京都祇園

網誌日期：2009-12-17 02:00

去完環球影城第二日就去左古色古香既京都，呢一程車係全個旅程最長既車程，大約一個小時車就到，而且全程都有位坐，只係有d眼瞓，睇旅遊書話一條線直到，其實都要轉車，不過係行過對面轉車，好方便，去到祗園四條駅落車之後出到路面，就見到一座類似廟咁既建築物，我地估係劇院之類既地方，不過我地都無入去睇吓証實係唔係！

沿路行都有好多商鋪在馬路兩邊，我地先行一邊，d商鋪主要賣一d好日式既物品，例如和式手袋,頭飾,扇,飾物等等，就算係化妝品都係和式既包裝，好靚呢！我就買左d小小布製小飾物，除左商店之外仲有d食店，有d係賣漬物，和菓子同紅豆甜品，我地因為食左野唔肚餓，所以無試到，行到街尾就係八板神社，紅色既建築，離遠已經見到，路上見到d著和服既女仕，不過次次都係行過左先見到，無機會影相tim!

入去神社先行一小段樓梯，跟住就見到幾個小檔攤，有賣八爪魚丸的，也有賣牛肉串燒的，還有賣冰糖水果的，我地每檔都買小小試吓，經過小檔攤之後，開始見到d小神社for唔同既祈福要求，好似有求姻緣既，有求健康既，亦有唔少寫願望既木牌賣，神社有好多樹已經一片紅葉,好靚！過左神社之後就係公園，好多學生在郊遊，在一棵大樹下有個老外在彈結他，地上放了結他袋，最奇怪係佢身後棵樹上有好多雀鳥停在樹上，好似在聽他彈結他，很有趣！

離開神社我地沿返對面馬路行，這邊馬路的商鋪大致上與對面差不多，有一檔賣串燒糕餅，類似年糕的東西，烤熱後抹小小醬油，好好味！吃完這個行去火車站既時候，迎面見到兩個穿和服的女仕，我地膽粗粗埋去問吓可唔可以影相，點知她們好nice咁話sure !結果我地都影到和服相啦

大阪環球影城

網誌日期：2009-12-07 00:57

到埗後既第二日，我地就去環球影城玩，我地都瞓到成十二點先出發，不過由心齋橋出發去，坐車既時間唔算長，轉車都好容易，好快就去到，一出閘已經見到幾座好美國feel既building,好colourful好懷舊feel, 又有好多大招牌,果段路既大廈地下都係商店，樓上就係食肆，果日天氣好好，陽光普照，心情都靚d，過左d商場就見到主要入口個招牌，旁邊已經見到過山車經過，同d人既尖叫聲，大家心情都好興奮，再行前d未到售票處就見到個招牌地球,上面個Universal 字不停咁轉，我地即刻冲埋去影相,好High耶~~

影完一輪相先去買飛，要$5800 yen一位,如果買Express coupon 就要加$3700 yen,我地睇左書知道有d遊戲可以單人玩,唔使排隊,亦都cover到express coupon既遊戲,所以我地一早plan左,如果多人就各自入去,反正唔知好唔好玩，又唔知坐到幾多人,最重要係唔使等！

一入場個格局就好似Disney咁，入口成條街都係商店，全部都係賣精品同埋手信食品，我地行到路口就見到做緊Parade, 我地即刻走埋去睇,睇睇吓仲有飄雪呀!跟住Parade 停低之後,仲可以同d表演人員影相呀!好開心!雖然好多人埋去影相，但係個個都好有禮貌，唔會爭住影，d表演人員都好識攪氣氛，一齊擺吓pose影........影完相就開始玩機動遊戲，第一個玩既係 4D Spiderman，果然係好多人，我地分道揚標，分開左玩，呢個game好好玩，雖然我一路玩一路好驚，但係真係好激好好玩，仲比人影左相，我張相合埋左眼，我都要晒返張留念.

玩左陣又排吓隊影d主要景點，又去行吓d shop, 去到Snoopy 果邊有間shop有兩個畫畫既男女，幫人畫卡通化既畫像，門口果張Sample上面果2張係男仔畫既，下面果2張就女仔畫既，我都畫左幅，由個女畫師畫,雖然唔係好似我個樣，不過都幾得意！我諗男仔會畫得cute d.之後我地去睇Terminator 3D, 開始既時候大家都企晒响度，跟住就有個女人出來講一輪野，唔知佢講乜嘢，但係d日本人笑得好開心，聽完之後就行過去另一邊坐，睇真人加電影既劇，最後果段煙霧彌漫，乜嘢都睇唔到，都幾驚驚地.......................玩多陣都好快天黑，天氣亦都續漸轉凉，個肚都開始餓，我地匆匆食左個burger就繼續去玩.

天黑後好快就等到Magical starlight parade, 坐喺大街等既時候都唔多人，一開始全條街都熄哂燈，跟住d車就陸續出來，d車既做型好靚，主要係Elmo, Snoopy , Hello Kitty 同埋一d電影角色,响環球影城玩左大半日，真係玩得好開心！唔多夠時間，應該一早去先玩得哂！

500

網誌日期：2009-12-06 01:19

今日係Peter既結婚好日子,亦係東亞運動的開幕禮,我地去銅鑼灣果間怡東酒店飲,我地坐既位就响窗邊,可以睇到煙花,真係好似放煙花慶祝佢哋結婚咁,仲見返好多好耐無見既老朋友,真係好感慨!

不經不覺已經寫到第500篇網誌,這幾年過得好快,亦有好多事發生過,轉變亦都好多,來年會點樣無人會知,只希望無論點變都係好既改變!

大阪遊

3人......5日.....8GB memory..........22kg 行李................無限回憶............今次大阪遊好開心,比起上次去北海道開心得多,行程安排得好好(讚自己!!)好順利,大阪比東京容易搭車,車程也較近,節省不少時間,第一日去到難波,行去心齋橋揾酒店都好容易,未返酒店便開始買野,我地拖住個喼四圍行,行到無得行先食野.........過兩日再慢慢再同大家分享!

驛馬星動

今年可能驛馬星動,好想外遊,今年先後去了台灣和北海道,今次輪到大阪啦!
之前書展買左正文社果本京阪神,資料較詳盡,剛剛兩期新價期又有本京阪神換,真係啱晒!仲要今期飲食男女又介紹大阪美食,不過地點唔太就腳,當中得一間在市中心,到時睇吓先,經過上次去北海道跟團既經驗,超趕,超唔夠瞓,今次一定要自由行!

昭和新山

行程有一日去昭和火山影大合照,影完就在附近自由活動,那天有些天陰和下雨,又唔夠時間,只在最近的小店行左一陣,吃了一點小食,附近有熊出沒注意的專賣店,都因為無時間而無去到,反而在手信店買了好些食物,因這店有試食,試過覺得好吃才多買幾盒,見到有自然牛乳賣,但因為太飽而沒有試,還有很多粟米和栗子賣,只是攜帶不太方便,都沒有買,而且好凍,早點上車暖吓!

Michael Jackson's This is it

真正既王者!

雖然係採排片段,令人驚嘆MJ沒有因為久久沒有演出而生疏,在台上台下,一樣跟以前一樣強勁的舞步!不單表演得精彩,對其它方面的要求都一絲不苟,即使是一些細微的事!令人更期待他的真正演出,可惜不可能有此機會了!看見他好地地採排,真想不到就這樣離開了!雖然電影尾段有點悶(講吓制作同慢歌),還是值得向他作致敬!

單身大急救 The Ugly Truth

網誌日期：2009-10-17 01:03



女主角是電台節目的製作人,她對自己及一起工作的人都要求嚴謹而且腌尖腥悶,因此雖然她漂亮又有一份不錯的工作,但仍然孤單一人,她對愛情仍充滿憧憬.由於她負責的節目收視率下跌,電視台請來出位節目主持人Mike加入,希望能令節目收視回升.他善於以幽默而又十分抵死的手法道出男女大不同,他相信男人與女人只會在床上相親相愛,肉慾關係是維繫感情的根本.....Abby則相信浪漫的愛情,以為會有十全十美的白馬王子,真愛才可以天長地久!兩人因工作上意見分歧,經常argue,後來女主角"睇中"她心目中perfect的男仔,是做醫生的鄰居,於是男主角以幫助她"溝"到鄰居作為合作與否的決定............一如以往的愛情小品,中間發生很多事情,男女主角不自覺的愛上對方........然後又大團圓的結局.......看這電影,好有90男歡女愛的影子,只是對白再露骨一點,橋段和佈局都很相似!

公主李-交义七號

最近好似興起貼假眼睫毛,雖然不是新事物,但係見越來越多地方賣和多了好多選擇,上次去日本見好多日本女仔貼又長又密又自然既假眼睫毛,我自己都用過幾個牌子,個人覺得Shu Uemura最好質素,不過就最貴($90-100一對),近兩個星期睇雜誌,見佢地極力推介台灣既公主李,價錢平,效果自然,今日出開旺角順道去銀座廣場睇吓,去到見銀座廣場係商業大厦,唔通係銀城廣場?即管過去睇吓,一上去就見有間專賣假眼睫毛的小店,有好多好多選擇,但係店名唔同雜誌講果間,anyway,果度d野好平,我都揀左盒($50十對),等緊人攞既時候發現佢地有公主李呢個牌子,我改左要呢隻($128十對),我揀既係交义七號(即係d假眼睫毛係交义編排,七號大概係濃密程度),比較自然唔會太長太誇,用左就好似比平時塗Mascara既效果濃密左一倍,好似自然增長左小小咁,唔怪得極力推介,個人認為要自然揀公主李,要誇張就揀Shu Uemura.....返到屋企睇返本雜誌,原來係銅鑼灣既銀座廣場!果度平$8($120十對)!

かに御殿

行程之中有一餐自費蟹宴,導遊帶我地去魚市場,果度係海邊一帶既屋,有好多間魚市場都係好大,我地去果間有好大隻熊响屋頂,入門口仲有兩隻熊標本,魚市場除左海鮮之外仲有好多急凍長腳蟹賣,另外仲有吞拿魚腩,一d乾貨,薰衣草產品,蜜瓜等,我地上到樓上見到同飛機果兩個團d人,都好多人吓,導遊講完點樣買海鮮,我地就落返樓下揀,導遊話十一國慶果星期,成個魚市場d蟹比大陸客人搶晒,依家內地人去到邊都係big spencder!唔怪得d店員都講國語!我地揀左中價既長腳蟹,好似萬ハ円,又揀左海胆同赤貝,然後買吞拿魚腩,咁細碟都要一萬円,不過真係好肥美,好好味!隻長腳蟹既腳做刺身,個蟹身做火煱,個火煱跟左一大碟菜同一d三文魚柳,成餐都好好味,只係唔記得買蝦!臨尾都買左件蜜瓜食,好甜呢!食完飯我地仲去店後面既海邊影相,好凍呵~~~