高流灣

又有同事離職了，今晚同佢食飯，呢間食店係 C類場所，即係可以六個人一張枱，我哋九個人，就分咗兩張枱，呢度有小菜或者火鍋，我哋揀咗火鍋，叫咗都係一D大路嘢食，冇特別叫海鮮，呢度食材都幾新鮮，而且份量都幾大碟，味道唔錯👍🏻

食完飯，例牌攞份禮物出嚟，今次送耳機，因為呢個同事都鍾意聽歌，大家都影吓相留念，因為同事今次離職嘅原因係移民，佢就去英國，因為佢有親戚喺嗰邊，佢周不時同人講佢自己移民嘅安排，聽到有D同事都心郁郁，佢話佢住嗰度係比較郊區一D，唔係咁多香港人，佢買咗間House，好似話二百幾萬港紙左右，最主要都係有兩個小朋友要過去讀書，希望佢過到去生活愉快啦！

Cruella 黑白魔后

 

Estella 一出世，頭髮就係一半黑一半白，她和母親相依為命，她長大後衣着打扮都好有自己嘅風格！而且性格都同其他小朋友好唔同，有一次母親帶他到一個豪宅，裏面有好漂亮嘅衣服，但係媽媽就俾狗推左落懸崖死去，他自己一個在公園遊蕩，認識了另外兩個男孩，自此三人便一起生活，三人呃呃騙騙過日子，由於他喜歡做衫，所以希望加入最著名的服裝公司，可惜入職後一路只做一些低微的工作，直至收到老闆的賞識……！

套戲都幾好睇，我唔知呢套戲同101斑點狗有冇關係，因為我都唔記得咗果套戲係講乜嘅，不過呢套戲入邊D角色嘅造型都好似101斑點狗，兩個女主角都做得好好，唔錯！

Livehouse

從來未去過西九文化區，今日就去睇吓有乜嘢食，呢度嘅位置都幾格攝，應該有小巴可以直接去到，不過我就搭咗巴士，在西隧口行返過去，今日天氣好熱，行到身水身汗！🥵

原本想去食中菜，不過我覺得佢啲嘅價錢都好貴，所以冇去試，去咗呢一間西餐廳，餐廳係半開放式，所以冷氣唔係好凍，加上我行到身水身汗，所以都覺得好熱！🥵

餐廳入面有個舞台，我諗夜晚可能有 Live Band，其實天氣咁熱佢地可以拉埋一部份嘅門，等D冷氣唔使走晒，店入面嘅座位都唔算好多，我哋叫咗一個沙律同埋一個牛仔骨，每人要一杯咖啡，咁熱當然飲凍㗎啦，食物嘅味道都唔錯，咖啡都好飲，淨係熱左D🥵

食完野喺附近行吓，見到 M+ 博物館，不過就未開放，所以入唔到去睇，行行下開始落雨，仲幾大雨下添！所以我哋call車轉左去尖沙咀海港城！😅

山西刀削麵皇

之前成日去嗰間山西麵店執咗笠，見到呢間都係食山西麵，好耐之前食過一次，平時行過都見佢幾多人，今日見佢冇乜人，又入去試吓！

食物嘅選擇都幾多，試咗麻辣牛腩刀削麵，同埋麻辣雞絲年糕，麻辣嘅味道同平時食開嘅麻辣有D唔同，而且唔係好夠辣，不過都過得去，可以再食！

 

清酒煮蜆

飲完咖啡，返屋企買餸，見今日D蜆都幾新鮮，買D返去煮！

試吓用清酒煮，上網睇吓食譜，用清雞湯加清酒，比例 1:1 ，加薑煮滾之後，放入蜆，加蓋煮三分鐘就食得！我覺得咸左少少，雞湯應該要用水開左先，例如 250ml 雞湯加 200ml 水，變咗 450 ml 雞湯+ 450 ml 清酒，就淡好多喇！

 

Another One

今日去剪頭髮，行過堪富利士道，見到呢間咖啡店，記得之前係甜品店 Seijo Fruitier ，唔知幾時轉左，見冇乜人，就入去試吓，店入面大概有八九張枱，有兩張係大少少坐四個人，其餘都係坐兩個人，原本坐近門口嗰張枱，但旁邊四個大媽好嘈吵，所以坐咗去最入嗰張枱！店入面除咗咖啡，都有熱食、漢堡包、同一D甜品，有小小越南 feel ，我叫左個 crème brûlée 同一杯 dirty ，味道唔錯，呢度食物同咖啡都唔錯，係環境迫左小小😅 下次試吓D熱食！

 

Rings Coffee

今日無無聊聊想去九龍城飲杯咖啡，上網search左幾間咖啡店，去咗呢一間試吓，今日天氣好熱好曬，咖啡店門外都有幾個座位，咁熱嘅天氣都有人坐室外，店入面嘅座位都唔算好多，今日都沒有滿座，我叫咗一個牛油果多士，同埋一杯 latte ，多士嘅味道都可以想像到，牛油果排到好似一朶花咁好靚！

上網search嘅時候，先知原來九龍城有好幾間咖啡店，我都未去過，下次再試吓其餘嗰幾間！睇新聞話今晚有血月，錯過咗就要等12年，唔知12年後自己會點呢？仲有冇機會再睇血月呢？😅

 

Mokumoku Yakiton

之前睇電視介紹呢間食日本串燒嘅小店，今日去試一試佢，店入面嘅地方都幾細，計埋我哋只有兩枱客，呢度嘅名物係豬肉，不過我哋都係叫咗一、兩串豬肉，其餘叫咗牛舌、羊扒、雞翼、鱔等等，食物嘅質素唔錯，全部野都係即叫即燒，呢度仲有自家製嘅梅酒，亦都有菠蘿酒、芒果酒之類嘅水果浸酒，我哋叫咗杯梅酒試吓，不過我覺得麻麻地，所以最後都係飲返其他飲品，整體來講呢度食物質素係幾好，當然價錢亦都係貴咗少少，餐廳嘅格局都好似日本D居酒屋咁，不過店員就冇喺日本D人咁友善！😅

 

B.O.T.H by Texas Burger

今日相約好友F一齊食lunch，去咗呢間新開嘅餐廳，雖然今日係星期日，不過都有位，唔使等！我哋坐近門口，叫咗卡邦尼意粉同埋一份牛扒，唔少得飲番杯咖啡！食物都幾好味，份量都唔少！

同好友傾偈佢話準備去打針，之前仲猛咁話叫人唔好打住，忽然間又話去打，同佢前度一樣，兩個都係突然間話要去打，雖然我都想打，不過都仍然好擔心，所以都係過多一兩個月再算！