收左工同好友飯局之後，匆匆趕返屋企執行李，趕唔切撘A29 尾班車，唯有撘 E22，去到巴士站，剛剛走了一班車，要等20分鐘，等緊車果陣，收到短訊話航班 delay 35 分鐘，反正車程耐左，撘 E車既唔好處係冇行李位，D行李堆晒輪椅位，如果有輪椅上車，D行李真係要跟身先得，E車要入東涌同埋國泰城，先至去機場，車程用左55分鐘，原本諗過坐地鐵，要46分鐘，價錢$60，E車只係$18，地鐵要轉三次車，由青衣上車先有得坐，所以先揀巴士！
今次撘國泰，前晚已經在網上辦左登機，零晨1:05am 機，delay 到1:40am，將行李寄艙後，在機場內行下影下相，機場都有D聖誕裝飾，又有個tablet 比人影相，即時播返出來，又可以 email 比返你，我念得意影左兩張，影完就過關，今次閘口在60號，要坐無人駕駛，去到閘口都係十二點幾，充下電先！一坐低就瞓，中途有派餐，係凍冰冰的麵包，接過就安低繼續瞓，可能零晨機知個個都瞓，派餐都冇開燈，我瞓足全程，中間因為乾燥咳，攞左喉糖含住慢慢溶，可以頂到到埗，飛左3小時45分鐘就到，當地時間6:25到，在跑道行左好耐先停，今次過關都好快，又要等行李，過關時，關員見我帶吉喼，都冇特別 check，出左海關去搭NEX，早快一班車7:47，仲有大半小時，都係在月台等，攪張 SIM card 攪左好耐都唔得！上車又瞓，又瞓左成個鐘！
去到新宿落車果陣好凍！由NEX 車站行去東口都幾遠，由東口行去太子酒店都算近，3分鐘左右，近住歌舞伎町入口旁，放低行李即刻出發！先去食野，去左歌斯拉洒店(Gracery hotel) 前面的絆魚壽司，之前去過，覺得質素好，好掛住大拖羅！叫左兩件大拖羅 (本鮪大トロ)、兩件牡丹蝦（ぼたんえび）、一件蟹柳、一件裙邊、一件蠑螺、一件海膽軍艦，實在太好味，要encore 大拖羅同蠑螺！
食完野出發去迪士尼！坐中央線（快速）去東京站，再轉京葉線去舞浜，一到步即可刻買張車飛入園，又有聖誕紀念飛，影相位同上次一樣，係15週年背景，所以冇影相，入閘後影相位係聖誕主題，當然要影啦！去到售票處，已經十一點幾，Toy story mania 的fast pass又派晒喇！原來售票處有寫，入到去再睇下排唔排！
一入園例牌影下門口隻船，今日好凍，海風吹來更凍，原來想去坐Gondola ，但係太凍了，要入店內取暖，好彩中午好好太陽，暖返D，行去隻船果邊，去買骨付雞肉腸，上次食過好好味，難怪經常排長龍，見佢出左 Hot wine Rose 就買來試下，入面有一粒士多啤梨同一粒好似小丸子物體，原來係梨肉，不過機酒好藥水味，完全中伏！
坐左一陣又繼續去 Duffy 果邊，今次去排隊同 Duffy 影相，好耐冇同 Duffy 影相，二月同 Shellie May 影過，所以今次同 Duffy 影，職員話要排80分鐘，過常預多時間，不過今次真係要等足80分鐘，因為進度好慢！職員會sell 人買佢地影果D相，咁遠來到當然買，同埋佢地影得靚D，個相套仲咁靚，好過香港果D，咁多年都係果個套，又大過張相好多，呢度個相套可以放三張相，個樣仲靚好多！同 Duffy 影完相仲擁抱一下先走，好開心！
影完相出來，當然去 Duffy 商店睇下，今次見Duffy 衫賣哂，可能近聖誕，所以清晒吧！其他野都冇乜野睇啱，今次冇乜點買野，都係一個中 size 膠袋裝晒！買完野，去食野！去我最喜愛吃的 cafe Portifino，今日超多人！排晒長龍，見佢出左15週年紅洒同白酒，不過要堂飲，不可成支買走，所以冇買！今次唔食15週年set，叫左半隻燒雞，又中伏！雞冇雞味，又細隻！
食完再出去行下，入夜後又凍又大風，商店都要關左部門，實在太凍，真係冇辦法行出去！繼續在店內"熱身"，等到好熱先出去，去左入口再影隻船，夜晚隻船好靚！影完就走，今次逗留時間最短，因為太凍，坐左零晨都好攰！早D返去酒店 check in ！
上火車好在有位坐下！去到東京站，見東京 Banana 出左新野，又排晒隊，又買來做手信！返到新宿，先返洒店 check in，再出去行下，行去歌舞技町，見到有 Seven eleven ，有飲開果支八年梅酒，買！今次行李可以30kg ，重D都唔怕！諗住去激安の殿堂，點知驚見佢改左名叫驚安の殿堂！唔知係咪另一間公司！不過logo 果隻公仔好似冇變，食完飯先去！在附近行左兩圈都唔知食乜好！最後去返酒店對面，一間叫あおな 食吉列牛的店，佢地用國產牛，獨沽一味吉列牛，只係唔同牛或者部位，我叫左個霜降牛，原本想叫一客大的，但怕吃不到，叫了一般份量，餐跟沙律和飯，飯有白飯和十六穀米，叫了十六穀米，牛肉的份量很少，而且冇乜味，頗令人失望！吃完便返酒店休息，明晚才行驚安の殿堂，今天實在好累呢！！
沒有留言:
發佈留言