今日要搭2:30 機，12:30要到機場，呢度去機場要一個鐘，即係11點左右要去搭車，9:00 check out，行返去広島駅食早餐，原本諗住去Obscura 試吓佢啲咖啡，但係佢未開門🫠 唯有再去星乃！今日星期六所以要等位，不過都好快，因為其實佢有位只不過未有人執枱，今日又係坐大廳，食完早餐都冇乜嘢可以行，因為拎住件行李唔係咁方便， 10點行落去巴士總站，去附近嗰間Lawson睇吓有冇一隻軟糖係魚仔型豉油造型，其實酒店樓下嗰間有得賣，但係唔記得咗買，唯有喺附近嗰兩間Lawson睇吓有冇，行咗兩間都冇，唯有去搭車，去到巴士站都係10:30 ，喺自助售賣機度買飛，然後上巴士度等開車，一個鐘頭就去到機場，離境要上一層國外線，見到Hong Kong Express 個櫃檯要12點先開，唯有去食啲嘢，呢度機場因為好細，所以唔係好多選擇，見到有一間叫做 Oyster farm Hiroshima，就食多餐生蠔先，見到有三款生蠔，又每款叫一隻，呢度有香檳飲，所以叫咗杯香檳，三款蠔又係兩細一大，同價格成正比，始終都係大隻嘅好食啲，所以加多一隻大嘅，好味😋😋 呢間店門口有個扭蛋機，入面有幾款生蠔模型，都幾搞笑，我抽咗兩個都抽唔中我想要嗰個，唯有放棄！
食完生蠔就夠鐘去寄行李，寄完行李再喺附近行吓，因為呢度得一兩間商店，行咗一陣，見到有扶手電梯上一層，上面都有幾間食店，原本想食牛扒，但係見冇位，於是去咗食牛肉soba，味道就一般！食完嘢就去過海關，過咗海關都仲有一兩間商店，竟然有賣東京ばな奈，因為有朋友叫我幫佢買，我喺広島咁多日都見唔到，原來機場有賣，咁就幫佢買一盒😅跟住就準備上機了！回程又係冇人坐我隔籬，因為班機比去程更少人！
返到屋企，又攞晒行李啲嘢出嚟影相，今次真係買咗好多嘢，返嚟個行李都29 kg，都塞到滿晒🤣🤣個篋嘅容量都算好大，不過呢個篋用咗好多年，個轆已經有少少壞，可能都要換過另一個！
沒有留言:
發佈留言