柏納大師奇幻Show

網誌日期：2010-01-23 00:45



柏納大師奇幻Show 故事講述活了幾千年的柏納大師為觀眾帶來奇幻表演，卻背負著一個黑暗詛咒，幾千年前他與魔鬼打賭，結果柏納大師贏了，並得到了永生。幾百年後，柏納大師遇上他一生摰愛，他決定跟魔鬼再來一場交易：用永生換取再一次青春，唯一條件是將來他的兒女16歲時，就要交給魔鬼。轉眼間，他的女兒華倫天娜快到16歲，此時，一個失憶的新秘男子出現，華倫天娜夾在這個男子和與她一同成長的男子之間...............柏納大師為了改變女兒的命運，再一次與魔鬼打賭，誰能先獲得5個人的靈魂，誰就可以得到華倫天娜。柏納大師許諾任何人如能為他贏得賭注，那人就可以娶華倫天娜為妻........。

套戲有d似大魚奇緣，一段奇幻旅程，戲入面有多個男星演出，戲份好少，唔知係咪男主角希夫烈格去世，而揾左呢幾個人做，如果唔係有佢地，我諗無人會去睇，戲中柏納大師年老後才永生，都幾慘，我地話如果後生年輕力壯就唔同喇！

Carpaccio

網誌日期：2010-01-21 23:28

上個星期去 isquare睇戲時，去左果度間Carpaccio食飯，呢間係意大利菜館，booking 都好full，我地早去，都可以比到枱我地，反正我飽飽地無胃口，應該好快食完，一坐低就先整個麵包先，我就唔肚餓，只係食左小小，同埋食左兩片巴馬火腿，d火腿好好味，可能我鐘意食，食完麵包同火腿已經飽，之後個牛膝只係試左一舊，好羶！我以為食緊羊肉！！麻麻地，原本想叫pasta，但係好飽，索性留返食甜品，不過之後唔記得左叫甜品就埋左單，都無睇到有乜甜品食，或者下次再試過，呢度d service都幾好，可能叫pasta,pizza會好食d!

六人同行

網誌日期：2010-01-18 23:59



已經很久沒有一班人去迪士尼，今日一行六人入去玩，原本七個人去，臨時一個有事要晚上才會合，今日都好多人，可能有兩個遊戲無開，谷晒d人去其他地方，所以去邊都要排隊，不過好快就排到，今次我乜嘢都無買，得阿Moon有買到野。我地食飯時傾開阿魚既婚姻問題，大家都好感概！希望佢無事啦！

晏晝果陣仲好熱，天黑就凍左好多，我地跟住出去太子食晚飯，間酒樓之前都去過，今次去食叫左d京菜，有片皮鴨，小籠包，生煎包，都係我鐘意食既野，今次覺得無上次咁好味，不過仲可以食埋甜品高力豆沙同豆沙鍋餅！

K 11

網誌日期：2010-01-16 23:21

電腦壞了好幾天，真有點不習慣，這陣子精神不太好，總是睡得不夠，老是昏昏欲睡.........前兩日還是去了尖沙咀剪髮，頭髮太長了，不能不剪，坐了兩小時，幾乎睡着了！剪完髮尚有小小時間，去了新開的K11，就在河內道那邊，以藝術為主題的商場，多了讓藝術家展覽個人作品的場地，至於商場本身商店不算多，都是一些大路品牌，地面一層有一間小餅店，只賣macaroon和cake，店子很小，選擇也不多，就沒有去試，相對isquare，這裏地方細一點，但風格較trendy，接待處的職員制服也較新潮，男的都戴帽子，下次有多點時間再仔細看看！

秋田犬八千 Hachiko - A dog's story

網誌日期：2010-01-09 00:52

果日去尖沙咀順路再去 isquare睇戲，條人龍都幾長，不過分左即場同預訂，所以都好快買到飛，買完飛仲有時間行吓，個商場比上次多左商店開左，有間好細既Log-On，大部份商店都唔係好貴既名店，食肆就有好多選擇！

入場後見d燈未熄又未開場，影低左d位既相，d位真係好濶落，唔使驚比前面果個遮住，坐得好舒服！講返套戲先，套戲講男主角Richard Gere演既教授，機緣巧合下同小狗八千相遇，共同生活一段時間後，八千每日都會到車站等他回來，直到一天，主人突然去世，它仍到車站第待........！期實睇預告已經知劇情講乜嘢。

套戲無預期咁"喊"，只係去到尾段，八千等左十年！老得行動緩慢地走到車站時，已經令人好心酸，然後比教授既太太見返佢，真係好感動！我直情聽到附近d人既嗦鼻聲！

睇完戲行左過對面重慶大廈地庫，新開既商場，唔記得個名......乜嘢wood.....唔記得左！果度開左好幾間食肆，其中一間係蘭芳園，好懷舊既裝修，促有咸檸檬賣，不過之前果餐食得太飽，乜都食唔落!

1881 Heritage

網誌日期：2010-01-08 00:07

還是第一次去尖沙咀既 1881 Heritage ，呢度開左一段時間，有幾次坐車經過望見呢度覺得好舊式既英國建築，好靚，記得以前呢度只有一幅高高既牆，入面有乜嘢都睇唔到，記得好似係警察總部之類既地方，依家呢度有好多食肆同名店，今日見整左個埃及金字塔，係Hennessy攪既promotion，雖然有d格格不入，不過都整得好靚，今日仲見有新郎新娘在影相。行到上樓上，見有座鐘樓，入面只有d圖片介紹，呢個鐘樓應該係一直响呢度，而呢一層全部都係食肆，有一間食grill，有一間食英式下午茶，睇落好傳統既high tea，再落返一層，見呢間DG cafe & wine cuisine好多食品選擇，有沙律，三文治，pizza，pasta，steak，wine，而且價錢較平，就試試啦！我地order左南瓜湯，蟹肉柚子沙律，炭燒牛排，意粉，味道普普通通，唔怪得價錢平d啦！

我愛紐約 New York I Love You

網誌日期：2010-01-05 23:47

聽講呢套戲係繼"我愛巴黎"後，同樣以"愛之都市"為主題的一系列短片集的電影，我未睇過我愛巴黎，唔知前一套係講乜，呢套既故事發生在紐約，由多個短編愛情故事組成。

由十一位導演以不同形式的愛去重新解讀這個城市，由初戀、一夜情、細水長流、失戀、天長地久… 十一個故事交織成的城市拼圖，讓觀眾與紐約客一起分享這個城市的最私密的一面以及當中人與人之間的愛與聯繫，而電影更由多個紅星演出，令電影錦上添花。

Romantic wedding

網誌日期：2010-01-02 00:40

踏入2010年既第一日，係Allan結婚既好日子，今朝早起身仲好頭痛，晚上就精神起來，去到酒樓好開心，見到阿仔Ling扮得好靚，一對新人就更加唔使講，新郎哥好靚仔，新娘更加係又靚又性感，大家都好開心，今晚既氛氛好浪漫，新郎向新娘高歌一曲既時候，全場較暗左d燈，所有人一齊揮動手上既LED 電筒，好似演唱會咁，新娘忍唔住喊，好浪漫呵! 今成晚見返好多舊朋友，大家好盡興，我心情都好興奮，新既一年好既開始，祝願新一年人人開心，再無煩腦！Happy new year !

黑目市場

網誌日期：2009-12-31 22:46



果日去完祗園仲係好早，我地就去左心齋橋附近既黑目市場，果度係一個魚市場，地方都算整潔，地方都算幾大，我地跟住本書去揾一間有壽司賣既店鋪，一去到都見到有d港人在買壽司，相信都係睇同一本旅遊書去揾，我地只係買咗吞拿魚同蟹腳，因為無乜選擇，可能太晏賣哂啦！而且果度主要係賣急凍海産，地下有d濕，只係得幾個位兼賣小小堂食，都有杯茶比你飲吓，不過d吞拿魚壽司確係好肥美，我地行埋街市其他地方，除左海鮮之外，街市仲有遊水既河豚，水果，鮮花，寵物等等，有野食既地方就好少，無乜嘢食就行返去心齋橋果邊，就有好多選擇。

我地行行吓見到一間叫做魚圓既街邊小店，門口放了些新鮮貝殼類海鮮，旁邊有炭爐和電爐，我地二話不說就走入去揾位，店入面只有幾個客，我地放低野就出去睇吓食乜嘢，我地選左幾款貝殼類既花蛤，蠔，帆立貝，魚，order左之後就要等，因為要慢慢燒，不過呢度主要係慢食，見其他客都係慢慢嘆，呢個時候，我地就影吓相，睇吓個師傅仔點整d海鮮，個師傅仔好攪笑，同佢影相時佢仲扮鬼扮馬，其他店員都好友善，除左食燒烤海鮮之外，我地仲叫左河豚刺生，同埋其他刺生，其中個活蝦刺生，好好味好鮮甜，如果再有機會去大阪，一定要再來！

神探福爾摩斯 Sherlock Holmes

網誌日期：2009-12-29 00:33

AMC 的電影簡介： 著名作家柯南道爾爵士筆下最受歡迎的角色 – 福爾摩斯和他的好拍檔華生再度面對棘手奇案。福爾摩斯不僅擁有非凡才智，功夫亦十分了得，今次他將會與復仇者硬拚，拆解一個足以毀滅整個國家的致命陰謀。最新一齣《神探福爾摩斯》由著名導演佳烈治執導，華納影片公司和Village Roadshow Pictures貢獻。由《鐵甲奇俠》羅拔唐尼飾演傳奇偵探福爾摩斯，《緣份精華遊》英俊小生祖迪羅則飾演福爾摩斯的得力助手華生。麗素麥雅當絲飾演唯一打敗福爾摩斯的女人、與他一直勢成水火的艾琳艾德勒。《叛碟同謀》馬克史壯飾演福爾摩斯和華生的神秘敵人Blackwood；華生的伴侶瑪莉則由《傲慢與偏見》嘉麗拉莉飾演。

今次睇呢套戲去左尖沙咀新開既 isquare 到睇，間戲院要上到7/F，在扶手電梯行來行去，最終都係揾升降機，由於我地漏左攞信用咭而遲咗去戲院，攪到我地好趕，原本有個幾鐘頭食飯，變左得一個鐘食，果度好多店鋪都末開，我地攞完飛見到食肆就走入去，去左一間叫牛陣既食肆，原來係食火煱，仲係任食果種，可惜我地唔夠時間，只能匆匆忙忙咁將d食物倒哂落個湯到滾,食完就走！套戲好好睇，對白精采惹笑，連場動作，絕無冷場，揾Jude Law係最佳人選，百份百英國紳士，Robert Downey雖有英國口音，始終個樣好美國人，唔係咁啱做"古裝"！結局擺明有下集，到時一定要睇！