今朝在酒店食早餐，食物選擇極少！我記得上次有 yogurt，今次竟然冇，唯有食小小炒蛋吧！
今日要去瑞士，長途車，七點半出發，近四小時才到達鐵力士山峰的山腳，今日天氣唔好，天陰陰，同上次一樣，但係上次落山時好好天，希望今次都會啦！
領隊話上山的纜車最近換了全新車廂，之前要坐三款不同的纜車，而家兩程就得，而且360度的纜車的車速也會快了！我地去到纜車站便開始落雨，而且雨勢頗大，領隊派飛後，便開始坐纜車，第一架係可以坐六人的小車，搭兩個站轉360旋轉纜車，坐緊纜車的時候，落好大雨，又大霧，完全望唔到風景，好失望！而新果架360也太快了，如果風景好就唔夠時間睇喇！上到去3020米，有D唔舒服，有小小頭暈，可能係有D高山反應，呼吸同心跳都加速，加上行樓梯，真係要慢D動作！我地先去食飯！今餐在雪山食中餐，應該話半中半西，既有芝士火鍋，也有小菜，亦有腸仔，各適其適，芝士火鍋純萃比我地玩下感受下！主要都係食中餐！
食完飯自由活動，我地去買雪糕！主要係想玩雪山食雪糕！出去雪地好凍，而且天氣唔好！又大風又落雪，原本想去行冰川吊橋，雖然知道吊橋位置，但係太大霧，原本吊橋旁的一座建設，完全消失在大霧之中！加上好友冇帶太陽眼鏡，雪地反光嚴重，令他們看不清楚，又冇戴手套，對手影相影到好凍！所以入返室內，落返去睇冰洞，這冰洞沒有甚麼特別，在冰洞行完見有一條通道，原來通道通往吊橋，可以在吊橋這邊，或另一邊經雪地來回，我地出去睇下，見霧少左，可以行吊橋，我地影完相諗住行吊橋，見到有工作人員，佢話要封橋，佢話一係要即刻原路走，或者行去另一邊經雪地走，因為天氣太差，我地唯有選擇原路走！
返去主樓之後，等齊人落山，天氣仍然落雨，在纜車無法睇到外面情況，落到纜車站仍落雨，持續落雨，影響了我們無法影相！好失望！而原定今晚遊船河，亦因天雨取消，要明天睇天氣再決定是否去！上返旅遊巴士返酒店，酒店就在纜車站對面的山腰上，酒店名叫做 Waldegg hotel ，前往酒店的路上天氣放晴，不單只冇落雨，仲好好天，如果早一小時好天，就可以影到相兼遊船河！往酒店的山路上，沿途看見好些酒吧和餐廳，外型是傳統瑞士木屋，好吸引，上到酒店，見洒店也是傳統木屋的外型，房間也頗大，是目前住過最大的，仲有露台，個 view 好靚！正正對住纜車線，又望到鐵力士峰，好正呀！我地狂影相，影完見仲有一個鐘先食飯，決定行返去頭先經過的地方！好友的男友上完山後身體不適，留在酒店休息，我地兩個出去行，沿住馬路落山，沿途天朗氣清，雖然有太陽，但唔熱，仲好舒服！一行出來幾分鐘，聽到有牛鈴聲，以為有牛，原來係羊！在馬路旁下方的一條斜坡上，有幾隻羊在吃草，他們吃草時頸上的鈴在嚮，好得意呀！我地又影相又拍片，好開心呢！影完繼續落山，落到去餐廳果邊，見有條商店街，不過好靜，冇乜人，我地見到有藥房，好友買了藥給男友，我地又去超市買水果，然後先行返上酒店，行返斜路上去就辛苦喇！足足行左成廿五分鐘！返到酒店遲左幾分鐘！
今晚的晚餐在酒店食，先來沙律菜，好新鮮，生菜好爽脆，簡單落左橄欖油都好味，跟住薯仔湯，好好味！主菜係牛肉，雖然有點羶，但味道不錯，今餐算係呢幾日最好的一餐西餐了！食飽飯，天仍未黑，決定行多次落山，今次只落一半路程，其他團友亦有落山行！行多次都仍然覺得好正！
沒有留言:
發佈留言