尋晚好好瞓，今朝八點起身，計劃今日去京都，先去食D野先，其實日本朝早真係冇乜野食，好多食店開11:00，我地見10:00，高島屋已經開咗門，就入去行一陣，行完諗住上最頂果幾層食嘢，路過見到展銷場地，做緊北海道食物展，有好多嘢食，於是改變計劃，就在展銷場食嘢，呢度有海膽同埋刺身便當，亦唔少得牛奶同芝士嘅製品，我哋買咗三個便當、半隻雞同埋一串帶子，三個便當分別係海膽便當、蟹柳便當同刺身便當，呢度有位立食，我哋就即刻食咗佢，D海鮮好新鮮好好味！我哋又買咗牛奶同埋芝士蛋糕，食完野在展銷場見到薯條三兄弟，又每人掃左幾盒！跟住又見到醬油帶子，呢個我一直想買，但係東京同大阪都買唔到，只有在北海道先有賣，呢度做北海道食品節，所以有得賣，不過我哋唔係買咗好多，因為價錢都唔平！買咗咁多野，就攞返民宿放低先，原本諗住去京都，都決定唔去，改為行街shopping！
在民宿放低D戰利品，hea 左一陣，就去附近千日前道具屋筋商店街，呢條道具街好短，商店好少，比起東京淺草的道具街相差好遠，好友本來想買一把刀，但係都睇唔啱，我就冇嘢睇啱，因為貨色都好普通冇乜特別！行完道具街，就去咗心齋橋行左一陣，再過去黑門市場，因為好友的男友未食過河豚，所以帶佢過去試下，順便睇下有冇松阪牛食！黑門市場絕對冇築地咁吸引，不過在大阪冇乜選擇，唯有去呢個魚市場，記得幾年前第一次來，呢度好少有即場坐低食，大部分都係外賣拎走，而家多咗好多選擇，我哋搵返之前杜如風在旅遊特輯介紹的那一家河豚，店主很友善，我們選了一碟細的河豚刺身，在旁邊的企位食，店主還提供道具給我們拍照，老實說河豚不是特別美味的東西，肉質亦有別一般的魚，不過叫做人一世物一世，試過就算！食完河豚，沿路都見到好多嘢食，不過唔肚餓，所以好多都冇試，行到差不多到街尾，有一間叫做丸善食肉店，店主係用鐵板燒形式去煎牛扒，我哋選左一份細的試試，根據經驗，呢D烤肉店好多時落鹽會好重手，所以我哋要叫住店主唔好落咁多鹽，先至唔會太咸！牛扒煎得剛剛好，好好味！幫我今日食得太飽，食埋個牛扒就真係非常飽！
食完野去返心齋橋行街，行完一輪，去大丸睇下有冇水果，不過睇落都係高島屋好D，好友在大丸買咗個 hand carry 喼，要等退稅，勁多人，好友在等，我地就去對面買個龍蝦包食，三個人share食，因為今晚食烤肉放題，所以唔食咁飽！搞完退稅，再行多一陣，就去食烤肉，去返舊年去過果間 あぶリや Aburiya 呢度收11點，last order 10:30，我地9:30 去到，仲可以食個半鐘，我地叫左好多碟肉，又加左 ¥980任飲，我地飲熱 sake ，叫左4支，飲到 high high 地，返到去倒頭大睡！
沒有留言:
發佈留言