2016年10月開心東瀛遊 - Day 2 黑門市場、心齋橋、道頓崛、梅田

今朝一早起身，去黑門巿場食野，就在心齋橋附近，呢度曾經在09年來過一次，覺得冇乜野好食，又好舊， 近幾次去大阪都冇再去過，今次因為好友想去，所以去睇下過左幾年有冇唔同。

由心齋橋行過去好近，在入口見到同以前一樣舊，入口仍然有家寵物店，對面仍然是相機店，行入去，唔係太多人，入到去轉右邊有一段路好多人，呢D全部係遊客，上次來只有一、兩家賣壽司的店有堂食，現在幾乎每家都有，不論是壽司、牛肉、海產、水果，全部都有即買即食，壽司店有三、四家，最多是否賣海產的，有即開即食的海膽生蠔、燒貝殻類海產、其次燒牛肉，一些原本賣牛肉的店，就是那些在日式超市常見到的牛肉櫃，也在店旁加了個電爐，即揀即燒，按重量計算，吸引很多人來吃，而蜜瓜和提子，也是今期熱門水果，我們來回行了一轉，見有一家賣的海鮮很新鮮，而且有坐位可以即食，便揀了海膽、扇貝和花甲，見到店洗海膽花了些時間去清潔，感覺放心，海膽很鮮甜，所以要 encore，而扇貝和花甲在店裡面燒，送出來的時候很熱，不過放了太多豉油，太咸了！原本很新鮮，應該只加小小豉油便可提升鮮味，現在被咸味蓋過了鮮味，可惜！

食完海鮮，我地就去揀牛扒食，牛扒有佐賀牛、神戶牛，來到大阪，就食神戶牛吧！薄薄一片牛扒，即時煎，店員落了鹽，份量不少，咸了小小，肉味算是不錯！食完牛扒去食蜜瓜，有一家店頗大，除了水果還有燒烤和剌身，我們吃了海鮮，現在只吃蜜瓜，買了一份坐低食，蜜瓜好甜，但不及北海道的甜！

食完野，在心齋橋一帶行街，可能尋日休息唔夠，加上作病，今日好友謝晒，行左一陣想坐下，去左大丸食lunch，呢度本來有兩間大丸，其中一間裝修緊，得返南館，去年在大丸吃過鰻魚飯，今次想再吃，伹正在裝修，去到南館門口，有個外藉人在表演，企定唔郁果種，佢件衫同領呔係飛起左，幾有趣，睇的人多，比錢就冇！入到南館，見到有鰻魚飯，雖然唔係果間，不過都試下！要等位，同好友在外面坐，好友瞓著了，等左十五分鐘左右有位，叫左一個 set，燒鰻魚肝同埋蛋包鰻魚，個 set 賣相唔多靚，味道亦略淡，有點失望！食飽左，更眼瞓，好友要小睡一陣，我就去家品部望下！睇唔啱野，返去叫醒好友，繼續行街，先去大丸地庫買水果，好多靚提子，買左巨峰同睛王今晚食！

行出大丸去搵朋友推介的龍蝦包，由大丸出返去心齋橋，就見到 Luke's Lobster ，就在大丸 Gucci 對面，有幾款選擇，有龍蝦、蟹、蝦，可選一款或兩款，我地揀左龍蝦同蝦，味道不錯，沒有太多醬汁，只是麵包不熱，如果麵包熱些更好！

食完包，轉去梅田，去到大阪站，在地下街搵左一輪先揾到阪急，行左一陣，又去搵食，朋友推介一家叫本陣的烤肉店，搵到位置卻不見，問附近餐廳的人，原來已經結業！唯有搵其他地方吃晚飯，還是返回心齋橋！在道頓崛，見到一家叫山內農場的店，記得有朋友推介過，之前在東京見過沒有吃，今次去試試！

店內格局像大部份居酒屋，這𥚃用電子餐牌落單，食物以燒烤串燒為主，有些一品料理，我們叫了鐵板雞、烤菇類、燒牛舌、烤魚、雞肉串，先來最期待的鐵板雞，雞肉外層有些黑黑的油，像用燒焦的用具煮過，看來不吸引，味道也一般，大失所望！其他食物都一般!

食完野又去激安殿堂，幫朋友買野，今次去另一間，只係隔一條街，在固力果招牌那邊，買完野返酒店食提子，好好味呢！