山頂纜車

早幾個月前，山頂纜車轉左新車，但係啱啱開返嘅時候好多人，所以冇嚟到，隔咗一排而家就冇咁多人，不過每班車都係full晒，好多人都要爭取個靚位影相，可能都要等多架車先坐到車頭嗰啲位置，等車時間大概都係15分鐘左右，上到山頂其實都冇乜特別野睇，可能之前都嚟過兩次，所以冇乜特別嘢，太平山餐廳執左，不過好似有人接左手，見有人喺入邊傾緊啲圖則，唔知係要拆定係要裝修！在附近影吓相都好快就走！😅😅

賽馬會愛丁堡公爵訓練營

今日去左大埔呢個 訓練營，玩咗半日，本來預計會玩到身水身汗，但係都冇乜出汗，活動睇落好似好難，但係其實都唔係太難，我就挑戰左高空繩網，對於畏高嘅我來講，真係嚇死寶寶！就係要挑戰自己嘅勇氣，是否能夠踏出一步，當然一定係做到啦 🤣🤣 我呢度環境幾好，而且都好新淨，應該可以比一家大細，可能兩三家人咁樣來租宿舍玩兩日都得 🤔 呢度環境唔錯，可惜冇人帶航拍機嚟，如果唔係就可以影低成個場景 😂

 

Pavia

約咗幾個好友去九龍城食飯，主要係預祝我生日！

我哋叫咗四個晚餐 set ，成班都係食肉獸 🤣🤣，有兩個叫羊扒，有兩個叫牛扒🥩，前菜有沙律🥗或者生蠔🦪，另外可以加個龍蝦湯🦞，呢間餐廳之前嚟過，都隔咗成年唔好嚟，食物嘅質素都唔錯，不過價錢都係貴咗D，雖然係好友請，但係都唔係幾好意思 😅 不過今晚食飯嘅氣氛怪怪地，好友對佢媽咪好似唔多 nice 😅 我哋食完飯去好友屋企吹水逗號佢寫住喎同佢媽咪有少少Argue ，所以連中秋節都冇做節食飯 🥹🥹

 

たまご園 Tamago-EN

今日好想食親子丼，去咗呢間專門賣雞蛋🥚🥚嘅店舖，最後都係叫咗滑蛋鰻魚飯！ 味道不過不失，當然冇喺日本食咁好食啦！有個店員好得意，應該係男仔嚟，但係言行舉止好似女仔咁，可能係跨性別人士，不過佢D少女舉止都好可愛 😍😍

食完嘢行咗去果欄買水果，呢個月份應該係提子最當造，買咗束巨峰，另外買咗個靜岡蜜瓜，擺多幾日先至食，提子好好味，價錢都唔貴，比起早幾個月平咗好多，因為成個果欄都係賣提子，冇乜其他水果啱食，所以價錢就會平D!

 

Yakiniku Kakura 燒肉 かくら

睇完展覽，出返去銅鑼灣，今晚book咗食日式燒肉，慶祝好友生日，我較早前已經買咗蛋糕擺喺餐廳，所以可以好輕鬆去睇展覽！時間尚早，我哋搭叮叮落銅鑼灣，先去CASETiFY會合好友的男朋友，大家都係第一次見，佢哋買機套，因為換咗iPhone 14，都揀咗一輪，最後都冇買到！跟住去咗SOGO 行咗一陣，好友同佢男友買咗支清酒，再行多陣，早少少上去攞位！

跟住直接去餐廳，都好耐冇食過烤肉，因為另一個好友嘅朋友食過，推薦我哋呢間，之前呢間烤肉店隔離有間餐廳，我都去過嗰間餐廳，但係嗰間餐廳而家已經執咗，轉咗做牡蠣小屋，搵日可以去試吓！呢度有啲套餐，不過我哋最後都係散叫，我地叫左個牛肉拼盤，有牛腹前小排、牛裹腹小排、特上牛胸腹肉、牛上肋骨中肉、牛舌同埋一塊西冷牛扒，仲有豚肉、蠔🦪、帆立貝、冷麵、沙律，再另外叫多份牛舌、糖、一份牛肉！食到非常之飽，食物質素都唔錯！😋😋 壽星女見到有蛋糕🎂都好surprise！食埋甜品飽晒！

 

Arte M

飲完咖啡就去睇展覽，呢個展覽係類似 Team lab 咁，有幾個主題場景，一入去就係花花世界，主要係有兩種花嘅圖案，一種係紅色一種嘅黃色，今日好多人！😅 另外有兩間房可以入去影相，一間係有好多塊鏡倒影，然後牆上面嘅花係會轉款同顏色， 2而另一間房就有個鋼琴，俾人坐喺度影相，呢個位置係最多人影相，所以都要排一陣間隊！

第二個場景係森林，入面有啲動物行嚟行去，同樣係會轉兩次背景顏色，要捕捉下啲動物，睇吓點樣可以同佢影到合照，因為唔係每個位啲動物都停低！

第三個場景係湧浪，呢個位置係最細，亦都係最多人，可能因為地方細覺得好多人，個個都係影到唔願走，我哋又影相又拍片，影咗好多！

整體來講，都唔錯，係場地稍為細咗D，人比較多D，雖然我未去過日本嘅 Team lab ，但係根據好友嘅形容，一定大過呢度好多，內容都比較豐富，希望可以好快同好友一齊去日本果個 Team Lab 啦！

 

Campsite

今日約咗好友去鰂魚涌睇展覽，好日都唔會嚟一次鰂魚涌，喺網上見到呢座大廈有間餐廳，咁就嚟試吓啦，店嘅面積唔係好大，大概都係十枱客左右，餐牌選擇都唔算多，我哋叫咗三個午餐一齊share，有牛扒🥩、魚🐟、意粉🍝，食物一般啦！

我地行過嚟果陣經過 Arabrica，聞到咖啡好香，所以食完飯特登過去飲番杯咖啡☕️☕️☕️先去睇展覽 🤣

 

阿姆斯特丹 Amsterdam

 

1933年，Burt 是一個醫生，Harold 係一個戰士，兩人在戰場上受傷，在醫院接受治療的時候認識了

護士 Valeria ，三人成為了好朋友， Harold 後來成為了律師，他們在阿姆斯特丹生活了一段時間，過得很好，但 Burt 要返回美國見他的妻子，因此離開了他們，Burt 捲入一場由命案，三人再次相遇的時候，發現 Valerie 竟然是富商的妹妹…….!

套戲卡士都非常強大，就算客串或者配角都係有一定出名，可惜劇情麻麻哋，睇完都唔係好明佢想做乜！浪費咗咁多好演員！

栗子炆排骨

 

天氣凍左，就好想食栗子🌰同埋番薯🍠，見到有剝晒殼嘅栗子賣，就整栗子炆排骨，之前整過一次買有殼嘅栗子，好難搞！試過就算，都係買剝好晒嘅栗子！

在街市買咗$10 ，都有10幾粒，再買埋排骨就搞掂，排骨先用水浸一浸，去一去啲血水，跟住就落調味料醃一陣！調味料我用咗豉油、蠔油、楓糖漿（用楓糖漿代替砂糖健康D，當然可以照用砂糖啦）、粟粉、少少水，醃佢10分鐘以上，跟住落鑊煎一煎牌兩面，然後落栗子，兜一兜佢，加少少水，再落調味，又係豉油同埋蠔油，跟住加蓋細火煮10分鐘，咁就搞掂！好味！😄😄