前幾日由北海道返香港，今日又再出發去福岡🤭
今次四個人去，賣甩咗另外兩個好友，因為佢哋要做小朋友假期，所以唔能夠同我哋一齊去！喺機場集合咗，就去麥當勞食早餐，食完早餐再去閘口上機，今次搭大灣區，原本係想搭HK express，因為上次見到佢做特價，但係遲咗兩日買就已經完咗，跟住貴咗好多，見到大灣區平過佢，所以就買咗大灣區，大灣區最大嘅缺點係閘口遠，仲要再轉巴士，先至上到飛機！
抵達後，先搭地鐵去博多站，喺機場要搭免費巴士過去國內線嗰邊，先至有火車搭，去到博多站大家都好肚餓，所以喺商場搵嘢食，去咗一間叫做おおやまもつ鍋，主要係食牛腸鍋，我哋叫咗個套餐，再加多個麵，夠腸嘅份量都好少，菜就有好多，主要用個湯嚟煮麵都幾好食，食完嘢，先去搵努努雞，其實嚟過福岡幾次，都唔知有呢個產物，最近網上先見到，所以買一盒返去民宿試吓先，因為佢係凍食嘅雞翼，唔知味道如何！
我哋搭地鐵去天神，再行去民宿，都要行幾遠，放低咗行李之後，就出去行街，經過一間藥房，先去買啲飲品返民宿，再行過去博多運河城行街，喺運河城個商場睇啱少少嘢，諗住過兩日先至買，因為想睇吓其他地方嘅價錢，跟住行去中州屋台附近，見到好多屋台準備開檔，不過今晚我哋訂咗枱食燒肉，所以唔會去試屋枱！
我哋訂嗰間燒肉店1 dining，就喺一蘭對面，佢係同大阪嗰間あぶりや同一個集團，所以質素都唔會差，佢係放題嘅形式，又可以自助落單，都好方便，三個朋友都未食過呢間，佢哋都讚不絕口，覺得好抵食，雖然佢主要食牛肉，但係好友比佢嘅雞肉驚艷到😅 個甜品又好食，大家都好滿意！食飽咗大家慢慢行返民宿，例牌要行吓便利店 🤣🤣
酒店住後感：
Residence Libra
今次喺Airbnb訂咗呢間民宿，主要係貪佢平! 😅睇相都知道佢比較細，佢雖然有廚房，但係冇客廳，一入門口係廚房同廁所，另一道門入去就已經係一張雙人床，旁邊有張二人梳化，同一個茶几，另外有條扶梯，上面有兩張雙人床褥，上格嘅空間大概等於入門口廚房廁所咁大，基本上係冇乜空間，扶梯嘅下面可以擺兩個篋，當然唔能夠打開，唯一可以打開篋嘅地方，只可以同時間開一隻篋，我哋有四個篋，用埋廚房嘅空間，同一時間最多可以開兩個篋，所以我哋將要常用嘅嘢執晒出嚟先，我同好友瞓上格，反而有空間可以擺晒啲衫同日用品上去，當然每次攞嘢要上上落落就麻煩啲，不過呢個都係預期之內，浴室都好細，而且冇嘢可以掛毛巾，所以都唔係太方便，最奇怪係浴室嘅地下，濕咗之後，到第二朝都唔乾，呢個係好少見到嘅情況，因為呢度天氣都比較乾燥，我哋住五晚，佢冇特別安排清潔同倒垃圾，垃圾亦都唔可以放喺屋外，屋主有提示如有需要可以叫佢哋嚟清理垃圾，不過我哋冇乜時間等佢哋，所以呢幾日都冇掉垃圾，我哋冇濕嘅垃圾，所以問題唔大，呢度亦都冇提供牙膏牙刷，我哋自己帶咗嚟，仲要買咗一筒紙杯，用嚟飲水同埋做漱口杯！佢提供嘅洗頭水同沐浴露，質量都唔係咁好，呢度真係除咗平之外，都冇乜特別優點，反而附近嘅環境都唔差， 靜得嚟佢有便利店同藥房，仲有間AEON超市，可惜我哋冇煮食，因為佢呢度冇枱，空間亦都唔能夠俾我哋四個一齊坐喺度食嘢😅
沒有留言:
發佈留言