由民宿揸車過去青森魚菜中心只需要20分鐘,對面就有停車場,呢個魚市場唔係好大,佢嘅做法係要喺門口買voucher,食物嘅價錢係以voucher計算,佢做法係先攞咗一碗白飯,可以有大細選擇,如果你要埋湯就貴少少,跟住就去海鮮檔揀你要乜嘢海鮮放落你個飯度,嗰啲海鮮係切好晒一片片,價錢就係1枚voucher 1切海鮮,有啲係兩枚vouchers 1切或或兩切,每檔都差唔多價錢,當然佢亦都有一啲魚檔係收現金,例如生蠔、刺身,就係俾錢,只有魚生飯係用voucher,我哋買咗三個飯,因為有一個唔食飯,所以淨係要魚生片,一共用咗¥2,000 voucher都好抵食,我哋仲喺一檔魚檔買咗白子,店員話唔可以生食,我哋就買返去民宿今晚食,另外有一檔牛肉檔,見到有一包牛肉赤身,又買埋返去今晚打邊爐,因為尋晚食剩好多嘢,今晚要打多次邊爐,所以加少少餸!呢度亦都有一檔賣蘋果汁的,佢都有蘋果乾賣,仲有蘋果啫喱,蘋果乾同蘋果汁可以試食,試咗幾款之後我哋揀咗一隻黃蘋果乾,我哋一人買咗啲返去做手信,又買幾支蘋果汁返去今晚飲,亦都有買蘋果啫喱返去食,整體嚟講,呢個魚市場好值得一試!
由魚市場行出嚟,行過去斜對面,仲有一個新鮮市場,呢度以乾貨為主,雖然有少少魚檔,但係熱鬧程度爭好遠,不過好友都買咗少少魷魚絲,我就買咗乾瑤柱俾阿媽😄
返去民宿放低啲嘢,再出過去,我哋要去弘前市嘅蘋果園,體驗一下摘蘋果,佢呢度好似一個市集咁樣,有好多小攤檔,旁邊仲有個小舞台,好似有Event有啲小朋友表演,我哋行去檔攤,就見到係賣蘋果為主,亦都有兩檔賣咖啡,我就試一試其中一檔,試咗杯極深煎嘅咖啡都唔錯,見到旁邊一檔賣蘋果嘅檔攤,佢有一批早前打風吹跌落地嘅蘋果,外皮有少少花損,售價係¥300,有幾多個就視乎你可以入到幾多個落佢個膠袋,見過膠袋唔係太大,估計可以入到三四個,但係好友出盡力塞滿個袋,最後塞咗七個,好搞笑,最搞笑係店主見我哋咁勁,私人送多一個俾我哋,我哋係用¥300買咗八個青森蘋果,好搞笑🤣🤣 所以佢好快就賣晒🤭
買完將啲蘋果擺咗上車先,我哋另外亦都買咗一支大嘅蘋果汁,攞埋上車今晚飲,跟住行上上面,有一個商店嘅位置,呢度有唔少打卡位,亦都係報名摘蘋果嘅地方,我哋行入去商店睇吓,又買咗一啲手信,見到旁邊有間餐廳,佢有個餐係食三款蘋果批,所以我哋坐低試吓,睇佢餐牌佢一共有四款蘋果批,套餐係其中三款,冇包含喺個套餐入面嗰款蘋果批係最吸引嘅,所以我哋獨立嗌一件,另外叫咗雪糕新地,好友亦都嗌咗碗麵食,我哋食緊嘢嘅時候又落雨,好彩只係過雲雨!
食完嘢我哋就出去報名摘蘋果,報名係唔需要費用,但係摘落嚟嗰個蘋果,就要以重量計算價錢,佢係¥100/100g,佢哋嘅蘋果一般大概三百幾gram,即係每個大概三百幾円,頭先我哋用¥300買咗八個蘋果,而家一個都已經超過¥300,真係買個體驗😅四個蘋果已經¥1,200以上,足足夠頭先嗰檔買三十幾個😅 今日摘嘅蘋果係王林,跟住領隊去蘋果樹,呢度有幾棵蘋果樹,較低嘅位置俾人摘晒,高啲嘅位置就可以用佢哋嘅鋁梯,擒高去摘,領隊有教我哋點樣摘,但係我哋都係唔係好夠力,所以最終係男士幫我哋賺🤣🤣我哋只係做吓樣影吓相🤭 今日就收穫咗12個蘋果😅
跟住揸左車大概1小時就去到高山稻荷神社,呢度最出名係千本鳥居,要行上少少上山,先至可以望到,今日呢度唔算多人,可能呢個鐘數有少少逆光,所以影個鳥居出嚟有少少對光,而且呢度冇咩特別嘢行,真係純粹睇過鳥居,呢度售賣嘅繪碼,就係千本鳥居圖案,都幾靚👍🏻
我哋要趕去睇立佞武多展覽館,因為佢收五點我哋走嘅時候已經三點幾,車程大約要半小時,所以要趕喺四點前到,都係得一個鐘頭時間睇,去到門口我哋先落車買飛,好友去泊車,我哋先買入場券,順便喺間shop度兜咗一個圈,等好有排完車之後一齊入去睇,一入到去有三大座立佞武多,有三四層樓咁高,睇到我哋嘩嘩聲,因為好靚!喺地面睇完之後可以搭𨋢上去4樓,行返落嚟圍繞住三座立佞武多睇,喺架lift入邊睇其實覺得好巨型好近,反而沿路行有一段距離,影出嚟唔係好宏偉,現場睇係震撼好多!落到去3樓,佢有一個位係播片,播片嘅時候嗰三座立佞武多係會熄燈,我哋仲以為佢就嚟閂門,條片係介紹製作嘅過程,佢嘅歷史同埋出巡嘅時候係點樣情況,真係好希望有機會可以現場睇😄我哋好急趕咁用咗45分鐘睇完!


離開呢個展覽館,返去民宿之前,我哋去咗一間Workman color🤭 因為好友想買嘅衫冇佢尺碼,所以行多幾間睇吓有冇,又睇啱咗啲嘢,又買咗少少🤣跟住再喺AEON超市度買咗啲魚生!
返去民宿打邊爐,尋晚食淨啲餸嘅時候,話今晚打邊爐唔使買嘢,結果又買咗一堆食物😅所以今晚嗰餐又係好豐富,食到非常飽,我哋盡清,食唔晒就留返夜啲宵夜,或者聽朝做早餐😅😅
沒有留言:
發佈留言