去年十月去過大阪，今年再去，好唔容易攞到四日假，好友想去六日，唯有佢地早兩日出發，而我當然係去旅行去到盡，9號晚坐零晨機飛過去，13號坐夜機返！
尋晚坐巴士去機場，尾班車21:15開出，預計十點左右到機場，原本想搭E車，但係E車冇行李架，好唔方便，都係坐A車，早D去機場，上網睇 eta (預計到站時間），之前睇會顯示兩班車時間，但係差不多要預備出門時，見到只顯示一班車時間，莫非已經係尾班車？即刻就出門口，去到巴士站，仲有十分鐘先到，睇多次 eta ，原來仲有一班車，早知在家 hea 多陣！架巴士冇乜人，仲開得好快！21:40已經到左機場！我班機係01:45，有排等！在機場行左一圏，見到顯示板出左登機閘口號碼，就去 Check in ，前晚在網上登記左，明明準時48小時前上網登記，竟然冇乜位揀，得返機尾最後幾個位！唯有照揀！只希望有窗口位可以埃住瞓覺！
Check in 左之後，就多好多地方可以行下！見咁早，就去搵下 Plaza premium lounge，因為我有張 Priority pass，可以用候機室，但我一直冇用，因為唔知在哪裡，今次咁多時間，就可以搵下，上網搵左位置在40號閘旁邊，我登機的閘是21號，行過去好遠，可以撘無人架駛，但我有的是時間，就慢慢行過去，足足行左九條自動行人路，去到40號閘，旁邊有條扶手電梯，去到已經望到上一層是 plaza premium lounge，在接待處問了職員可以用我張咭，佢對左登機證同張咭同名，跟住在佢地部機簽個名，就可以入去，都幾多人，呢度有三種坐位，一種好似一般餐廳的四人枱，又有卡位，另一種是高身 bar 枱，有電制比人充電，而仲有一種比較舒服的梳化，好似飛機上的商務客位咁，當然坐滿人，好多都在瞓覺，我都想瞓一陣！
呢度有食物和飲品，就像一個迷你版 buffet，有各種麵包糖果可以自取，熱葷有咖哩雞、秋葵炒飯、翠玉瓜炒菇、長通粉、燒賣、咖啡角、麵包布甸，旁邊有人即煮魚蛋河、素菜米粉、冬瓜粒湯飯、蒸腸粉、素沙律，飲品除左雪櫃有支裝及罐裝飲品，另外仲有果汁、啤酒、咖啡、鮮奶等，雪櫃仲有三文治都算多野食！免費供應算係好好！我叫左魚蛋河同腸粉，又食左麵包布甸，飲左杯橙汁又攞支水上飛機飲，hea 在一個鐘先走！
行返去21號閘仲有成個鐘，就去幫手機充下電先，充左一陣聽到廣播話預傋登機，咁就排隊登機，上左飛機就凖備瞓覺，在派三文治的時我沒有食，直接就瞓，直到機長廣播仲有半小時到埗才醒來，6:25準時到達，先去攞 sim 咭，又用 WAmazing ，佢地剛剛在十月開始加了大阪可以有免費sim咭，啱晒！之前登記左，話在T1 出海關後，去左邊的南出口有 Sim 咭機，去到揾唔到，見到有D sim 咭自動販賣機，原本 WAmazing 部機都在這𥚃，因為部機細過東京果部，唔起眼，真係要望淸楚，攞完 SIM 咭，先去買火車飛，原本想坐 Rapit，但係剛走左班車，下班車要等50分鐘，而 airport express 就等幾分鐘，車程只係多2分鐘，平左¥210，因為佢係普通火車，冇位置擺行李，要放自己身前，而且會好多人撘，架車好迫，好在我在總站上車，有位坐，其實由第二個站開始已經好多人上車，可能D人返工吧！
去到難波總站揾南口出，應該在車尾果邊，但我行錯中央口，行唔返去南口，因為日本D地鐵好多時係要在月台揾啱出口先出，唔似香港出左閘先搵出口，所以行錯就出唔返果個出口，不過我知道位置，是但一個出口出，行到出街我就識行！行左東口出，向返南口果邊行，見到大大個 Game 字牆身招牌，就啱路喇！行入呢條街，去到7-11個燈位，轉入橫街好易搵到，三分鐘路程就到！真係好方便！去到樓下，好友剛剛落樓諗住接我，即刻上樓放低行李就出發去環球影城！
今次搭阪神電鐵由大阪難波站出發，去到西九条轉車，呢條線轉車要落一層樓，之前係搭JR環狀線，呢條線第一次搭，因為USJ 官網介紹搭呢條線，只需要轉一次車，如果搭JR環狀線就要轉兩次車，不過就唔使上上落落，去到西九条轉JR櫻島線，兩個站就到搵球影城喇！去到門口影左少少相，就直接入院，好友尋日已經來過，佢哋玩咗機動遊戲 fast pass ，今日我哋就玩鬼屋 fast pass ，我哋先去排隊玩哈利波特，條隊要120分鐘，我哋都照排，今日好熱而且好多人，都等得幾辛苦，好友尋日玩咗日已經覺得好攰，我又搭完凌晨機都有啲攰！大家傾吓計好快就排左個幾鐘，入去放低野入去locker ，再去玩，玩完出來剛好120分鐘，我哋個 fast pass第一個鬼屋就係 Trauma 3，時間係12:00-12:15，我哋遲咗去到，不過都比我地入去，呢個鬼屋舊年玩過，舊年係用 VR，問咗職員，佢哋話今年唔係 VR，入去之前要簽一份野，主要係話要保密同埋類似刑責的條款，佢有提供中文版本，簽完名先可以入去，今次主要係核突，都係醫院、解剖之類的核突驚嚇，個人來說，覺得唔係好驚嚇，雖然佢哋都好識得搞氣氛，始終言語不通，減低左驚嚇程度！玩完出嚟大家都肚餓，去搵嘢食，但係周圍都好多人，只有一間食日本料理的比較少人，好友昨天已經去過，話麻麻地，不過大家又肚餓又唔想等，唯有去食呢間啦！呢間叫做彩道，只有幾個日式套餐選擇，我哋叫咗三個餐share食，等上菜的時候，好友伏在枱上睡一睡，等食物到齊先至起身食，三個餐雖然唔係好好食，不過都唔差，可能大家太肚餓！
食飽飯，跟住去其他鬼屋，有 Chucky、猛鬼街同埋驅魔人，呢幾個鬼屋基本上同舊年係一樣，係要幾個人一組，一齊拉住保繩行，其實唔係好驚嚇，但係我哋後邊果兩個女仔就好驚，我哋又嗌下嚇下佢哋，反而大家都覺得幾好氣氛又搞笑，其實佢哋嘅佈景同埋造型做得好靚，有幾下突然大聲彈出嚟，都係俾佢嚇一嚇，整體來講氣氛搭夠！
玩完鬼屋，就去排隊玩 Minion ，樂園新加左呢個園區，超級多人，每一間Shop都排晒隊，勁多人！想話買個小食包包，人龍都長到不得了！機動遊戲又要排120分鐘，已經比今朝見到180分鐘，少咗成個鐘！好友尋日已經玩過，佢哋話好好玩，所以，一定要玩，呢個遊戲係一架好似車咁，坐好之後，佢就起飛，當然佢只係升起左少少，眼前有個好巨型嘅螢幕，主要係架車配合畫面郁動，而畫面就非常色彩繽紛，好立體，像真度好高，所以我好驚，其實有D似香港迪士尼的Iron Man ，只係個屏幕係非常之巨大！因為佢好多向下衝向上飛的畫面，對於我呢D畏高嘅人，就真係好驚嚇！
玩完出來，有少少肚餓，就去買左D小食，有雞髀同埋豬肋條，食完再去哈利波特玩，原來佢有煙花表演，我哋Miss左，只係睇到最後嗰幾秒，跟住見到機動遊戲，只需20分鐘可以玩，咁就梗係要玩啦！我哋仲夾好咗，影相果陣擺乜嘢姿勢，影完出嚟我哋都幾滿意，所以曬咗兩張相，出到來，見到等候時間0分鐘，於是再玩多一次，晏晝排左成120分鐘，而家玩多兩次補返數，我哋又擺另一個姿勢影相，張相又好滿意，所以有曬咗兩張！玩完出來成個哈利波特園區，得返幾個人，從未見過咁小人的斜角巷！我哋影咗D相之後先走，出到去仲買咗啲嘢先，然後諗住去退稅，點知原來退稅的counter已經 close 左，等我哋仲排左咁耐，唯有走啦！走之前在門口影多幾張相，就搭火車返去！
搭返阪神電鐵返去民宿，呢間民宿嘅位置唔錯，而且屋主俾咗好清楚嘅地圖教你點樣去，在南海電鐵難波站的南口出來，行3分鐘就到，呢度旺中帶靜，旁邊就係宅男街，啱晒好友買公仔，佢哋都買咗唔少，呢一座住宅應該係新起的，因為好新淨，外型都好特別，樓下有一間公司，原來就係屋主的公司，所以只需在樓下攞鎖匙，就可以上樓啦，真係好方便，而且有乜事要搵屋主落樓下就得啦！我哋住響2樓，間屋沒有客廳，一入門口右邊就係廁所，旁邊係open kitchen ，左邊係其中一間睡房，旁邊就係浴室，最入仲有一間房，兩間房一共有一張雙人床，同埋兩張單人床，最入嗰間房係兩張單人床，同時係露台嘅出口，我哋將衣櫃門打開，就多咗D空間，再將張枱放喺呢度，就可以坐埋一齊傾計食嘢！你間民宿值得推薦，下次有好又去大阪我哋都會介紹佢搵呢間！如果我哋再有機會來大阪，一定會再着呢間，價錢係$3500四晚，平均每人每晚只需要＄291，適合三四個人住，如果兩個人住就同平價細間酒店價錢差不多，如果兩個人或者會考慮住返酒店，但係三個人以上就一定係佢喇！
沒有留言:
發佈留言