Hea 遊北海道六天自由行-Day 3 登別

今日可以瞓晏小小，但要10點前 check out !因為今日要去登別，要 check out 一日，明日再 check in，先去吃早餐，然後去 check out ，旅行筪留在酒店，只帶一袋衣物用品去，會坐酒店專車去，兩點才開車，尚有四小時，先去 Daimaru 行行，未夠10點，未開門，在門口等等，在門內望出去見這裡的行人過路燈，在紅、綠人形公仔旁邊有排下箭咀，作用是倒數轉燈時間，好似我企响大丸的玻璃門內，等到剩餘一格紅色下箭咀，才推門出去過馬路，就唔使出去吹住風等，唔知等幾耐，而綠燈一樣，可以決定衝唔衝燈！等到差不多夠鐘，店員先開定門，等夠鐘才歡迎人客入來，在店內上了幾層，見大丸其實和另外兩個商場相通，行去另一邊，剛好見到有家 Disney store ! 今期的精品好公主，同埋好小朋友，係 Tsum Tsum 比較可愛，所以只買了小小精品，然後出發去二条市場！

去二条市場要經過大通公園，行左成半個鐘先到，呢度又係水靜河飛！人影都唔多個！地方唔大，差不多間間一樣，又係有即叫即煮的蟹和海鮮，行左兩圈，入左一間叫第一海鮮店的，店子很小，大約坐八人，有中英文餐牌，又有笑死人的中文翻譯！其中一款配料叫做鈕扣蝦！英文是 Botan shrimp ，即係牡丹蝦！大概是用讀的方法在 google translate 翻譯吧！把 Botan 變成 button！叫了一個海膽、帶子丼加隻特大"鈕扣"蝦!，實物同相片差好遠！海膽細條又有好幾種色，帶子和牡丹蝦好細隻，賣相扣晒分！不過食落口都OK既！這裏的價錢偏貴，不値得老遠過來吃！食完飯返去火車站，唔想行咁遠，去左搭地鐵，搭 Subway 只需一個站，雖然入到地鐵站仍要行五分鐘才到售票處，仍比直接行返去怏！

過到札幌站，去 Bus terminal 望望先，第一瀧本館酒店車在第四番（號）站，站外指示牌沒有註明，行入去四號站睇睇，見到欄杆有個牌，講明呢度上車，車會1：45到，2：00開車，四點到酒店，因為酒店 check in 時間是四點！未夠鐘，先搵個廁所，再買支茶飲，返來時車到了，因為旅行社幫我預約左，(一定要予約啊!) 對左名可以上車，有行李的可放車站，司機幫你放入行李區，架巴士幾大，可以坐約三十幾人，只有十多人坐，上車一陣就瞓左，行左一個鐘，司機在廣播，原來到中途站，可以去廁所，或者買野飲，上返車再瞓過！

去到登別就醒喇！沿途見到其他溫泉酒店，周圍好多溫泉煙，四點前已經到達酒店門口，大堂有十多個穿和服的職員，一字排開迎賓，check in 後，接待員好詳細講解邊度食晚飯，邊度食早餐，邊度浸溫泉，溫泉開放時間等，圖文並茂，因為呢間酒店都幾大間，有幾座，呢度 book 房係一泊兩食，包早晚餐，都係 buffet ，同一個地點食，溫泉就要行遠D！然後兩名職員帶我上房，是很傳統的做法，帶領人客上房後，在房內簡單講解和歡迎，要留意這裡的房門不是自動上鎖，出門時要按下室內那邊，門鎖中間粒的，然後才關門！放低行李先出去行，原本想去食蕎麥麵，但冇開門！成條街得三家食肆，得一間有開，此外，尚有幾家手信店和便利店，少不了去便利店行，買了一支綠茶，一包五隻香蕉（忽然想食！），再去手信店，買了薰衣草香包和cream，因為太乾燥了，要買cream滋潤一下！買完野見到上次住果間酒店，記得上次食完飯出來，只有便利店和手信店，天氣很凍！今次冇咁凍，再行去剛才巴士經過的地方行，行行下發現登別地獄谷原來好近，才想起上次由酒店坐旅遊巴去，好快落得車，因為好近，去到見到有幾架旅遊巴等緊團，過去影左一陣相，好肚餓！坐在路旁食返隻香蕉頂肚，今晚有 buffet食，唔食咁多住！行一陣又去買支牛奶飲，然後返酒店，酒店就在前小小，是最近登別地獄谷的一家酒店！

返到去五點幾，換對拖鞋落去食 buffet! 個 buffet 都係指定席，即係安排好晒坐位，日本的 buffet 通常在枱面有三個牌，一個是空席（冇人坐）、一個是食事中（有人坐）、同埋終了（食完喇），而且唔會好快收你食完既碗碟，呢度食物選擇不少，有蟹腳、刺身三種、天婦羅、燒牛肉、沙律、熱盤等，有一般咖啡或茶，另外叫杯酒就要收費，我叫了一杯梅酒，日本酒總是要有冰才好飲！食 buffet 的時候很爆場，我諗飯後去浸溫泉的人應該不少，上次去豪斯登堡完全是爆晒場，就是晚上沒地方去，所以人人都去浸溫泉！

食完飯原本想直接去浸溫泉，但忘了帶髮圈和小毛巾，溫泉那裡沒有小毛巾，要在房間裡帶去，返到房，就索性換埋浴衣去浸溫泉，行過大堂發現有 wifi，雖然今次買了 data sim card，不過每日只有100MB，可慳則慳，浸完溫泉先來上網！行去溫泉唔太遠，反正都在室內，去到溫泉的電梯已聞到強烈的琉璜味！再乘電梯上到三樓，右邊是女湯，左邊是男湯，入到去一排小 locker，以為是放鞋的，原來不是，是放包包的，鞋只須放鞋架，沒有鎖的，衣服也只放在籐籃，然後可直接入溫泉區洗澡再浸溫泉，這裡共有七個泉/三個露天泉/兩個sauna室，每個泉都浸一陣試吓，其中一個是冰冷的，在sauna室旁邊，應該係焗到身水身汗時浸這個冰水的，因為沒有焗sauna，所以覺得太凍了沒有浸! 以為今晚會好多人，卻只有不足十人，可能很多人仍在吃buffet 吧！人小小，可以舒舒服服浸，浸到熱又休息一下再浸，前後浸左一個鐘多D就走，在走的時候，路過入口見到有 massage 做，突然想做腳部按摩，就做一個40分鐘的按摩吧！順道再做15 分鐘肩膀按摩！經過兩天的舟車勞動，挺舒服呢！在大堂上一陣網，便返房睡覺！今晚瞓塌塌米，好好瞓！

Hea 遊北海道六天自由行-Day 2 小樽

一早七點鐘就醒左，早D起身去食早餐！餐廳在接待處對面，自助形式，食物選擇少，有幾款麵包，可自行放多士爐焗返熱，另外有生菜絲做的沙律，玉米湯、牛奶乳酪、牛奶布甸，飲品咖啡、茶、橙汁、北海道牛奶！吃了兩杯乳酪、南瓜麵包、用北海道牛奶冲了杯咖啡！再飲多杯牛奶！

今日去小樽，上次跟團來過，今次再去，乘JR前往小樽要45分鐘，去到火車站，尚有25分鐘才到9：13那班車，在車站有等候區，這等候區有別於等候室，是通道旁邊，有幾長櫈，有暖爐，大家圍住暖爐取暖，雖然三唔識七，感覺仍好 warm，坐到9：09才上月台，因忘記了去預訂指定席，唯有坐自由席，遲左上月台冇位坐！唯有站在車門旁邊！這班車是普通車各駅停，站站停，如果有 rapid 快線就會快D到！

沿途風景不錯，火車沿著海邊行駛，令我想起'千與千尋'！列車到達小樽是總站，所有人都落車，車站用氣燈造型的電燈，頗懷舊的！車站不大，只有一個出口，一出來便是巴士站和的士站，在門口影了一陣相，便往左手邊的三角市場，這個市場很細，一條巷子，大約有廿多家海鮮店，有些有堂食的，都有大水缸放了很多毛蟹、長腳蟹和松葉蟹，一入去看到這些蟹都好想食，在車站過來的入口先經過幾家賣乾貨的店，然後左手邊第一檔新鮮海鮮檔，店名是川嶋，但看不到有招牌，店員很落力推銷，又減價，可能生意欠佳，其實除了我，根本沒有其他客人！最後我選了一隻全場最細（差不多2Kg) 的皇帝蟹三食，蟹腳 sashimi 和燒烤，蟹身煮熟，店員說一般可以做四食，sashimi 、燒、蒸、煮，店員建議六隻蟹腳三種煮法，加蟹身另一煮法，但我改為三隻 sashimi，三隻燒，其實兩隻 sashimi 已足夠，雖然啖啖肉，不過熟食更好味！另外叫了半板海膽，可能不是當造期，海膽好細條，不過味道仍很鮮甜！選好食物後，少不了影相！先提起我預備要幹掉的蟹合照，然後再叫店員揀一隻大的再影！店員很友善，雖然英語能力極低，但係身體語言搭夠！在店子的裡面等待師傅處理隻蟹，這裡像一般日式海鮮檔 style，牆上貼滿食物照片，坐位都是簡單街坊 feel，有個女店員嘗試用有限英語溝通，問我從哪裡來，又話之前有港人教佢講"好食"、"下次再嚟"，見佢有貓紙，都幾攪笑！師傅更是要求幫手拍照，大概是想用用我的相機吧！^_^

先上最快處理好的 sashimi，啖啖肉好新鮮，食兩隻剛剛好，第三隻有點"漏"！too much ! 然後是燒蟹腳，熱辣辣好好味！好正呀！都係熟食好味D！食完蟹腳和海膽都飽了，尚有蟹身！份量絕對不少！將蟹身切成四件，每件都好多肉！還有蟹鉗，吃了兩只蟹鉗和一件蟹身，已經是非常的飽！只好叫店員打包！留待今晚才吃吧！今餐食得好開心好滿足！

食完野出發去小樽運河，這裡一帶都是住宅區，比較寧靜，在火車站取了一張中文地圖，跟地圖指示慢慢行，行了大約七、八分鐘，見到一條火車軌，跨過中間的馬路，馬路上的一段車軌幾乎消失了，這是一個已經荒廢了的火車駅，旁邊有個牌，寫住"手宮線跡地"，而旁邊有個小小的月台，叫做"色內驛"，大概是當年的站名吧！旁邊還有幾間舊舊的小店，尚未開門，有些燈飾，應該晚上才開吧！附近也是沒有人，遇然只有一兩個居民路過，影影相便繼續行。

行了大約五分鐘便到了，上次也來過這裡，天氣像今天一樣，陽光普照，只是遊客甚少，見到有人力車坐！上次好似唔多覺得有。趁無人就可以影全景相，影左幾張都唔太滿意，放棄了！坐低休息一陣，順便食杯軟雪糕！呢個時候開始有團來到，一車一車送遊客來，唯有行去旁邊的步行道影相，見到有檔賣 brooch的，是用金屬屈成英文名，可以即場做，就整返個先，另外有一檔賣明信片的，有一檔有個伯伯賣水彩畫的，可能伯伯在這裡很久了，也有餵附近的雀鳥吧！雀鳥都飛到他身邊，甚至站在他的帽子上！

在運河 Hea 左一陣，行去斜對面的出拔小路，這是一個小小的飲食街，但所有店都沒有開門，只有一家有店員，而這裡有一座兩層高的建築物，外面掛著白之戀人的牌，上到去乜都冇，連人都冇個！落返地下，搵北一硝子館，行左去條街，成條街都好多團，同埋越行越多店，有飲有食，行到一家好似展館的地方，入到去見到有隻貢多拉，就記得曾經來過，呢度有洗手間，順便去一去，然後繼續在同一條街行，呢條街大部份都係賣玻璃製品，同埋一些手信店，最多分店係賣朱古力的LeTAO ，行左一陣見到有一檔賣海鮮，門口有兩個爐，有一些貝殼類海鮮比人客自己揀，自己夾落碟，師傅會幫你洗同燒，然後在店內食，除了海鮮，還有蔬菜類可以揀，店內還有很多乾貨、雪藏海鮮和水果，雖然食左蟹都係個幾鐘，仲可以再食！我揀左海膽、扇貝和蠔，海膽即開即洗，好快食得，其他要燒，而且要排隊，第一次食即開即食的海膽，好新鮮！食完海膽再等陣，就到扇貝同蠔，扇貝落了醬油去燒，略咸了一點，蠔既味道剛好，好新鮮！呢度仲有切左件既蜜瓜，話甜度係18度，當然要整返件啦！果然好甜！好味！

食完繼續行，呢度有好多間北一硝子館，唔知係咪同一間，有點似是而非，在其中一家睇中左凍sake瓶和杯，這店註明是 handmade ，而且中英文寫明只此一家並冇分店，但係一街都係北一硝子館，行多幾間睇睇先。

一路行下，一路又坐低休息下，好 Hea ，今次話明 Hea 遊北海道，一於有咁 Hea得咁Hea，行到手信店北菓樓外面，又坐下，玀埋今朝打包的蟹出來吃！雖然凍左，仍然好鮮味，啖啖肉，正呀！食完搵個洗手間洗手先！然後行到街尾，就係曾經去過既音樂盒專門店，門外有個蒸汽時計台，好易認，入去行一圈就走，始終音樂盒唔係點常用，上次在這裡買過一個，也是收起了！

出返來行對面一邊，睇地圖見有一間大正硝子館，有做玻璃體驗，見時間尚早，就去睇睇，這店較近運河那邊，去到見有一位女士做緊，問店員那個負責教的女仕是否懂英語，她説可以，今天學做的是一顆圓珠，有三款圖案可選擇，我選了櫻花，埋去登記時，剛有一對情侶早我一步到了，要等一下，店員説做完的玻璃珠要等40分鐘去 cool down! 預計要花一小時，有興趣的朋友，要預早去整！工作室是用透明玻璃間開，外面有些櫈，可以坐在這裡等，先看看別人是怎樣做，見過程唔太難，師傅全程幫手，睇完一對情侶怎樣做已掌握到大約點做！到我做喇，我叫店員幫我影幾張相，然後開始，師傅先放了三粒細細粒的玻璃櫻花放在旁邊，預備之後加落粒珠度！首先右手 hold 住粉紅色玻璃支（像一支長長的筆），離火遠一點，讓它慢慢溶，另一隻手 hold 住一支鐵支（好似一支香咁），鐡支的一端是黃色的物料，要直接在火上燒紅，當燒紅左之後，右手的玻璃支要放在火上燒熔，玻璃燒到火紅便開始熔化，變得好軟身，立即將熔的玻璃在鐡支上卷兩圈，然後放低玻璃支，兩手一齊 hold 住鐵支在火上捲動，令玻璃熔化時，同時因轉動而變得圓圓地，然後離火繼續轉動，在它未完全 cool down 時，一路轉它會越來越圓，然後將玻璃珠壓落櫻花度，令佢黏在珠上再燒熔佢，呢個時候，用一支頂部是圓珠形的金屬棒，將櫻花壓扁入粒玻璃珠度，第一朶壓得好入，櫻花大朶左！另外兩朶就壓得麻麻，因為未熔得夠，之後再加一層透明玻璃，我重手左，令粒珠變左形，要再燒返圓，師傅好好心機教，負責影相的店員好落力，又叫我望鏡頭，影到差D仆倒！燒完的珠放入一個有些灰泥的鐵罐度，40分鐘後再來取，好開心做得唔錯，店員又友善，好難忘！

40分鐘時間，行返轉頭睇野，見呢度有間和服出租店，不過呢度著和服，只有運河一個景點可影，恐怕著果個會成為景點！雖然六點幾，大部份店開始關門，要搵洗手間，去返貢多拉果間展館，我出來後，他們也關門了，一來一回差不多四十分鐘了，可以攞返粒珠，我即時加配件，將佢做落髪簪度，只係加幾百円，亦可以做其他飾物！

攞完珠行返去火車站，剛走了一班火車，要等近半小時，在暖氣房睇一陣韓劇，由於小樽係總站，可以早D上車等，不過車門開住好凍，見到日本人會按門口旁邊的開關掣，原來這兩個掣是等開車時開關門的，來的時候見到呢兩個掣都好奇有乜用，依家知道喇！全日又凍又熱，有小小作病，返到札幌買藥旁身先！在JR駅買完藥，由 Paseo west 出去，剛好是火車軌天橋下面，過馬路有一個叫 Bridge的商場，商場外左面是一家長長的餐廳，外面有點像紅磚屋，沿住佢行到下個燈位就係我住既酒店JR lnn，而入去商場有一條巷，正正跟餐廳一樣的長度，如果凍或者落雨，行呢條路就只有過一條馬路是冇瓦遮頭，其餘是天橋底同商場，不過今晚去呢間餐廳食野，個人沾寒沾凍，想飲熱野但係無！全部得凍飲！唯有叫個蟹炊飯，有熱湯飲！另外叫了墨魚刺身，是北海道名物，試一試先，另外叫了烤雞和烏龍茶，茶是冰的！趕緊食藥打底先！食物質素ok，無乜驚喜，食完野仲未飽，叫多個鐵板芝士雜菜，呢個雜菜有西蘭花、南瓜、薯角，一個完整的圓形芝士和幾塊疏打餅，用鐵板上，可以令芝士熔化，再將蔬菜沾些芝士來吃，很有趣，不過芝士味略淡，沾完蔬菜，剩餘的塗餅乾吃，飽飽！

Hea 遊北海道六天之旅 - Day 1 札幌

相隔四個月，再一次去日本，今次去北海道，上次去北海道是2009年，當年與同一班朋友去了兩次旅行，一次是台灣自由行，一次是跟團去北海道，自從這兩次旅行之後，已經沒有再與同一班人去旅行了，各自有自己的生活改變，見面的機會也少了，始終有了孩子，就以家庭為重！

今次原本計劃去七天，但六天的 package 比七天省$4000元，分別在於不同的航空公司機票，由於一人行，國泰要加附加費，而香港航空的團體票只有六天，但不須附加費等等，所以少去一天，減少了一天酒店和附加費，原本七天要一萬多元，現在六千多元就可以了！

乘搭早機 9:25的航班，七點鐘到機場找 EGL 的職員取機票，先把行李寄艙，要在櫃位等了半小時才能登記和寄艙！完成寄艙後，便先行過關，同機的都是 EGL 另外兩個北海道團，過關後，仍未有登機閘號碼資料，先在 Disney store 行了一圈，過了約五分鐘，才有資料，今次的登機閘是523號，第一次去這邊登機，這邊是要乘巴士到停機坪上機的那種！在等待的時候煲韓劇，好快便可以登機了，這班機沒有 full ，尚有數十個位，很多人也調位了，我坐在路邊的35C，在吃過早餐之後，我也調去前一行的窗口位！可以坐得舒服點！因為旁邊沒有人，可以輕鬆點睡一覺，醒來尚有半小時便到達，飛機飛了四小時十五分鐘便到達新千歲機場，比預期快！記得上次要五小時才到達！飛機在停機坪慢駛了約10分鐘，2：55 才到了海關，過關時才取得入境紙填寫，因為飛機上不夠存貨！取了入境紙一邊排隊一邊填，前面約有三十人，有足夠時間填寫，後面的人龍卻有七、八十人，可能是同一班機，去完洗手間才過關的人，過關很快，行李才開始送到，去完洗手間出來剛好見到自己的行李出來！

從海關出來，見機場頗冷清的，只有一家便利店，沿指示前往JR車站，經過幾條行人扶手電梯，旁邊都做了些3D立體畫給遊客拍照，過到去JR車站那邊，完全是另一個世界，這邊是非常熱鬧的，店子很多，甚至有海鮮市場，看到第一家手信店 Kinotoya 大排長龍，這店售賣 cheese tart 和大大個軟雪糕，好吸引，這附近只有這一家要排隊，當然要試試，排隊時，店外也有些盒裝手信，主要是餅乾類，當然有試食，試食了一款黑豆餅，味道不錯，先買兩盒，去到收銀處，見到有牛奶布甸，也買一個試試！cheese tart 一般是買一盒六件的 ¥1080，我只有一個人，所以買一件 ¥183，六件抵好多！每件只需¥75！牛奶布甸要 ¥432，店員包裝牛奶布甸時加了一小包冰，好細心，原本想在火車吃，但見到海鮮市場那邊有地方讓人坐，就在這裡吃完才走， cheese tart 好好味！如果稍為熱一些更好，牛奶布甸十分香滑，底部有焦糖汁，吃到有小小酒的成份，離境那天要預留多點時間來購物！

去JR車站買車票，買了七天週遊券，因為沒有六天，只好買七天，買完飛坐下班車16:33開，等十五分鐘，職員替我訂了指定席，只有第四卡是指定席，其他是自由席，這裡的坐椅後面會有個放車票的位置，讓查票員方便查票，機場離札幌不遠，只需35分鐘便到達，車站很繁忙，人來人往，從大丸出去由廣場的右邊前往酒店，酒店就在火車軌旁邊，看來很新淨，check in 後入房看看，房間新淨整潔，我的房間不在火車軌那邊，相對靜一點！放下行李便出去搵食，行過去車站前面的街，沿途都頗冷清，可能過了落雪的季節，遊客減少了吧！行了好幾個街口，才找到味の時計拉麵店，店內也很冷清，只有一個卡位有四個人，叫了一客帶子拉麵，帶子大大隻有三隻，還有一片叉燒，一些玉米，一舊牛油，麵條是粗圓身半透明的，像油麵，很爽口，湯很濃，有點咸，芽菜很粗，整體來說好味，但太多油了，絕對是高油、高鹽，高脂！拉麵附了兩隻匙羹，一隻是普通的湯匙，另一隻是有很多小孔的，用來食玉米的，也可用來吃麵吧！吃完麵返回酒店附近行，去了ESTA 的Bic Camera，這裡有好幾層，其中一層有 Uniqlo ，與其 Uniqlo 無分別，但這裡有一個位置，放了一些布章、喱士、繡花字等，人客可加在 Uniqlo 的衣服上，例如買了一件淨色的 Tshirt，可加個章，或者繡花字等在Tshirt 上任何位，當然要附加費用了！見到 sample 都做得不錯！沿扶手電梯每層行，呢度電器部係超級大，款式多到不得了，感覺在日本經營電器絕不容易，肯定有大量損耗！行完 Bic camera 已經八點幾，原本想去大丸，也關了門，明天請早！

返到酒店，在大堂旁邊有些枕頭供人客選用，選好了，取一個枕頭袋，就可以返上房用了！