1908 British Chinese

又約咗人食晚餐，去咗上環，原本想食一間日式串燒，但係佢得一個鐘頭時間俾我哋食，所以我哋冇食到， search咗一輪之後搵咗呢一間中餐，店入面亦都係只有兩三枱客，佢呢度有啲套餐，不過覺得啲嘢唔係太啱食，所以散叫，店員亦都推介一啲餐牌上面冇嘅嘢食，一款係牛尾，另一款係鴨，唔記得咗係咩名，另外叫咗兩隻蒸扇貝，同埋炒咗碟芽菜，都食得好飽，店員都送咗甜品俾我哋，仲有 fortune cookies 😂 但係個甜品係西式嘅😅 可能因為佢係英式中菜，所以中西合璧！店員服務好好，食物質素就一般，相對價錢略為貴咗D ！

 

町田商店

上次去Airside 同好友食飯，見到呢間拉麵店好多人排隊，今次嚟到就冇人排，而且大把位！呢間係食拉麵嘅店，見到佢有沾麵，所以我就食沾麵，另外加咗個餃子，個麵同湯都唔錯，餃子亦都可以，下次可以再食!

 

Turning Point by coffee art 、蟹仙

今晚出尖沙咀食飯，先去美麗華間coffee shop度會合，叫咗兩杯嘢飲同埋一份雞翼，味道都OK，唔敢食咁飽，因為陣間要去食海鮮！

跟住去食蒸海鮮，間店舖嘅位置都幾隱蔽，我哋原本訂咗7:30 ，提前咗半個鐘頭去，去到只有兩枱客，都係講國語嘅，餐牌有幾款套餐選擇，因為大家都唔係太肚餓，所以揀咗個最平嘅套餐，少啲嘢食，不過佢都有魚、蝦、蟹、龍蝦、扇貝、青口、蠔、螺，加埋個粥，都好夠食，海鮮都好新鮮，而且啲貨都幾靚，係個蠔爭少少，店員話佢哋海鮮係自己海鮮檔攞，所以係靚貨！都食得出好新鮮！成晩只有幾枱客，多數係遊客，而家香港嘅市道真係麻麻哋，特別係食店，真係唔易做！😅

 

泰國婆

之前見呢間餐廳裝修咗好耐，終於都開咗，見到冇乜人，原來價錢都係略為貴咗少少，試咗佢嘅海南雞飯同埋炒泰式金邊粉，兩樣嘅味道都唔錯，可能都幾正宗，因為同喺九龍城食嗰啲差唔多，應該算係正宗啩🤣🤣

 

Lento

放假又去九龍城食咖啡，今次去呢間之前係叫做 Sofi ，今次嚟到原來已經轉咗手，裝修唔同晒，座位比較少，把食物主要都係意粉同意大利飯，當然都有D沙律，試咗佢哋嘅三文魚牛油果蓋飯，同埋避風塘蟹肉意粉，食物都唔錯，賣相靚味道好，咖啡亦都好飲，都坐得幾舒服！店員嘅服務都好好，亦都好健談，有同客人傾吓偈，整體感覺都唔錯！

 

蝦蝦燒

今晚因為慶祝好友生日，所以去食流水蝦，我哋冇訂枱，因為而家周圍都有位，根本都唔使訂枱，去到見得幾枱客，呢度除咗流水蝦之外，都係任食燒烤，食物嘅選擇都算多，佢有一個海鮮檔，不過問落有啲腥，不過D魚燒出嚟又幾好食，蠔🦪就唔敢食，雞翼嘅味道都唔錯，當然唔少得燒菠蘿，我哋又買咗個細細個嘅蛋糕，食埋先至走！

 

Smokehouse bar

等齊人就上去朗豪坊商場頂樓飲嘢，去咗呢間酒吧，一人叫咗一杯Cocktail 飲，飲品就一般，係有 D煙嘅 effect啱打卡😄，好友今日去完考試，應該都可以pass，傾偈先知原來佢quit咗原本份工，嚟緊想去考政府工， 而佢女朋友已經好耐冇做過長工，亦都搵咗份長工做，真係估佢地唔到！🤣

 

Harry Potter x Miniso

見到廣告話朗豪坊做 Harry Potter x Miniso ，梗係要去睇吓啦，啱啱開始做所以好多人，店員話以派籌嘅形式先可以入場，但係喺旁邊有個排隊位係for 候補位，即係話有啲人book咗嗰個時間冇嚟到，就可以俾你入，我去到候補位嗰度諗住排隊，點知候補位嗰度一個人都冇，所以可以直接入場，場地雖然唔算好大，但係產品嘅種類都幾多，好多產品都係未見過新出嘅，而且價錢都好實惠，好多樣嘢都好吸引，不過我諗住晏啲同好友一齊入嚟睇，所以只係買咗兩樣嘢，就去會合好友食飯，睇吓今晚夜D再過去睇吓！

 

The Pont

約咗好友今晚食飯慶祝佢生日，晏晝先同另一好友食，去咗朗豪坊呢間餐廳，佢有一半舖位係salon另一半係餐廳，上次經過都有興趣想試，今次就同好友去試吓，餐廳呢邊冇乜客，都幾靜，座位就唔算好多，而且有部份位係攔住咗，可能非繁忙時間就唔想開咁大，呢度主要係食西餐，我哋叫咗兩個午餐，分別係牛扒同埋三文魚沙律，牛扒就麻麻哋，三文魚沙律個份量都幾多，而且好多薯條，所以好友食左一半已飽，食完飯再去商場行吓！