陣，去咗0101 買衫，然後好友話想食壽司，諗住返酒店果條路睇下有冇壽司食，今朝行過去果陣都見到有D壽司店，我地由心齋橋行過去，在今朝食鰻魚的店旁，見到一間好細好舊的壽司店，睇個格局唔係做遊客果種，門外的餐牌只有三個選擇，一個係 omakase 廚師發板，一個係高級壽司套餐，跟住就係散叫嘅壽司每件計，我地見到有廚師發板，通常有廚師發板都係有D質素，於是入去試吓！
店子叫做江戸万 Edoman，格局都係傳統日本的壽司店，座位大約有七至八個，店裏面只有一個師傅，而人客只有一個，我地一袋二袋所以坐最入，我哋先叫一個廚師發板套餐，師傅見我哋三個人叫一個餐，面色稍為一沉，我哋其實想叫三個套餐，但係想睇吓佢個質素如何，再決定散叫定係套餐，面前的雪櫃內，擺放的魚肉不太吸引，所以我哋先叫一個試一試先，呢度係傳統做法，先放一隻碟在你面前，然後每做一件就放在碟上，師傅逐件做，最先來的幾件壽司，都係白色魚肉，唔知乜嘢魚，不過都好新鮮，仲有魷魚壽司、熟蝦、鰻魚、三文魚籽軍艦，質素都幾好，再來一個大拖羅，呢個好正，我地即刻叫多一個高級壽司套餐，壽司同頭先個廚師發板差不多，不過多咗赤身拖羅同埋海膽，我哋一路睇住師傅整熟蝦，見到D蝦好新鮮仲會郁，所以另外叫咗三件熟蝦壽司，後來多咗一個人客入來，見佢叫咗一個蜆味噌湯，我哋又手指指要一個，個湯都好好味！今餐都食得好開心！今日食果幾餐，餐餐都好滿意好開心！
食到飽飽，返酒店浸溫泉！今日在高島屋買咗一D水果，食完水果先去浸溫泉，這間酒店是新開的，溫泉也比較新淨，睇酒店的網頁見到個露天溫泉幾靚，所以好想去浸，上到去當然分開男女湯，個溫泉唔算好大，一個室外一個室內，兩個一樣大，只係相隔一度玻璃牆，亦都有一個桑拿室，我地去室外浸，見到個露天溫泉係完全冇景，同網頁見到嘅好大分別，呢度用咗白色磨砂玻璃遮住咗個景，基本上乜嘢景都睇唔到，好失望，老遠行過來，露天溫泉乜景都冇得睇，連一棵樹都冇！浸完溫泉，在男湯那邊有一個等候室，我哋在等候室等好友的男友，這個等候室就有景喇！即使外面只有附近的大廈，起碼叫做有個景！
沒有留言:
發佈留言