2025年9月第一次廣島獨遊 Day 5 - 縮景園、八丁堀

早餐星乃咖啡Again🤣🤣 呢兩日都冇卡位坐😅 要坐大廳🤭 食完嘢行出門口個2號巴士站，見到有定期觀光巴士，一共有三條線，分別以橙、綠、黃三隻色，代表三條線，亦都好詳細寫咗三條線嘅路徑會去邊度，路線都好接近，都係去一啲主要嘅景點，視乎你想去邊，班次亦都唔算疏落，橙色嗰條線係循環線，綠色就每小時一班黃色就每小時兩班，我要去縮景園，就橙色同黃色線都啱，只係搭兩個站，在県立美術館前站落車，行去美術館後面就係縮景園，今日又陽光普照，熱🥵

縮景園入園要買飛¥350，售票處旁邊有魚糧賣，每包¥100，自助購買同入錢落旁邊個膠筒度，呢度有提醒遊客，唔好將D魚糧餵俾白鴿，避免D白鴿周圍便便，我買咗兩包魚糧，跟住入去行吓，呢度係一個日式嘅庭園，中央係一個大嘅水池，水池上亦都有條橋，呢度養咗好多錦鯉同埋烏龜，我行咗一陣搵咗個水池邊喺度餵下魚，好快就餵晒兩包魚糧，所以要行返出去買多三包慢慢餵！行到條橋嗰度影吓相喂下魚，當你喺度餵魚嘅時候，就有一堆白鴿飛埋嚟想搵食，可能佢哋想捕吓有冇啲魚糧跌咗喺啲石上，佢哋可以埋去啄下🤭所以要小心啲唔好跌落地，就算跌咗都要執返，以免比白鴿食咗！喺縮景園逗留咗足足個半鐘，走嘅時候又見到有人影日式婚照，好多次去日本都見到人哋影和服婚照😄

行返去園立美術館前嘅電車站，搭9號線去八丁堀，呢條9號線好短，只有五個站，呢個站已經係第三個站，即係話搭兩個站就到八丁堀，一落車就見到斜對面有間三越百貨，所以入去行一陣，然後行去旁邊嘅えびす通い商店街，商店街中間有間胡子神社，行行吓見到間つきじ喜代村すしざんまい，呢間壽司店門口有個店主嘅人像，上次我哋喺大阪果間，喪食過一次好貴嘅一餐🤭今次一個人食極有限，店入面圍咗板，應該得返半間舖營業，所以都好快坐滿，前後叫咗10件壽司同埋一客銀鱈魚西京燒，佢個大拖羅就真係幾抵食，都好肥美 👍🏻😆

呢度有間福屋百貨公司Fukaya ，入去行吓，見佢做緊北海道食品祭，又上去睇吓，今次就冇乜特別嘢買，行返落去地庫，竟然有個Pop up Store 係 Gin No Mori， 之前在東京站買過佢啲餅覺得好好食，不過價錢偏貴，佢今次呢間Pop up Store有啲特別版本嘅餅，不過好多都一早賣晒，我只係買到兩盒特別版本，遲一步連兩盒都冇埋😅，又去返商店街嘅藥妝店買嘢，然後就返去廣島駅！

返到去先發覺原來 Minamoa 有間咖啡店叫做 Obscura coffee roaster，見佢有咖啡豆賣，所以買咗幾包做手信，或者聽朝過嚟試吓佢啲咖啡！跟住去返和久バル食生蠔🤭今次直接叫三隻 かき小町 🦪 正👍🏻👍🏻👍🏻

食完生蠔就可以去行街，今次特登早啲過嚟行吓，去咗Ekie 商場買手信，又去松本清買藥妝，再上去UNIQLO，買咗條褲！行完一輪再去食晚飯，今次去咗菊川四代目食鰻魚飯，入到去又得我一個，原來裏邊仲有三間房，有兩間房都有人，大廳就只有我一個🤭叫咗個広島御膳鰻魚飯set ，有少少刺身，鰻魚一本，吸物，我覺得比東京成田機場嗰間好食，食完飯商場又閂門了，返酒店執行李聽日就要走了🥹