雪洞洞

 在九月廿六日才開業的這家餐廳，就在旺角文華 MPM ，這餐廳主打北海道食品，而且仿照北海道的雪洞設計，聽起來很特別，就去試試看吧！

去到 MPM 見到和民的樓下放了幾家餐廳的廣告牌，上到 3/F 的和民已不能夠再上，原來要落一層在2/F 撘 lift𨋢，其實最方便既方法，就係由GAP 正門入，一入店門口就直接撘扶手電梯上 2/F，其實這扶手電梯兩邊都貼了雪洞洞 5/F 的廣告，扶手電梯一上就上到 2/F，轉右已見有兩部 lift ，按5A就到喇！出 lift 行落幾級樓梯，就係入口，見餐廳地方都唔算細，一入去已經係兩排雪洞型入口的小房，店內靠牆的位置都是這種房仔，房仔可坐兩至三人，有一張四方枱和一張L型坐位，有些像卡位，面對面坐兩個人，亦有些大一點，可坐四至六人，雪洞房的＂洞口＂略低，要低頭入去，每個房仔門外都有個 QR code ，scan 個QR code後，會 link 左去 YouTube ，睇一D介紹北海道景點既短片，除了房仔外，其餘都是一般餐廳的四方枱，我們被安排坐雪洞，小小的房間很適合靜靜地傾計，落 order 後，店員還會放下小竹簾，剛好遮到個樣，私隱度高，我地在洞內洞外都影左好多相呢！

枱面有三份餐牌，食品、飲品和甜品，枱上還有個圓形的鐘，叫人時可按鐘，店內還有 free Wifi ，很細心，餐牌上食物的種類不少，有刺身、壽司、意粉、拉麵、pizza、壼炊飯、串燒、焗薯、炸雞、鐵板燒鍋等，不過每種食物都只有幾個選擇，例如刺身有七八款，壽司有六款，焗薯有三款等，style 有D似和民，樣樣都有D，睇完餐牌好多野都想食，我地叫左三文魚腩刺身，三款壽司、串燒牛舌／雞軟骨／雞翼、烤青椒、茄汁肉醬焗北海道薯仔、照燒雞壼炊飯，和兩杯梳打，三文魚腩很厚和肥美，五件售$65，不算貴，壽司盛合只有兩種，一種是每款壽司一件共五件，或指定三款壽司各兩件共六件，我們叫了六件那款，有三文魚、煙肉和芝麻卷，味道不錯，串燒也做得不錯，焗薯的味道也 OK ，只是茄汁份量少了點，而壼炊飯就有點像煲仔飯，店員會把一個小型 gas 爐放到枱上，再把盛著生米的小鍋，席間煮製，小鍋上火爐後要煮廿分鐘，店員在計時器按了廿二分鐘，廿二分鐘後，計時器嚮起來，店員查看飯的情況，見飯仍很濕，再煮多幾分鐘，聞到小小焦味，息火後再焗多一陣先到食，份量剛剛好分成兩碗，飯仍然稍為濕了點，但底部有小小焦，不過幾好味喎！一路食都聽到計時器響聲，應該有唔少人食呢個壼炊飯，呢度每個房都有獨立冷氣出風位，所以幾凍，食呢個壼炊飯當堂暖返D！食完飯又點少得甜品呢！甜品多數是牛奶雪糕和芭菲，既然係北海道食品，當然要試薰衣草牛奶雪糕，味道比預期淡，可能薰衣草的味道不易控制，大多都做得比較淡，但牛奶雪糕就不夠濃滑了，有點失望，記得在北海道吃的牛奶雪糕是很濃的奶味。而且很滑的.........不過整體食物質素不錯，而且很喜歡這裡環境和那個暖暖的壼炊飯，服務也很好，廁所雖然在後樓梯，但光猛清潔，一定會再來，下次要試釧路炸雞和鐵板燒鍋！

離開時見門口有售賣北海道零食，有十勝牛奶糖、夕張蜜瓜 Kitkat 、知床薯片、富良野露筍濃湯、北海道燒粟米等，我們買了一些，感覺像去旅行買手信一樣呢！