今朝早餐去返尋晚食飯果間餐廳，早餐食物的選擇不多，味道亦麻麻，而且有大陸團，見到佢地都唔想爭，拿拿聲走！今日只去米蘭一個地方，希望有多D自由活動時間！
9:00出發，近兩小時到中途站，take 個 break，再繼續，差不多一小時便到達米蘭，落車後要行去米蘭大教堂，之前來過一次，對呢條路有印象，我地行到去教堂前，已經好多黑人縛手黨，要小心提高警覺，今日有三個小時自由活動，好友想搵祖雲達斯的專門店，我地在米蘭大教堂後面的商店街，見到有其他足球店，店員告訴我們在後面街的麥當勞後面，我地見到麥當勞，行去後面街搵，搵唔到，放棄左，諗住去大教堂，在商店街見到有家 outlet，好友想睇，所以入去望下，我個人對名牌冇興趣，所以冇睇，等佢地睇完買完已經成個鐘！跟住去食飯，求期入左間餐廳，叫做 Bar Madonina ，叫左 pizza 、沙律、risotto 、炸雞扒，味道唔錯，食完野，去大教堂，想入去參觀，呢度用左新的入場方法，之前就咁入去比錢，依家多左個售票處在教堂的右邊，而且加了收費廁所，首先去售票處攞飛，然後好似銀行等叫 no. 咁，佢有顯示屏，叫人去指定 counter 辦理手續，入到去等的位置其實仲有部自助機，都要排隊，而等候區亦是售賣紀念品的地方，頗多人，最大問題個 no. 冇乜點郁，見到時間唔多夠，最後放棄左！
好友想去搵多次祖雲達斯專門店，再問下人，再 search 地圖，因為呢度D shop冇招牌，要行到門口先見到店名，最後搵到原來同麥當勞同一條街，同一邊馬路！好友好開心，搵到想要的球衣，仲可以印喜歡的球員名在衫背，買完球衣已經要匆匆忙忙趕返去集合點！集合後坐車去晚餐，今晚食中餐，我地早左，餐館未開，去左附近超市，超市好細間，冇乜野啱，行返去餐館，店員提早比我地入去，今晚5餸一湯白飯任裝，食左幾餐西餐，都係中餐啱食D！始終冇咁乾爭爭，難怪上次跟團個領隊話西餐唔啱我地食！
食完飯，返酒店，今晚入住 The Hub，上次住過，比較型格的酒店，今次見殘舊左，間房個廁所係殘廁？？可能係方便殘障人士用的房，才有空間加床吧！
沒有留言:
發佈留言