Hotel Alexandra

北角有間酒店新開，去試一試佢個下午茶，早一個星期已經訂咗枱，我早咗去到酒店，所以周圍睇吓影吓相先，酒店嘅正門在地庫，餐廳都係在同一層，落到去見到午餐仲未完，下午茶未夠鐘，就行過去宴會廳果邊影吓相先，酒店係維多利亞式宮殿果種設計，雲石嘅地板，配上金碧輝煌嘅水晶吊燈，你都用咗好多鏡增加空間感，宴會廳嘅門口亦都好高，好富麗堂皇，周圍都好靚好宮廷式，吸引唔少人影相，有D人仲不斷在同一位置狂影！

影完相就差唔多夠鐘開始下午茶，見到佢編排D座位都坐得幾迫，絕對唔會有1.5米距離，其實唔係好明點解咁樣安排，既然限聚令限制咗每枱兩個人，同埋餐廳只可以坐一半嘅位，應該每張枱都可以隔得好開，偏偏佢就編得好迫，只係靠一塊膠板隔開，佢嘅安排係半間餐廳唔俾人坐，半間餐廳俾人坐，所以入客果邊D人就迫埋一齊，唔明點解要咁樣安排，可能方便佢哋自己做嘢，咁就對人客來講唔得細心！我哋唯有選擇坐單邊位，起碼另一邊冇人先，坐低之後就係等食，因為只有一款下午茶冇其他選擇，所以唔使落order，只係等佢派餐咁樣派，派完個Tea set就同我哋落單飲D乜嘢，我哋就飲咖啡！

Tea set 來到，見個樣麻麻哋，識落亦都真係麻麻地，鹹點都仲過得去，甜點就真係麻麻哋，而且甜點嘅比例都係多咗D，其實呢度價錢唔係咁貴，食物嘅質素都成正比，不過服務算係幾好，同埋靚景佈置補返數！

 

Artista Perfetto

食完飯在商場行咗一陣間，見到有一、兩間幾特別嘅舖頭，主要都係買一D家品或者食物，不過就唔係好啱我，有間賣日本碗碟嘅舖頭都唔錯，但係未至於話好鍾意，所以冇幫襯！

行行吓見到有呢間咖啡店，又飲番杯咖啡，仲叫咗一件芝士蛋糕食，芝士蛋糕都幾好食，不過佢用即棄木餐具，個質感唔係幾好！咖啡味道幾濃，都唔錯！

見到商場地牢有間超市，又入去睇吓，超市入面有肉檔，同埋海鮮檔，可以話係半超市半街市咁，超市買嘅嘢都係大路嘢，冇乜特別！

 

炙。宴

 

見到將軍澳有個新商場開咗，所以就去行吓，平時好少去將軍澳，不過見係新商場即管去睇吓！

其實日出康城都係一個好大嘅地方，分咗好多期同埋好多個屋苑，呢個新商場連接住地鐵站，地鐵可以直接入去商場，商場因為啱啱開，有D舖頭都未開，行咗一個圈先去搵D嘢食，見到呢間日式餐廳，店入面只有一枱客，我揀咗十勝豚肉丼，上次在圓方食過麻麻哋，又試吓呢間做成點，可惜都係失望，另外叫咗兩隻蕉燒宮崎雞翼，味道就一般，有陣時可能環境、氣氛、心情影響都唔定，去旅行食過好食嘅嘢，第度係食唔返！😔

Pokka

去完迪士尼，出返去青衣食嘢，因為好友想在青衣直接搭車返屋企，我哋去咗 Pokka，都好耐冇去，見到佢嘅價錢比之前平咗，推出左一D套餐，冇以前嘅定價咁高，當然咖啡都冇減價嘅，都諗咗一陣夜晚黑好唔好飲咖啡，見今日攰攰地，應該唔會瞓唔着，最後都係叫咗咖啡☕️，我哋叫咗一個牛扒🥩同埋一個意粉🍝share食，食物質素就同以前差唔多，不過不失，咖啡就一樣好飲，可能市道都唔好，見到D店員係咁 sell 會員套票，不過就冇 sell 我哋，就算佢Sell我哋都唔會買，因為我哋都好少嚟呢度! 🤭食完飯想去商場行吓，不過好多舖頭都關門，我哋只係去Zara 行咗一個圈，已經冇嘢好行，所以就各自回家！😅

 

香港廸士尼15週年 - 夢想所在 奇妙15載

再同好友 F 去廸士尼，上次去太多人呀，加上城堡🏰上次未開， 21號果日正式開左，我哋係得今日有時間去，所以今日去睇吓個城堡入面有D乜嘢！在青衣食完野就入去，今日都唔係好多人，門口已經有D正式嘅15周年裝飾1️⃣5️⃣，之前都奇怪點解15周年冇大搞，原來要等埋個城堡，商店街都多咗好多15周年嘅產品，不過都未能夠吸引到我哋買，因為都唔係話好靚，我哋反而買咗一個頭箍，因為見佢閃令令好靚，在商店街行咗一個圈，就要去城堡睇吓，我哋在城堡外圍影咗一輪相，擴大左嘅城堡，加咗13個公主嘅特色在塔尖上，我哋一路搵每個塔尖嘅圖案代表邊一個公主，突然間見到有巡遊，即刻走咗去睇巡遊，呢個巡遊比平時嘅細型好多，都叫做有得睇吓啦，所以個個都衝晒過去睇，巡遊冇停低，一路行到尾，所以快速影完相就行返去城堡，繼續頭先未睇完嘅城堡裏面！

城堡裏面只有兩個室內地方，一個係同公主影相嘅位置，另一邊就係珠寶店，城堡嘅入口果邊係一個升降舞台，後面出去果邊就有13個代表公主嘅花圖案，同埋柱上面嘅雕刻，亦間中有D閃令令嘅效果，牆上面有D QR code，掃描QR code有林嘉欣把聲聲音導航，我地有排隊入去睇公主影相個位，因為而家冇得同公主影相，呢個時間有冇公主俾你遠距離影相，所以只係影下個房就走，珠寶店叫做入去望一望，因為有個足金嘅阿拉丁神燈、玻璃鞋、美女與野獸果朶玫瑰，所以都會影吓相！

睇完城堡就去睇奇妙夢想城堡故事展，展覽左成個城堡嘅設計、用料、建造過程嘅影片、每個塔尖嘅圖案模型、成個城堡嘅模型、每個公主嘅故事等等，我哋都睇咗半個鐘，因為要慢慢睇，同埋有13個公主咁多，呢個展覽都好值得睇，我相信佢只係會展出一段時間，睇完展覽出嚟見到城堡升降舞台有表演，當然要睇吓啦，係一場聖誕歌舞，睇完我哋又去玩Iron Man，入到去竟然冇人，去到等入場嘅時候先開始有幾個人入嚟，原本諗住會包場添，玩完Iron Man出嚟，見到原來聖誕樹🎄果邊有亮燈儀式，有少少煙花🎆，我哋只能夠離遠睇，不過見到有煙花睇都好開心！當然唔少得飛雪嘅效果啦！❄️

我哋行多一轉商店小鎮大街，跟住就走喇！走嗰陣睇新聞見到兩個樂園又要關門喇！😨星期三開始關閉兩星期😔好彩講得切今日去咗，如果唔係又要等到聖誕先，到時可能銀咭都入唔到喇！🤦🏻‍♀️

 

海港薈

相約好友到青衣集合，都有一段時間冇去青衣食嘢喇，過往我哋都主要係去食拉麵，今日見有間酒樓好似新新地，開咗唔係好耐咁款，而且好耐冇一齊去飲茶啦，所以去試吓啦，雖然係午飯時間，不過都有位，我記得以前呢個位我哋嚟食過嘢，好似都係酒樓，我哋叫咗幾款點心，有鮑魚燒賣、帶子腸粉、素菜餃、叉燒包、豉蒜炒尖椒，食物質素一般酒樓咁啦，我哋食咗一陣嘅時候，隔離枱有位嬸嬸，喺度咳😧，嚇到我哋同另一邊果枱客，你眼望我眼，開頭諗住佢唔知係咪濁親，過咗一陣佢又再咳，所以我哋同另一邊果枱都係調咗枱🤭，而家疫情咁嚴峻都有D驚，始終大家除咗口罩！